কৰিমগঞ্জ, আগষ্ট 10 : উচ্চতম ন্যায়ালয়ৰ নিৰ্দেশেও লৰাব নোৱাৰা ভাৰত-বাংলা সীমান্তৰ একাংশ গৰুৰ বজাৰ ৷ ন্যায়ালয়ৰ নিৰ্দেশক অমান্য কৰি কৰিমগঞ্জত সীমান্তৰ 20 কিলোমিটাৰৰ ভিতৰত বহু কেইটা স্থানত অবাধে চলিছে গৰুৰ বজাৰ ৷ ৰাইজৰ অভিযোগ অনুসৰি একাংশ আৰক্ষীৰো সহযোগ আছে এই ব্যৱসায়ীসকলৰ সৈতে ৷ উল্লেখ্য যে, কৰিমগঞ্জ সদৰ থানাৰ অধীনৰ কালিগঞ্জত থকা সীমান্তৰ পৰা মাত্ৰ 8 কিলোমিটাৰ দুৰত্বত আছে আটাইটকৈ ডাঙৰ গৰুৰ বজাৰখন ।
এই সমূহ বজাৰৰ পৰা গৰু ক্ৰয় কৰি কৰিমগঞ্জ চহৰৰ মাজেৰে সৰবৰাহ কৰাৰ সময়তে বজৰং দলৰ সদস্যৰ সহযোগত ৰাইজে আটক কৰে তিনিখনকৈ গাড়ী ৷ কিন্তু আশ্চৰ্যজনকভাৱে ৰাইজে আৱদ্ধ কৰা গাড়ীকেইখন থানাৰ ভাৰপ্ৰাপ্ত বিষয়াই থানালৈ লৈ যাবলৈ বিচৰাত সৃষ্টি হয় উত্তপ্ত পৰিস্থিতিৰ ৷ ৰাইজৰ মতে মাজ নিশাও এইদৰে সৰবৰাহ হয় গৰুভৰ্তি বাহন ৷ উল্লেখ্য যে, যোৱা 5 আগষ্টত জিলা পৰিষদৰ কাৰ্যালয়ৰ যোগেদি উচ্চতম ন্যায়ালয়ৰ নিৰ্দেশক বেনাৰ আৰু মাইকত ঘোষণা কৰি সীমান্তত গৰুৰ বজাৰ বন্ধ কৰাৰ প্ৰয়াস কৰা হৈছিল ৷ কিন্তু তাৰ পাচতো বন্ধ হোৱা নাই এখনো গৰুৰ বজাৰ ৷ কালিগঞ্জ আৰু ফকিৰা বজাৰৰ উপৰিও সীমান্ত অঞ্চলত চলি আছে বহু কেইখন এনে অবৈধ গৰুৰ বজাৰ ৷ ইয়াৰে দুয়োখন বৃহৎ গৰু বজাৰ কৰিমগঞ্জ সদৰ থানাৰ অন্তৰ্গত ৷ কিন্তু ভাৰপ্ৰাপ্ত আৰক্ষী আধীক্ষক উৎপল বৰাই কৌশলেৰে গৰুভৰ্তি বাহন সমূহ ৰাইজৰ পৰা মোকলাই নিব খোজাত ক্ষোভিত হৈ পৰে স্থানীয় ৰাইজ ৷
উল্লেখ্য যে, নিশা বাৰ বজা পৰ্যন্ত কৰিমগঞ্জত এই ঘটনাক লৈ পৰিস্থিতি উত্তপ্ত হৈ থাকে ৷ পৰৱৰ্তী সময়ত অতিৰিক্ত আৰক্ষী অধীক্ষকৰ উপস্থিতিত উত্তেজনা কিছু শাম কাটে ৷ উচ্চতম ন্যায়ালয়ৰ নিৰ্দেশ অৱমাননা কৰা এইসকল গৰু ব্যৱসায়ীৰ ক্ষেত্ৰত প্ৰশাসনে যি ৰহস্যজনক ভূমিকা গ্ৰহণ কৰা ঘটনাই এতিয়া আচৰিত কৰি তুলিছে কৰিমগঞ্জৰ লগতে ৰাজ্যবাসীক ৷
