মৰিগাঁও, ১০ জুলাই: এন আৰ চিত বাদ পৰিল 1942ৰ গণ আন্দোলনৰ সন্তান তথা অসম আন্দোলনৰ নেতাৰ নাম । মৰিগাঁৱৰ প্ৰয়াত মুক্তি যুঁজাৰু কামেশ্বৰ বৰদলৈৰ পুত্ৰ তথা অসম আন্দোলনৰ অগ্ৰণী নেতা প্ৰদীপ বৰদলৈৰ নাম ৰাষ্ট্ৰীয় নাগৰিকপঞ্জীত অন্তৰ্ভুক্ত নোহোৱাত সৃষ্টি হৈছে প্ৰতিক্ৰিয়াৰ ।
42ৰ গণ আন্দোলনৰ আগশাৰীৰ সেনানী আছিল কামেশ্বৰ বৰদলৈ । তেওঁৰ সংগ্ৰাম আৰু ত্যাগক স্বীকৃতি দিছিল প্ৰয়াত প্ৰধানমন্ত্ৰী ইন্দিৰা গান্ধীৰ চৰকাৰেও। পেঞ্চন আৰু তাম্ৰপত্ৰ প্ৰদানেৰে কামেশ্বৰ বৰদলৈক সন্মানিত কৰা হৈছিল ৷ পানীখাইটিত ব্ৰিটিছৰ ৰে'ল বগৰাই দিয়া সেনানীসকলৰ অন্যতম মৰিগাঁৱৰ এইজন কামেশ্বৰ বৰদলৈক অসম চৰকাৰে তাম্ৰপত্ৰ প্ৰদানেৰে সন্মান জনাইছিল । এইগৰাকী মুক্তি যুঁজাৰু কামেশ্বৰ বৰদলৈ পুত্ৰৰ হৈছে প্ৰদীপ বৰদলৈ । মৰিগাঁও চৰাইবাহীৰ প্ৰদীপ বৰদলৈয়ে অসম আন্দোলনৰ লগতে আন জাতীয় আন্দোলনতো গ্ৰহণ কৰিছিল সক্ৰিয় ভূমিকা । আনকি অসম আন্দোলনৰ সময়ত কাৰাগাৰতো বন্দিত্ব জীৱন কটাইছিল প্ৰদীপ বৰদলৈয়ে ৷ সম্প্ৰতি জাগীৰোডৰ বাসিন্দা প্ৰদীপ বৰদলৈয়ে এন আৰ চি কৰ্তৃপক্ষক সকলো নথি-পত্ৰ যোগান ধৰিছে । কিন্তু নাগৰিকপঞ্জীত তেওঁৰ নাম পঞ্জীয়ন নোহোৱাত সংবাদ মাধ্যমৰ আগত ক্ষোভ উজাৰিলে মুক্তি যুংজাৰুৰ সন্তান তথা অসম আন্দোলনৰ সক্ৰিয় নেতা প্ৰদীপ বৰদলৈয়ে ৷
