গুৱাহাটী, ১৫ মাৰ্চ: মুখ্যমন্ত্ৰী ড৹ হিমন্ত বিশ্ব শৰ্মাৰ দূৰদৰ্শী চিন্তাৰ আধাৰত ৰাজ্যৰ চৰকাৰে ৰাজ্যত চিকিৎসা শিক্ষা ক্ষেত্ৰখনৰ দ্ৰুত সম্প্ৰসাৰণেৰে ৰাইজৰ বাবে আধুনিক চিকিৎসা সেৱা অধিক সুলভ কৰিবলৈ অব্যাহত ৰখা প্ৰয়াসে আজি পুনৰ লাভ কৰিলে আন এক সফলতা । এই মন্তব্য স্বাস্থ্যমন্ত্রী কেশৱ মহন্তৰ । কোকৰাঝাৰ আৰু নগাঁও চিকিৎসা মহাবিদ্যালয়ৰ পাছত নৱনিৰ্মিত নলবাৰী চিকিৎসা মহাবিদ্যালয়কো চিকিৎসা বিজ্ঞানৰ স্নাতক পৰ্যায়ৰ পাঠদানৰ বাবে আনুষ্ঠানিক অনুমতি প্ৰদান কৰিছে ৰাষ্ট্ৰীয় চিকিৎসা আয়োগে (এন এম চি) ।
ৰাষ্ট্ৰীয় চিকিৎসা আয়োগৰ 'মেডিকেল এছেছমেণ্ট আৰু ৰেটিং বোৰ্ড'ৰ (এম এ আৰ বি) অধ্যক্ষই যোৱা নিশা নলবাৰী চিকিৎসা মহাবিদ্যালয়ৰ অধ্যক্ষলৈ এন এম চিৰ ফালৰ পৰা ইমেইল যোগে এখন পত্ৰ প্ৰেৰণ কৰি এই অনুমতিৰ বিষয়ে অৱগত কৰে । নতুন চিকিৎসা মহাবিদ্যালয়খনক ২০২৩-২৪ চিকিৎসা শিক্ষা বৰ্ষৰ পৰাই ১০০খন এম বি বি এছ আসনেৰে চিকিৎসা বিজ্ঞানৰ পাঠ্যক্ৰম মুকলি কৰিবলৈ অনুমতি প্ৰদানৰ বাবে দেশৰ চিকিৎসা শিক্ষা নিয়ামক সৰ্বোচ্চ কৰ্তৃপক্ষ এন এম চিয়ে সিদ্ধান্ত লোৱাৰ বিষয়ে পত্ৰখনত উল্লেখ কৰা হৈছে (National Medical Commission ) ।
নলবাৰী চিকিৎসা মহাবিদ্যালয়েও এন এম চিৰ অনুমোদন লাভ কৰাৰ সূত্ৰে অসমত চিকিৎসা মহাবিদ্যালয়ৰ সংখ্যা বাৰখনলৈ বৃদ্ধি ঘটাৰ (Medical colleges in Assam) লগতে চলিত বৰ্ষত ৰাজ্যৰ তিনিখনকৈ নতুন চিকিৎসা মহাবিদ্যালয়ে ৰাষ্ট্ৰীয় চিকিৎসা আয়োগৰ পৰা অনুমতি লাভ কৰিবলৈ সক্ষম হ'ল । ইয়াৰ লগে লগে ৰাজ্যখনত চিকিৎসা বিজ্ঞানৰ স্নাতক পৰ্যায়ৰ পাঠ্যক্ৰম (এম বি বি এছ)ত উপলব্ধ আসনৰ মুঠ সংখ্যা ১৫০০ খনলৈ বৃদ্ধি পালে ।
উল্লেখ্য যে এন এম চিৰ বিশেষজ্ঞ দলে ২৭ ফেব্ৰুৱাৰীত নলবাৰী চিকিৎসা মহাবিদ্যালয় আকস্মিক পৰিদৰ্শন কৰি নৱনিৰ্মিত চিকিৎসা মহাবিদ্যালয়খনৰ আন্তঃগাথঁনিকে ধৰি চিকিৎসা বিজ্ঞানৰ পাঠ্যক্ৰম মুকলিৰ বাবে প্ৰয়োজনীয় বিভিন্ন সা-সুবিধা বিষয়ক এন এম চিৰ নিৰ্ধাৰিত চৰ্তাৱলী পূৰণ হৈছে নে নাই, সেয়া চৰজমিন পৰীক্ষা কৰে (new medical colleges in Assam) । বিশেষজ্ঞ দলটোৱে পৰিদৰ্শনৰ অন্তত এন এম চিৰ 'মেডিকেল এছেছমেণ্ট এণ্ড ৰেটিং বোৰ্ড'ৰ ওচৰত দাখিল কৰা প্ৰতিবেদন পৰ্যালোচনা কৰি এম এ আৰ বিয়ে নলবাৰী চিকিৎসা মহাবিদ্যালয়খনৰ আন্তঃগাথঁনিকে বিভিন্ন দিশত সন্তুষ্ট হৈ অনুমোদনৰ সিদ্ধান্ত গ্ৰহণ কৰা বুলি আয়োগৰ ফালৰ পৰা প্ৰেৰণ কৰা পত্ৰখনত প্ৰকাশ কৰিছে ।
ৰাজ্যৰ এই দ্বাদশখন চিকিৎসা মহাবিদ্যালয়েও শ্ৰীমন্ত শঙ্কৰদেৱ স্বাস্থ্য বিজ্ঞান বিশ্ববিদ্যালয়ৰ অধীনত এম বি বি এছ পাঠ্যক্ৰম পৰিচালনা কৰিব । ইফালে কোকৰাঝাৰ আৰু নগাঁৱৰ পাছত নলবাৰী চিকিৎসা মহাবিদ্যালয়লৈও এন এম চিৰ অনুমোদনক আদৰণি জনাইছে ৰাজ্যৰ স্বাস্থ্য-পৰিয়াল কল্যাণ আৰু চিকিৎসা শিক্ষা তথা গৱেষণা বিভাগৰ মন্ত্ৰী কেশৱ মহন্তই । এন এম চিৰ এই সিদ্ধান্তত আনন্দ প্ৰকাশ কৰি স্বাস্থ্যমন্ত্ৰীগৰাকীয়ে নলবাৰীবাসীৰ লগতে ৰাজ্যবাসী আৰু নতুন চিকিৎসা মহাবিদ্যালয়খনৰ অধ্যক্ষ, বিভাগীয় মূৰব্বী তথা অধ্যাপক-অধ্যাপিকা, জ্যেষ্ঠ আৱাসিক চিকিৎসকে ধৰি মহাবিদ্যালয় পৰিয়ালৰ সকলো সদস্যকে অভিনন্দন জনায় । এইক্ষেত্ৰত মুখ্যমন্ত্ৰী ড০ হিমন্ত বিশ্ব শৰ্মাৰ ভূমিকাৰ বিশেষ ভাৱে শলাগ লৈ স্বাস্থ্যমন্তৰীগৰাকীয়ে কয় যে মুখ্যমন্ত্ৰী ড০ হিমন্ত বিশ্ব শৰ্মাৰ বলিষ্ঠ নেতৃত্ব, দূৰদৰ্শী পৰিকল্পনা আৰু বিশেষ উদগনিৰ বাবেই ৰাজ্যৰ এই দ্বাদশখন চিকিৎসা মহাবিদ্যালয়েও চলিত বৰ্ষৰ পৰাই পাঠ্যক্ৰম মুকলিৰ অনুমতি লাভ কৰিবলৈ সক্ষম হ'ল ।
ৰাজ্যবাসীৰ বাবে আগন্তুক দিনত অত্যাধুনিক তথা সুলভ চিকিৎসা সেৱা সুনিশ্চিত কৰিবলৈ মুখ্যমন্ত্ৰী ড০ শৰ্মাই লোৱা দূৰদৰ্শী সিদ্ধান্তৰ বাবেই ৰাজ্যৰ জিলাই জিলাই চিকিৎসা মহাবিদ্যালয় নিৰ্মাণৰ দিশত চৰকাৰ আগবাঢ়িছে । ২০২৬ চনৰ ভিতৰত ৰাজ্যখনত ২৪খন চিকিৎসা মহাবিদ্যালয় নিৰ্মাণৰ বাবে ইতিমধ্যে ব্যৱস্থা কৰা হৈছে (total number of medical college in assam) । ইয়াৰ অংশ হিচাপে চলিত বৰ্ষত ইতিমধ্যে কোকৰাঝাৰ আৰু নগাঁও চিকিৎসা মহাবিদ্যালয়ে অনুমতি লাভ কৰাৰ পাছত এতিয়া নলবাৰী চিকিৎসা মহাবিদ্যালয়েও ৰাজ্যৰ দ্বাদশখন চিকিৎসা মহাবিদ্যালয় ৰূপে এই বছৰৰ পৰাই পাঠ্যক্ৰম মুকলিৰ অনুমতি পাবলৈ সক্ষম হোৱাটো আমাৰ সকলোৰে বাবেই অতি গৌৰৱৰ বিষয় বুলি মন্ত্রীগৰাকীয়ে সদৰি কৰে । ইফালে মুখ্যমন্ত্রী হিমন্ত বিশ্ব শৰ্মায়ো এই বিষয়ে সামাজিক মাধ্যমত উল্লেখ কৰি প্ৰতিক্ৰিয়া ব্যক্ত কৰিছে ।
লগতে পঢ়ক : Nari Sanman Awards: গুৱাহাটীত নাৰী সন্মান বঁটা প্ৰদান অনুষ্ঠান
