নগাঁও, 17 জানুৱাৰী : বিশিষ্ট আলোকচিত্ৰ শিল্পী সমীৰ চৌধুৰীলৈ অমূল্য মান্না আলোকচিত্ৰ বঁটা আগবঢ়োৱা হৈছে । প্ৰসিদ্ধ আলোকচিত্ৰ শিল্পী অমূল্য মান্না স্মৃতিৰক্ষা সমিতিয়ে নগাঁৱত এই কথা ঘোষণা কৰে (Amulya Manna Photography Award 2022) ।
২০২১ বৰ্ষত প্ৰথমবাৰৰ বাবে বিশিষ্ট আলোকচিত্ৰ শিল্পী তেজপুৰৰ নলিনী বৰুৱাক এই বঁটা প্ৰদান কৰা হৈছিল । এসময়ত অসমৰ ফটো সাংবাদিকতাৰ জগতত বিশেষ স্থান লাভ কৰা সমীৰ চৌধুৰীৰ আলোকচিত্ৰই সকলোৰে দৃষ্টি আকৰ্ষণ কৰিছিল ।
উল্লেখ্য যে, অসমৰ সংস্কৃতিৰ মূল আধাৰস্বৰূপ জনজাতীয় কৃষ্টি-সংস্কৃতিৰ বহু চিত্ৰশিল্পী সমীৰ চৌধুৰীয়ে কেমেৰাত জীৱন্ত ৰূপত বন্দী কৰিছে ।
১৯ জানুৱাৰীত অসমৰ পুৰোধা আলোকচিত্ৰ শিল্পী তথা চলচিত্ৰ পৰিচালক অমূল্য মান্নাৰ মৃত্যু দিন । মহান শিল্পীজনৰ স্মৃতি যুগমীয়া কৰি ৰখাৰ উদ্দেশ্যে অসমৰ কেইবাগৰাকী সংস্কৃতিৱান ব্যক্তিৰ উদ্যোগত ২০১৫ চনত অমূল্য মান্না স্মৃতি ৰক্ষা সমিতি গঠন কৰা হৈছিল ।
পৰৱৰ্তী সময়ত সমিতিৰ সিদ্ধান্তমৰ্মে তেখেতৰ মৃত্যু দিৱসৰ লগত সংগতি ৰাখি প্ৰতিবছৰে একোগৰাকী আলোকচিত্ৰ শিল্পীক অমূল্য মান্না আলোকচিত্ৰ বঁটা প্ৰদান কৰিবলৈ সিদ্ধান্ত লোৱা হয় । বঁটা প্ৰদান অনুষ্ঠান ১৯ জানুৱাৰীত নগাঁৱৰ অগ্ৰণী সাংস্কৃতিক গোষ্ঠী কল্লোলত বিয়লি ৩ বজাত অনুষ্ঠিত হ’ব । অতিমাৰী ক'ভিড 19 ৰ প্ৰতি লক্ষ্য ৰাখি বঁটা প্ৰদান অনুষ্ঠান অনুষ্টুপীয়াকৈ অনুষ্ঠিত হ'ব ।
লগতে পঢ়ক: আকৌ এবাৰ চৰকাৰীভাৱে উপেক্ষিত হ’ল বলাই ওজা; নাপালে শিল্পী পেঞ্চন
