লখিমপুৰ, 22 আগষ্ট : অৱশেষত সঁচা প্ৰমাণিত হ'ল লখিমপুৰ জিলাৰ অসম অনুসূচীত জাতি যুৱ ছাত্ৰ সন্থাৰ অভিযোগ ৷ জাতিগত প্ৰমাণ পত্ৰ জালিয়াতি কৰি উত্তৰ প্ৰদেশৰ বসন্ত মহিলা মহাবিদ্যালয়ত অধ্যাপিকাৰ পদত নিযুক্তি লাভ কৰিছিল লখিমপুৰৰ নকাৰীৰ লুনামণি দাসে ৷ লখিমপুৰৰ উপায়ুক্তৰ তদন্তত উন্মোচিত হৈছে এই বিস্ফোৰক তথ্য ৷ অধ্যাপিকা গৰাকী এম অ’ বি চি(MOBC) যদিও এছ চি (SC)ৰ জাতিগত প্ৰমাণ পত্ৰ লৈ উত্তৰ প্ৰদেশৰ বসন্ত মহিলা মহাবিদ্যালয়ত অধ্যাপনা কৰি আছিল তেওঁ ৷
অসম অনুসূচীত জাতি যুৱ ছাত্ৰ সন্থাৰ অভিযোগৰ ভিত্তিত অৱশেষত লখিমপুৰৰ জিলা উপায়ুক্তই তদন্ত কৰি লুনামণি দাসৰ ভুৱা জাতিগত প্ৰমাণ পত্ৰ নাকচ কৰে ৷ যুৱ ছাত্ৰ সন্থাই দেওবাৰে লখিমপুৰত এক সংবাদ মেল যোগে সদৰি কৰে এই তথ্য ৷ উল্লেখ্য যে, সমগ্ৰ ৰাজ্যত দুহেজাৰৰো অধিক অনা অনুসূচীত লোকে ভুৱাকৈ অনুসূচীত জাতিৰ প্ৰমাণ পত্ৰ লৈ সৰু বৰ চাকৰি কৰি থকাৰো অভিযোগ সন্থাটোৰ ৷ কেইবাজনো ৰাজপত্ৰিত বিষয়াইও ভুৱা জাতিগত প্ৰমাণ পত্ৰৰে চাকৰি কৰি আছে বুলি ক্ষোভ উজাৰে সংগঠনটোৱে ৷
ইয়াৰ লগতে লখিমপুৰত কেইবাখনো মহাবিদ্যালয়ত ভুৱাকৈ জাতিগত প্ৰমাণ পত্ৰ লৈ কেইবাজনেও অধ্যাপনা কৰাৰো অভিযোগ উত্থাপন কৰিছে সংগঠনটোৱে ৷
লগতে তেওঁলোকৰ বিৰুদ্ধে চিআইডিৰ তদন্ত অব্যাহত থকাৰ কথা সদৰি কৰিছে যুৱ ছাত্ৰ সন্থাই ৷ ৰাজ্যজুৰি থকা এনে ভুৱা প্ৰমাণ পত্ৰ ধাৰী সকলক তেওঁলোকৰ প্ৰমাণ পত্ৰ সমুহ ত্যাগ কৰাৰ দাবী জনাই অন্যথা তেওঁলোক কঠোৰ শাস্তিৰ সন্মুখীন হ'ব লাগিব বুলিও সকিয়নী দিছে সংগঠনটোৱে ৷ আনহাতে যিসকল বিষয়ববীয়াই ভুৱাকৈ অনুসূচীত জাতিৰ প্ৰমাণ পত্ৰ অনা অনুসূচীত জাতিৰ লোকক দি আহিছে তেওঁ লোককো সৰ্তক বাণী শুনাইছে সংগঠনটোৱে ৷
ৰাজ্যৰ সকলো জিলাতে অনুসূচীত জাতিৰ ভুৱা প্ৰমাণ পত্ৰৰ বিৰুদ্ধে এক আন্দোলন গঢ় দিয়া হ'ব বুলিও সংগঠনটোৰ নেতৃত্বই সকলোকে সকীয়াই দিছে ৷
লগতে পঢ়কঃ শ্ৰীশ্ৰী আউনীআটী সত্ৰই স্থাপন কৰিব বিশ্বমুখী বিশ্ববিদ্যালয়
