বকো,22 মাৰ্চ: অসম-মেঘালয় সীমান্তৱৰ্তী কামৰূপ (গ্ৰাম্য) জিলাৰ বকোৰ লাম্পিত সোমবাৰে উপস্থিত হয় 48 নং বকো বিধানসভা সমষ্টিৰ কংগ্ৰেছ দলৰ প্ৰাৰ্থী তথা বকো সমষ্টিৰ বিধায়িকা নন্দিতা দাসে । সমাগত বিধানসভা নিৰ্বাচনৰ বাবে সমষ্টিটোত প্ৰচাৰ চলায় বিধায়িকা গৰাকীয়ে ৷
লাম্পিত উপস্থিত হৈ অঞ্চলটোৰ ৰাইজৰ সৈতে মত বিনিময় কৰে নন্দিতা দাসে । মূলতঃ আন্তঃৰাজ্যিক সীমা সমস্যাৰ বাবে প্ৰায়ে সংবাদ মাধ্যমৰ শিৰোনামা দখল কৰা লাম্পিৰ ৰাইজে সীমা সমস্যা সমাধান কৰাৰ বাবে দাবী উত্থাপন কৰে । ইয়াৰোপৰি. লাম্পিত বাস কৰা ৰাইজৰ ভূমি পট্টা, আৰক্ষীৰ বাবে এখন গাড়ী, লাম্পিৰ ৰাইজৰ বাবে এখন এম্বুলেঞ্চৰ ব্যৱস্থা কৰাৰ বাবে দাবী উত্থাপন কৰে ।
উল্লেখ্য যে, বিগত বিধানসভা কাৰ্যকালত লাম্পিৰ ৰাইজৰ সকলো ধৰণৰ সমস্যাত মাত মাতি অহা বাবে লাম্পিৰ ৰাইজে নন্দিতা দাসক ধন্যবাদ জ্ঞাপন কৰে আৰু আগন্তুক নিৰ্বাচনত বিধায়কাগৰাকীয়ে ভোট দিয়াৰ প্ৰতিশ্ৰুতি দিয়ে ।
আনহাতে, কংগ্ৰেছ প্ৰাৰ্থী নন্দিতা দাসে বিগত বিধানসভা নিৰ্বাচনত লাম্পিৰ পৰা বহু কম ভোট লাভ কৰাৰ বাবে ৰাইজৰ আগত দুখ প্ৰকাশ কৰে ৷ লগতে প্ৰায় 1,500 ভোটাৰ থকা লাম্পিবাসীক সৰহকৈ ভোট প্ৰদান কৰিবলৈ আহ্বান জনায় ৷ এইবেলি নিৰ্বাচনত জয়ী হলে সীমা সমস্যাকে ধৰি ৰাইজৰ বিভিন্ন সমস্যাসমূহ সমাধান কৰাৰ বাবে প্ৰতিশ্ৰুতি দিয়ে প্ৰাৰ্থী গৰাকীয়ে ।
লগতে পঢ়ক : মন্ত্রী হিমন্ত বিশ্বক কমলাক্ষ দে পুৰকায়স্থৰ এয়া কিহৰ চেলেঞ্জ ?
