কোকৰাঝাৰ, 2 জুলাইঃ একাংশ দুষ্কৃতিকাৰীৰ বাবে প্ৰহশনত পৰিণত হৈছে ৰাষ্ট্ৰীয় নাগৰিকপঞ্জীৰ উন্নতিৰ কাম ৷ এইবাৰ আন এক ভয়ংকৰ জালিয়াতিৰ তথ্য় পোহৰলৈ কোকৰাঝাৰ জিলাত ৷ জিলাখনত একাংশ দুষ্ট প্ৰকৃতিৰ লোকে আন লোকৰ লিগেচী ডাটা চুৰি কৰি নাগৰিকপঞ্জীত আবেদন কৰিছে ৷ এই ভয়ংকৰ অভিযোগ উত্থাপন কৰিছে আলিব উদ্দিন পাৰমানিক নামৰ লোকজনে ৷ লোকজনে অনা অভিযোগ অনুসৰি, তেখেতৰ মোমায়েক মমতাজ আলী মণ্ডলৰ লিগেচী ডাটা চুৰি কৰি প্ৰায় নগৰাকীকৈ ব্যক্তিয়ে ৰাষ্ট্ৰীয় নাগৰিকপঞ্জীত আবেদন কৰিছে ৷
আলিব উদ্দিন পাৰমানিকে জনোৱা অভিযোগ অনুসৰি, আব্দুল আজিজ (পিতাঃ আব্দুল পাৰমানিক, গাঁওঃ নৈয়াছাৰা), আব্দুল চুবুৰ মণ্ডল (পিতাঃ উচুব আলি, গাঁওঃ মৌমাৰি), সহিত আলী মণ্ডল (পিতাঃ কুদুচ আলী শ্বেখ, গাঁওঃ অমিনখাতা), সাহিনুৰ বেবি (গাঁওঃ মৌমাৰি), মমেছা খাতুন (গাঁওঃ গ্ৰাম সোঁতাৰা), অজিৰুণ বেবি (গাঁওঃ কচুকাটা), মনোৱাৰা বেবি (গাঁওঃ কচুকাটা), ৰবীয়া বেবি (গাঁওঃ কচুকাটা) আৰু ৰবিয়া বেবি নামৰ লোককেইজনে লিগেচী ডাটা চুৰি কৰি ৰাষ্ট্ৰীয় নাগৰিকপঞ্জীত আবেদন কৰিছে লগতে কোকৰাঝাৰ জিলাৰ গোসাইগাঁও মহকুমাৰ খুলসিংমাৰি ৰাষ্ট্ৰীয় নাগৰিকপঞ্জী সেৱাকেন্দ্ৰত সংঘটিত হৈছে এই ভয়ংকৰ জালিয়াতি ৷
আলিব উদ্দিন পাৰমানিকৰ অভিযোগ অনুসৰি, উপৰোক্ত ব্যক্তিকেইজনৰ মমতাজ আলী মণ্ডলৰ সৈতে কোনো সম্পৰ্ক নাই যদিও তেঁওৰ লিগেচী ডাটা চুৰি কৰি ৰাষ্ট্ৰীয় নাগৰিকপঞ্জীত আবেদন জনাইছে ৷ ইতিমধ্যে ঘটনা সন্দৰ্ভত ৰাষ্ট্ৰীয় নাগৰিকপঞ্জী কৰ্তৃপক্ষক বাৰম্বাৰ অভিযোগ দিয়া হৈছিল যদিও আজিলৈ কোনো ব্যৱস্থা গ্ৰহণ নকৰাৰ গুৰুতৰ অভিযোগ উত্থাপন কৰিছে ভুক্তভোগী পৰিয়ালটোৱে ৷ উপায়ান্তৰ হৈ ঘটনা সন্দৰ্ভত কোকৰাঝাৰৰ জিলা উপায়ুক্ত পাৰ্থপ্ৰতিম মজুমদাৰৰ ওচৰত অভিযোগ দাখিল কৰিছে ভুক্তভোগী পৰিয়ালটোৱে ৷
