নগাঁও, 7 অক্টোবৰ : নগাঁৱৰ মৰিকলং সেউজ নগৰত পুনৰ উত্তপ্ত পৰিস্থিতি । শুক্ৰবাৰে নিশা নাৰী দেহ ব্যৱসায়ক কেন্দ্ৰ কৰি সৃষ্টি হয় উত্তপ্ত পৰিস্থিতিৰ । শনিবাৰে পুৱাই একেটা এলেকাতেই সংঘটিত এক ডকাইতিকাণ্ডৰ চাঞ্চল্য মাৰ নৌযাওঁতেই নিশা পুনৰ এটা নাৰী দেহ ব্যৱসায় চলি থকাৰ তথ্য পোহৰলৈ আনিবলৈ সক্ষম হয় স্থানীয় ৰাইজ ।
নগাঁও চহৰৰ মৰিকলং সেউজ নগৰত ৰাইজে উৎখাত কৰে দেহ ব্যৱসায়ী চক্ৰ । সেউজ নগৰত এটা ভাড়াঘৰ লৈ এগৰাকী মহিলাই চলাই আহিছিল দেহ ব্যৱসায় । প্ৰতি নিশাই ঘৰটোলৈ অহা যোৱা হৈছিল সন্দেহজনক যুৱক-যুৱতী । প্ৰায়েই বহু বিলাসী বাহনৰ আগমন ঘটে বিশেষ ভাড়াঘৰটোলৈ ।
শুক্ৰবাৰে নিশাও ঘৰটোত আছিল দুগৰাকী যুৱতীৰ লগতে সন্দেহজনক যুৱক । স্থানীয় লোকে উত্থাপন কৰা অভিযোগ অনুসৰি বিশেষ ঘৰটোত শুক্ৰবাৰে নিশা যুৱক যুৱতী আৰু মহিলা গৰাকীৰ সৈতে হৈছিল কিছু সংঘাত । এক হুলস্থুলীয় পৰিবেশৰো সৃষ্টি হৈছিল । যাক লৈ স্থানীয় লোকৰ মাজত সৃষ্টি হৈছিল সন্দেহৰ ।
পিচতেই স্থানীয় লোক একগোট হৈ ঘৰটো ঘেৰাও কৰি সৃষ্টি কৰে উত্তপ্ত পৰিস্থিতিৰ । উত্তপ্ত পৰিস্থিতিৰ মাজতে নিশা আন্ধাৰৰ সুযোগ লৈ পলায়ন কৰে সন্দেহজনক লোক দুজন । পিচত স্থানীয় ৰাইজে আটক কৰে শিলচৰ আৰু তিতাবৰৰ দুই যুৱতীক । ইয়াৰে এগৰাকী মহিলাৰ বিৰুদ্ধে ভাড়াঘৰত অনৈতিক কাৰ্যকলাপ চলাই অহাৰ অভিযোগ উত্থাপন হৈছে । এই ভাড়াঘৰটোলৈ বহু অপৰাধীৰ সঘন আহ-যাহ ঘটিছিল বুলিও দাবী স্থানীয় লোকৰ ।
শুক্ৰবাৰে নিশা সেউজ নগৰত নাৰী দেহ ব্যৱসায়ক লৈ উত্তপ্ত পৰিস্থিতিৰ সৃষ্টি হোৱাৰ পিচত উপস্থিত হয় স্থানীয় মৰিকলং আৰক্ষী চকীৰ আৰক্ষী। স্থানীয় লোকে কৰায়ত্ত কৰা অভিযুক্ত মহিলা-যুৱতীক পৰৱৰ্তী সময়ত আটক কৰি আৰক্ষী থানালৈ লৈ যায় আৰক্ষীয়ে ।
উল্লেখযোগ্য যে, নগাঁও চহৰত ভাড়াঘৰ লৈ একাংশ দুষ্ট চক্ৰই এনেদৰে দেহ ব্যৱসায় চলাই থকাৰ অভিযোগ উত্থাপন কৰি এনে চক্ৰৰ বিৰুদ্ধে ব্যৱস্থা গ্ৰহণৰ বাবে নগাঁও আৰক্ষীক দাবী জনায় নগঞা সচেতন লোকে ।
লগতে পঢ়ক : CM vigilence team in Goappara : গোৱালপাৰাত চি এম ভিজিলেন্সৰ দল; জব্দ আৰ অ’ প্লাণ্টৰ সকলো নথি-পত্ৰ
