গুৱাহাটী,29 মে' : বিশ্ব বিনিয়োগ সন্মিলনৰ পিছত ৰাজ্যত বৰ্তমানলৈকে বিনিয়োগ হৈছে 57,437 কোটি টকা। তদুপৰি ইতিমধ্যে প্ৰায় 15,925 কোটি টকাৰ বিনিয়োগৰ প্ৰস্তাৱ বিভিন্ন পৰ্যায়ত আছে। জনতা ভৱনত অনুষ্ঠিত এক পৰ্যালোচনা বৈঠকত এই তথ্য দাঙি ধৰে মুখ্যমন্ত্ৰী সৰ্বানন্দ সোণোৱালে।
বৈঠকত উপস্থিত থাকি উদ্যোগ আৰু বাণিজ্য বিভাগৰ মন্ত্ৰী চন্দ্ৰমোহন পাটোৱাৰীয়ে কয় যে, অসমত বৰ্তমান পতঞ্জলী,ডাবৰ,ইমামি, হিন্দুস্তান ইউনিলিভাৰ,আই টি চি,ব্ৰিটেনিয়া আদিয়ে বাণিজ্যিক উৎপাদন আৰম্ভ কৰিছে। একেদৰে ঔষধ উৎপাদনৰ ক্ষেত্ৰত ৰাজ্যত কাম আৰম্ভ কৰিছে বহুকেইটা কোম্পানীয়ে।
বৈঠকত উপস্থিত থাকি "ইজ টু ডুইং বিজনেছ" উত্তৰণৰ বাবে উদ্যোগ আৰু বাণিজ্য বিভাগক বিশেষ কৰ্ম আঁচনি হাতত ল'বলৈও নিৰ্দেশ দিয়ে মুখ্যমন্ত্ৰী সৰ্বানন্দ সোণোৱালে। ইয়াৰ লগতে অসমত "নেচনেল বেম্ব' মিছন" ৰূপায়ণৰ অগ্ৰগতিৰো বুজ লয় মুখ্যমন্ত্ৰী গৰাকীয়ে ৷
