কৰিমগঞ্জ,18 মাৰ্চঃ কৰিমগঞ্জ জিলাৰ দক্ষিণ কৰিমগঞ্জ সমষ্টিৰ অন্তৰ্গত আনিপুৰৰ পৰা চটইয়াপুঞ্জি পৰ্যন্ত প্ৰধানমন্ত্ৰী গ্ৰামীণ পকী পথ যোজনাৰ অন্তৰ্গত পথ নিৰ্মাণত সংঘটিত হৈছে ব্যাপক অনিয়ম ৷ পথটো নিৰ্মাণৰ বাবে আবণ্টিত হৈছিল প্ৰায় 1কোটি 40লাখ টকা ৷ এই পথ নিৰ্মাণৰ ঠিকা লাভ কৰিছিল পি এণ্ড বি এণ্টাৰপ্ৰাইজ নামৰ এটা নিৰ্মাণ সংস্থায়ে। স্বত্বাধিকাৰ পিলু সিনহা নেতৃত্বাধীন নিৰ্মাণ সংস্থাটোৱে নিম্নমানৰ কামেৰে নিৰ্মাণকাৰ্য আৰম্ভ কৰে।
ইপিনে,উক্ত পথৰ নিৰ্মাণকাৰ্য সন্দৰ্ভত ৰাইজে দিয়া অভিযোগৰ ভিত্তিত গড়কাপ্তানী বিভাগত চলি থকা দুৰ্নীতিৰ খবৰ প্ৰকাশ পাইছিল সংবাদ মাধ্যমত । কিন্তু,সংবাদ প্ৰকাশ পোৱাৰ পিছত পুনৰ বিভাগীয় কৰ্তৃপক্ষই একাংশৰ লগত বুজাবুজিৰে চলাই নিছিল পথটোৰ নিৰ্মাণ কাৰ্য ৷ ঠিকাদাৰগৰাকীয়ে এইবাৰ ম্যাদ উকলা চিমেণ্টৰে পথ নিৰ্মাণৰ কাম চলাই আছে বুলি পুনৰ অভিযোগ উত্থাপন কৰিছে ৰাইজে ৷ স্থানীয় জনতাই এই কথা জানিব পাৰি ঠিকাদাৰ গৰাকীৰ ওপৰত ক্ষুব্ধ হৈ বন্ধ কৰি দিয়ে পথটোৰ নিৰ্মাণকাৰ্য ৷ ৰাইজৰ দাবী,গড়কাপ্তানী বিভাগে যেতিয়ালৈকে কামটোৰ উচিত তদন্ত নকৰে,তেতিয়ালৈ এই নিৰ্মাণ কাৰ্য বন্ধ থাকিব । বিভাগটোৱে ৰাইজৰ কথাত কিমানদুৰ সঁহাৰি জনাব সেয়া লক্ষণীয় হ’ব ৷
