5 বজাৰ দহটা শীৰ্ষ বাতৰি

5 বজাৰ দহটা শীৰ্ষ বাতৰি

নিৰ্বাচনৰ প্ৰাকক্ষণত বিজেপিত মোক্ষম আঘাত কৰিছে ৰাজ্যিক মুখপাত্ৰ ফণী পাঠকে ৷ পাটাছাৰকুছি বিধানসভা সমষ্টিৰ পৰা বিজেপিৰ টিকট প্ৰত্যাশী ফণী পাঠকে দেওবাৰে পদত্যাগ কৰিছে ভাৰতীয় জনতা পাৰ্টীৰ পৰা ৷

দেওবাৰে পুৱাতেই বিহপুৰীয়া সমষ্টিৰ কংগ্ৰেছ দলৰ প্ৰাৰ্থী ভূপেন কুমাৰ বৰাৰ ভোগপুৰস্থিত বাসগৃহত যোগদান কাৰ্যসূচী সম্পন্ন হয় । যোগদান কৰা প্ৰতিজনকে কংগ্ৰেছ দলৰ প্ৰতীক সম্বলিত গ’লবস্ত্ৰৰে দললৈ উষ্ম আদৰণি জনায় ভূপেন বৰাই ।

ক্ৰমাৎ গৰম হৈ পৰিছে সৰুক্ষেত্ৰী সমষ্টিৰ ৰাজনৈতিক বতাহ ৷ দেওবাৰে গুৱাহাটীৰ পৰা কংগ্ৰেছৰ দলীয় টিকট লৈ জাকিৰ হুছেইন শিকদাৰ সৰুক্ষেত্ৰীত উপস্থিত হোৱাত সমষ্টিটোৰ কংগ্ৰেছ কৰ্মীসকলে বৃহৎ বাইক ৰেলীৰে শক্তি প্ৰদৰ্শন কৰে ৷ কংগ্ৰেছৰ নেতা, কৰ্মী আৰু সমৰ্থকসকলে বাইক ৰেলীৰে বিপুল আদৰণি জনায় প্ৰাৰ্থী গৰাকীক ৷

ভৱানীপুৰ বিধানসভা সমষ্টিত অসম গণ পৰিষদৰ প্ৰক্ষেপিত প্ৰাৰ্থী ৰঞ্জিত ডেকাই বাক্সাৰ সাউদৰ ভিঠা, হুদুখাটা, শালবাৰী, আওঁহাটাকে ধৰি প্ৰায় কেইবাখনো গাঁৱত নিৰ্বাচনী প্ৰচাৰ চলায় । গ্ৰামাঞ্চলৰ যুৱ সমাজৰ লগত মত বিনিময় কৰি নিৰ্বাচনৰ ৰণকৌশল সম্পর্কে আলোচনা কৰে ডেকাই ।

নিৰ্বাচনৰ আচৰণ বিধি বলৱৎ হৈ থকাৰ সময়তে হাইলাকান্দি আৰক্ষীয়ে জব্দ কৰে প্ৰায় ১.৫০ লাখ টকা । দেওবাৰে হাইলাকান্দিৰ লালা অঞ্চলত স্থানীয় আৰক্ষীৰ সহযোগত ফ্লায়িং স্কোৱাডে তালাচী চলাই থকাৰ সময়তে এখন চাৰিচকীয়া বাহনৰ পৰা জব্দ কৰে এই টকাখিনি ৷

বিধানসভা নিৰ্বাচনৰ প্ৰাকক্ষণত তৎপৰ পৰিছে ৰাজ্যৰ ৰাজনৈতিক দলসমূহ ।‌ ৰবিবাৰে বাক্সা জিলাৰ সদৰ মুছলপুৰতো ইউপিপিএল দলে উলিয়াই এক বিশাল বাইক ৰেলী ৷ সহস্ৰাধিক লোকে অংশগ্ৰহণ কৰে এই বাইক ৰেলীত ৷

অগপই দেওবাৰে প্ৰকাশ কৰিলে তৃতীয়খন প্ৰাৰ্থী তালিকা ৷ ১৩টা সমষ্টিৰ বাবে প্ৰাৰ্থীৰ নাম ঘোষণা কৰিলে অগপই ৷

পশ্চিম বংগৰ মুখ্যমন্ত্ৰী মমতা বেনাৰ্জীৰ ওপৰত হোৱা আক্ৰমণৰ অভিযোগ নস্যাৎ কৰিছে ভাৰতীয় নিৰ্বাচন আয়োগে ৷ মুখ্য সচিবৰ লগতে ৰাজ্যিক পৰ্যবেক্ষকৰ এক প্ৰতিবেদনৰ আধাৰত এই ৰায় প্ৰদান কৰিছে নিৰ্বাচন আয়োগে ৷

পঞ্জাৱৰ এটা পৰীক্ষা কেন্দ্ৰত ভাৰতীয় সেনাৰ বিষয়াসকলৰ নিযুক্তিত কেলেংকাৰীৰ ঘটনা পোহৰলৈ আহিছে । সমগ্ৰ বিষয়ৰ তদন্তৰ বাবে ভাৰতীয় সেনাই গোচৰটো চিবিআইক হস্তান্তৰ কৰিছে ।

ভাৰতীয় অসামৰিক বিমান মন্ত্ৰণালয়ৰ যুটীয়া সম্পাদক উষা পাধীয়ে কয় যে, ‘চাৰিটাকৈ সফল নিলামীৰ পিছত UDAN 4.1ৰ নিলামীৰ বাবে সেইসমূহ পথক বাচনি কৰা হৈছে যিসমূহ পূৰ্বতে UDANৰ অন্তৰ্ভূক্ত কৰা হোৱা নাছিল ৷ এই নিলামীৰ বাবে বাচনি কৰা পথসমূহৰ বাবে ৰাজ্য চৰকাৰ, কেন্দ্ৰীয় শাসিত অঞ্চলসমূহৰ প্ৰশাসন আৰু অন্যন্য বাতিল হোৱা পথসমূহে অনুৰোধ জনাইছিল ৷’