অসম মন্ত্ৰীসভাৰ বৈঠকত কেইবাটাও গুৰুত্বপূৰ্ণ সিদ্ধান্ত গ্ৰহণ

শনিবাৰে অসম মন্ত্ৰীসভাৰ এখন বৈঠক অনুষ্ঠিত হয় ৷ বৈঠকৰ পিচত এখন সংবাদমেলযোগে মন্ত্ৰী ড৹ হিমন্ত বিশ্ব শৰ্মাই বৈঠকত আলোচিত কেতবোৰ সিদ্ধান্তৰ বিষয়ে অৱগত কৰে ৷

গুৱাহাটী, 21 ডিচেম্বৰ: শনিবাৰে অসম মন্ত্ৰীসভাৰ এখন বৈঠক অনুষ্ঠিত হয় ৷ বৈঠকৰ পিচত এখন সংবাদমেলযোগে মন্ত্ৰী ড৹ হিমন্ত বিশ্ব শৰ্মাই বৈঠকত আলোচিত কেতবোৰ সিদ্ধান্তৰ বিষয়ে অৱগত কৰে ৷

বৈঠকত সংবিধানৰ 345 ধাৰাৰ সংশোধন কৰি অসমত অসমীয়াক ৰাজ্যিক ভাষা হিচাপে সাংবিধানিক অধিকাৰ প্ৰদানৰ বাবে কেন্দ্ৰীয় চৰকাৰক অনুৰোধ জনায় ৷ অৱশ্যে বৰাক উপত্যকা, বড়োলেণ্ড শাসিত অঞ্চল আৰু পাৰ্বত্য জিলা দুখনৰ বাবে সহযোগী ৰাজ্যিক ভাষা হিচাপে বড়ো, বঙালী, কাৰ্বি, ডিমাচা আদি ভাষাক সন্নিবিষ্ট কৰিব লাগে বুলি কেবিনেটে মত প্ৰকাশ কৰে ৷ মৰাণ আৰু মটক স্বায়ত্ব পৰিষদ গঠন হ'ব বুলিও জনায় মন্ত্ৰী শৰ্মাই।

গোলাঘাট জিলাত সতী-সাধনী ৰাজ্যিক বিশ্ববিদ্যালয় নিৰ্মাণৰ কথা উল্লেখ কৰে মন্ত্ৰীগৰাকীয়ে । বজালী মহকুমাক অসমৰ নৱতম জিলা হিচাপে সংযোজন কৰাৰ সিদ্ধান্ত লয় কেবিনেটে ৷ অসমৰ সমগ্ৰ বিশ্ববিদ্যালয়তে টাই-আহোম, কোচ-ৰাজবংশী আৰু চুতীয়া সম্প্ৰদায়ৰ বাবে আসন সংৰক্ষণ কৰাৰ কথা সংবাদ মেলত প্ৰকাশ কৰে হিমন্ত বিশ্ব শৰ্মাই ৷

চাহ বাগান অঞ্চলত 100 দিনৰ ভিতৰত 100খন বিদ্যালয় স্থাপনৰ সিদ্ধান্ত গ্ৰহণ কৰা হৈছে কেবিনেটত ৷ খিলঞ্জীয়াৰ বাবে ভূমি অধিকাৰ সুনিশ্চত কৰি এখন আইন গ্ৰহণ কৰা হ'ব বুলিও সংবাদমেলত প্ৰকাশ কৰা হৈছে ৷ সত্ৰৰ মাটি কিনা-বেচা বা দখল কৰা লোকক দোষী হিচাপে গণ্য কৰা হ'ব জানিবলৈ দিছে মন্ত্ৰীগৰাকীয়ে ৷ পুৰণি শিৱসাগৰ জিলাত এখন মেডিকেল কলেজ নিৰ্মাণ কৰাৰ কথাও ঘোষণা কৰিছে হিমন্ত বিশ্ব শৰ্মাই ৷

লগতে পঢ়ক: হৰি নামৰ ধ্বনিৰে তেজপুৰত কা বিৰোধী সমদল