কৰিমগঞ্জ,11 আগষ্ট: দুবছৰ পূৰ্বে কৰিমগঞ্জৰ পাথাৰকান্দি সমষ্টিৰ কেইবাটাও মথাউৰি লংগাই নৈৰ বাঢ়নী পানীয়ে চিগি নিছিল। লংগাই নৈৰ পানীয়ে পাথাৰকান্দি সমষ্টিৰ মন্ত্ৰীগাঁৱৰ মথাউৰীও নিছিল চিঙি । ইয়াৰ ফলত মন্ত্ৰীগাঁৱৰ 25খন গাঁও প্লাবিত হৈছিল । লংগাই নৈৰ বুকুত জাহ গৈছিল বহু কেইটা ঘৰ দুৱাৰ ৷
এবছৰ পূৰ্বে চিগা মথাউৰি পৰিদৰ্শন কৰিছিল জলসম্পদ মন্ত্ৰী কেশৱ মহন্তই । প্ৰত্যক্ষ কৰি গৈছিল ৰাইজৰ দুৰ্দশা কিন্তু তাৰ পিছতো নিৰ্মাণ নহ'ল ভগ্ন মথাউৰি । ফলত কৃষি প্ৰধান অঞ্চল হিচাবে পৰিচিত মন্ত্ৰীগাঁও,পাত্ৰগ্ৰাম,পেকুৰগ্ৰাম,কচুৱাৰী,কলকলীঘাটকে ধৰি 25 খন গাঁৱৰ কৃষকসকলে সমস্যাৰ সন্মুখীন হয় ।
ইয়াৰ লগতে অঞ্চলটোৰ ৰাইজৰ বাবেও ভাবুকি স্বৰূপ হৈ পৰিছিল ভগ্ন মথাউৰিটো ৷ কিয়নো যি কোনো সময়ত ঘৰ-বাৰী উটুৱাই নিয়াৰ ভয় এই অঞ্চলবাসীৰ । সেয়েহে চৰকাৰ তথা জলসম্পদ বিভাগৰ ওপৰত আস্থা হেৰুৱাই অঞ্চলটোৰ ৰাইজে চান্দা তুলি স্থানীয় সামাজিক সংগঠন বিষ্ণুপ্ৰিয়া মণিপুৰী ইয়ং ব্ৰিগেড আৰু মন্ত্ৰীগাঁও পৰ্ট ট্ৰাষ্ট নামৰ দুই সংগঠনে ৰাইজক লৈ নামি পৰে মথাউৰী নিৰ্মাণত। এইক্ষেত্ৰত উন্নয়নৰ শ্লোগান দিয়া চৰকাৰখনৰ এক লজ্জাজনক স্থিতি উদঙাইছে।
