গুৱাহাটী, ২ জুন : বিদ্যুৎ চুৰিৰ বিৰুদ্ধে ৰাজ্যৰ সকলো থানাতেই গোচৰ ৰুজু হ'ব আৰু আন চুৰিৰ গোচৰৰ দৰেই তদন্ত কৰা হ'ব । এই মন্তব্য অসম আৰক্ষীৰ সঞ্চালক প্ৰধান(DGP) ভাস্কৰজ্যোতি মহন্তৰ । শুকুৰবাৰে, আৰক্ষী সঞ্চালক প্ৰধানৰ গুৱাহাটীৰ উলুবাৰীস্থ মুখ্য কাৰ্যালয়(DGP head office)ত আয়োজন কৰা এখন সংবাদমেলত এই কথা সদৰি কৰে সঞ্চালক প্ৰধান গৰাকীয়ে । আৰক্ষী সঞ্চালক প্ৰধান মহন্তৰ লগতে যৌথভাৱে সংবাদমেলখন সম্বোধন কৰে গৃহ-শক্তি আদি বিভাগৰ প্ৰধান সচিব নিৰজ বাৰ্মা আৰু এপিডিচিএল(APDCL)ৰ পৰিচালন সঞ্চালক ৰাকেশ কুমাৰে ।
সংবাদমেলত গৃহ-শক্তি আদি বিভাগৰ প্ৰধান সচিব নিৰজ বাৰ্মাই কয় ' এপিডিচিএলে অনাদায় বিদ্যুৎ মাছুল আৰু বিদ্যুৎ চুৰিৰ বিৰুদ্ধে আৰম্ভ কৰা অভিযানৰ ফলস্বৰূপে জুন মাহত বিভাগে অভিলেখ সংখ্যক ৫০১ কোটি টকা মাছুল সংগ্ৰহ কৰিবলৈ সক্ষম হৈছে । যিটো মে' মাহত আছিল ৩৬০ কোটি টকা । উপভোক্তাৰ প্ৰতি আহ্বান যে সময়মতে বিল পৰিশোধ কৰিলে বিদ্যুৎ যোগান আৰু অধিক সুচল হ'ব । '
সংবাদমেলত এপিডিচিএলৰ পৰিচালন সঞ্চালক ৰাকেশ কুমাৰে(APDCL MD Rakesh Kumar) কয় যে, জুন মাহত এপিডিচিএলে ১,৯০৪ টা ৰেড(raid) কৰিছিল আৰু ইয়াৰ ভিতৰত বিদ্যুতৰ অবৈধ ব্যৱহাৰ(illegal use of electricity ) সন্দৰ্ভত ৬১১ খন এজাহাৰ(FIR)ৰ ভিত্তিত গোচৰ ৰুজু হৈছে ।
জুন আমি সৰ্বাধিক ৫০১ কোটি টকা বিদ্যুৎ মাছুল লাভ কৰিবলৈ সক্ষম হৈছো । আনহাতে জুন মাহত চলোৱা অভিযানত আমি ৪৫.৯৪ কোটি টকা জৰিমনা আদায় কৰিবলৈ সক্ষম হৈছো । তদুপৰি বিদ্যুৎ মাছুল নিদিয়া বাবে ১ লাখ ১১ হাজাৰ সংযোগ বিচ্ছিন্ন কৰা হৈছে । ইয়াৰ ভিতৰত ২৭ কোটি টকা ফাইন সংগ্ৰহ কৰি ৪৮,১৭২ টা সংযোগ পুনৰ কৰা হৈছে । এতিয়াও আমি গ্ৰাহকৰ পৰা বিদ্যুৎ মাছুলৰ বাবদ ২০০০ কোটি টকা পাবলৈ বাকী আছে ।
লগতে পঢ়ক : APSC-ৰ মৌখিক পৰীক্ষাৰ বিতং তথ্য বিচাৰিছে ন্যায়াধীশ শৰ্মা আয়োগে
