গুৱাহাটী, 18 জানুৱাৰীঃ তাৰিখ বা চনৰ ভিত্তিত নহয় অসমৰ খিলঞ্জীয়া জনগোষ্ঠীসমূহৰ চিনাক্তকৰণ কৰি সাংবিধানিক ৰক্ষাকৱচৰ ভিতৰত অন্তৰ্ভুক্ত কৰাৰ দাবী সদৌ অসম গৰিয়া-মৰিয়া-দেশী জাতীয় পৰিষদৰ। শনিবাৰে গুৱাহাটীত এক সংবাদমেল সম্বোধন কৰি সদৌ অসম গৰিয়া-মৰিয়া-দেশী জাতীয় পৰিষদৰ সাধাৰণ সম্পাদক আজিজুৰ ৰহমানে এই কথা উল্লেখ কৰে ৷ কেন্দ্রীয় চৰকাৰে অসম চুক্তিৰ ৬ নং দফা কাৰ্যকৰী কৰাৰ বাবে গঠন কৰি দিয়া উচ্চপৰ্যায়ৰ ১৪ জনীয়া সমিতিখনক এই কথা দাবী কৰে সংগঠনটোৱে ৷ আনহাতে আজিজুৰ ৰহমানে ১৯৫১ চনৰ ভিত্তি বৰ্ষৰ আধাৰত খিলঞ্জীয়াৰ সংজ্ঞা ৰূপায়ণ কৰিলে বহু পূৰ্ব বংগীয় লোক খিলঞ্জীয়াৰ স্বীকৃতি লাভ কৰিব বুলিও মন্তব্য প্ৰকাশ কৰে ৷
ৰহমানে লগতে উল্লেখ কৰে যে ইয়াণ্ডাবু সন্ধিৰ পূৰ্বৰ অসমৰ বিভিন্ন জনগোষ্ঠীৰ লোকসকলক চিনাক্ত কৰি তেওঁলোকক সাংবিধানিক ৰক্ষাকৱচৰ অন্তৰ্ভুক্ত কৰিব লাগে।ইয়াৰোপৰি সাধাৰণ সম্পাদকগৰাকীয়ে অসমৰ গৰিয়া-মৰিয়া-দেশী আৰু খিলঞ্জীয়া মুছলমান লোকসকলৰ চিনাক্তকৰণৰ বাবে চৰকাৰে অতি শীঘ্ৰে এক সুকীয়া জৰীপ আৰম্ভ কৰিব লাগে বুলিও মন্তব্য প্ৰদান কৰে।
আৰু পঢ়কঃটিংখাঙত নামঘৰ প্ৰাংগনৰ পৰা ভকত বৈষ্ণৱৰ "CAA" বিৰোধী প্ৰতিবাদ
