গুৱাহাটী,১ অক্টোবৰ: নিৰ্বাচনৰ দিন চমু চাপি আহিলে দল বাগৰাৰ ৰাজনীতি আৰম্ভ হোৱাটো নতুন কথা নহয় ৷ বিগত সময়ত অসমৰ ৰাজনীতিত তাৰ স্পষ্ট আভাস পোৱা গৈছে ৷ অৱশ্যে কেৱল নিৰ্বাচনেই নহয় সাধাৰণ সময়তো ৰাজনৈতিক ক্ষেত্রখনত দল সলনি কৰাৰ প্ৰক্ৰিয়া চলি থাকে ৷ বৰ্তমান লোকসভা নিৰ্বাচনৰ দিন চমু চাপি অহাৰ লগে লগে ৰাজ্যৰ ৰাজনীতিত এই বিষয়টো বিশেষভাৱে চৰ্চিত হৈ পৰিছে ৷
বিশেষকৈ কংগ্ৰেছ দলৰ যোগদান কাৰ্যসূচীক লৈ ৰাজ্যৰ ৰাজনীতিত বিশেষ চৰ্চা চলিছে ৷ প্ৰদেশ কংগ্ৰেছে সদৰী কৰা মতে ১১ অক্টোবৰ আৰু নৱেম্বৰৰ শেষৰ ফালে কংগ্ৰেছ দলৰ নীতি-আদৰ্শৰ প্ৰতি আকৰ্ষিত হৈ একাংশ ৰাজনৈতিক নেতাই দলটোত যোগদান কৰিবৰ বাবে প্ৰস্তুতি চলাইছে আৰু এই লৈ বিভিন্ন ধৰণৰ আলোচনা অব্যাহত আছে ৷ বিশেষকৈ আঞ্চলিক দলৰ নেতাই যোগদান কৰাৰ বিষয়টো চৰ্চালৈ অহাৰ লগে লগে সকলোৰে দৃষ্টি নিক্ষেপ হৈছে ৰাজ্যৰ প্ৰধান আঞ্চলিক দল অগপৰ প্ৰতি ৷ ইতিমধ্যে অগপৰ চাৰিগৰাকীকৈ জ্যেষ্ঠ নেতাই কংগ্ৰেছত যোগদান কৰাৰ বাবে প্ৰস্তুতি চলোৱা বুলি জানিব পৰা গৈছে ৷
ৰাজনৈতিক মহলতো তেওঁলোকৰ নাম চৰ্চিত হৈছে ৷ লক্ষণীয় বিষয় যে ৰাষ্ট্ৰীয় দল বিজেপিৰে মিত্রতা কৰি অস্তিত্বহীন হৈ পৰা অগপত পুনৰ বৃহৎ খহনীয়া হোৱাৰ সম্ভাৱনা প্ৰকট হৈ পৰিছে ৷ উল্লেখ্য যে দুবাৰকৈ শাসনলৈ অহা অগপ দলটো আজি মিত্রতাৰ বান্ধোনত বান্ধ খাই বিজেপিৰ গ্ৰাসত সোমাই পৰিছে ৷ দলটোৰ কেইজনমান নেতাই নিজৰ স্বাৰ্থৰ বাবে দলটোক ব্যৱহাৰ কৰি অহাৰ পৰিপ্ৰেক্ষিতত বহু জ্যেষ্ঠ নেতা বৰ্তমান ক্ষোভিত হৈ পৰিছে ৷ দলটোৰ জন্মলগ্নৰে পৰা জড়িত হৈ থকা বহু নেতাই আজি দলটোত অস্তিত্বহীন হৈ পৰিছে ৷ যাৰ বাবে একাংশই কংগ্ৰেছ দললৈ যোৱাৰ বাবে মন মেলিছে ৷
প্ৰদেশ কংগ্ৰেছৰ এক বিশেষ সূত্রই জনোৱা মতে অগপৰ প্ৰাক্তন সাংসদ কুমাৰ দীপক দাস, প্ৰাক্তন বিধায়ক সত্যব্ৰত কলিতা, ডাঃ কমলা কলিতা আৰু উৎপল দত্তই কংগ্ৰেছত যোগদান কৰাৰ বাবে ইতিমধ্যে যোগাযোগ কৰিছে ৷ বৰ্তমান সময়ত অগপৰ এই চাৰিগৰাকী নেতাই কংগ্ৰেছত যোগদান কৰাটো প্ৰায় নিশ্চিত হৈ পৰিছে ৷
ইফালে এই সন্দৰ্ভত ৰাজীৱ ভৱনত সংবাদমেল সম্বোধন কৰি প্ৰদেশ কংগ্ৰেছৰ উপ-সভাপতি তথা প্ৰাক্তন সাংসদ দ্বীজেন শৰ্মাই সাংবাদিকৰ প্ৰশ্নৰ উত্তৰত কয় যে অগপ আৰু বিজেপিৰ বহু ডাঙৰ নেতাই কংগ্ৰেছত যোগদান কৰিব ৷ অৱশ্যে তেওঁ কাৰো নাম উল্লেখ নকৰিলেও অগপৰ এই চাৰিগৰাকী জ্যেষ্ঠ নেতাই যে কংগ্ৰেছত যোগদান কৰিব সেয়া প্ৰায় নিশ্চিত হৈ পৰিছে ৷
সাংবাদিকৰ প্ৰশ্নৰ উত্তৰত প্ৰাক্তন সাংসদ দ্বিজেন শৰ্মাই কয় যে বহু নাম আহিছে যদিও আজি কাৰো নাম উল্লেখ নকৰো ৷ সাংবাদিকে উল্লেখ কৰা নামো থাকিব পাৰে বুলি তেওঁ লগতে কয় ৷ বিজেপিৰ প্ৰাক্তন সাংসদেও কংগ্ৰেছত যোগদান কৰিব বুলি সদৰী কৰি তেওঁ কয় যে কংগ্ৰেছৰ পৰা আঁতৰি যোৱা বহু নেতা পুনৰ ঘূৰি আহিব ৷ টিকট দিয়াৰ কোনো চৰ্ত ৰাখি কোনো নেতাকে যোগদান কৰিবলৈ দিয়া নহ'ব বুলি তেওঁ স্পষ্ট কৰি দিয়ে ৷
লক্ষণীয় বিষয় যে অগপৰ চাৰিগৰাকী জ্যেষ্ঠ তথা শীৰ্ষস্থানীয় নেতা ক্ৰমে কুমাৰ দীপক দাস, ডাঃ কমলা কলিতা, সত্যব্ৰত কলিতা আৰু উৎপল দত্তই কংগ্ৰেছত যোগদান কৰিলে অগপ দলত ব্যাপক প্ৰভাৱ পৰাটো নিশ্চিত ৷
লগতে পঢ়ক : Ripun Bora vs Bhabesh Kalita: ৰিপুন বৰাক পঢ়া শুনা কৰিবলৈ আহ্বান বিজেপি সভাপতি ভৱেশ কলিতাৰ
