যোৰহাট,১৪ জুনঃ যোৰহাট বিমান বন্দৰত কৰ্মৰত চুপাৰ ভাইজাৰৰ অপহৰণ কাণ্ডই লৈছে নতুন মোৰ ৷ বিমানবন্দৰৰ সঞ্চালক কৃষন কুমাৰৰ বিৰুদ্ধে মানহানিৰ লগতে পৰিকল্পিত ষড়যন্ত্ৰৰ অভিযোগ উত্থাপিত কৰিছে ৰঞ্জীতা বৰা নামৰ মহিলা গৰাকীয়ে । লগতে যোৰহাট ৰৰৈয়া বিমানবন্দৰ সঞ্চালক কৃষন কুমাৰৰ বিৰুদ্ধে তীব্ৰ প্ৰতিবাদমুখী হৈ উঠিছে যোৰহাটবাসী ৰাইজ। অভিযোগ অনুসৰি,যোৰহাটৰ ৰৰৈয়া বিমানবন্দৰৰ ঠিকাৰ ধনৰ বাবেই অসমীয়া বিৰোধী বিষয়া তথা সঞ্চালক কৃষন কুমাৰে পৰিকল্পিত ভাৱে মহম্মদ ডানিছ নামৰ লোকজনক অপহৰণৰ নাটক ৰচনা কৰিছিল ৷ উল্লেখযোগ্য যে মহম্মদ ডানিছ নামৰ লোকজনে নিজকে অপহৰণ কৰাৰ নাটক কৰি ফোন যোগে জনাই মহম্মদ ইব্ৰাহীমক । এই ঘটনা জানিব পাৰি যোৰহাট আৰক্ষীয়ে তৎকালীন ভাৱে তদন্ত কৰে ৷ প্ৰথম অৱস্থাত ৰৰৈয়া বিমানবন্দৰৰ সঞ্চালক কৃষন কুমাৰে এই অপহৰণত স্থানীয় ঠিকাদাৰ পোনা গগৈ আৰু পিংকু গগৈ জড়িত থকাৰ কথা ব্যক্ত কৰিছিল।
সেই দিনাই ৰৰৈয়া আৰক্ষীয়ে নিশা ভাগতে দুয়োকে সোধ-পোচ কৰে ৷ ইফালে অপহৰণৰ নাটক কৰা যুৱক ডিনিছে অহৰহ নিজৰ মালিক তথা মহম্মদ ইব্ৰাহীমৰ সৈতে ফোন যোগেদি সম্পৰ্ক যোগাযোগ ৰক্ষাত আৰক্ষীৰ সন্দেহ হৈ ডানিছৰ সন্ধানত নামি পৰে ।অৱশেষত ফোন ট্ৰেপিঙত গোলাঘাট জিলাৰ ফৰকাটিং ৰে'ল ষ্টেচন পৰা ডিমাপুৰ দিশে যাত্ৰা কৰোতে ডানিছক গ্ৰেপ্তাৰ কৰিবলৈ সক্ষম হয় আৰক্ষীয়ে। আনহাতে ৰঞ্জীতা বৰা নামৰ মহিলা গৰাকীয়ে নিজৰ স্বামী আৰু পুত্ৰৰ ওপৰত ভুৱা অপহৰণৰ নাটক ৰচনা কৰি জনমানসত হেয় প্ৰতিপন্ন কৰিব বিচৰা তিনিওগৰাকী ব্যক্তিৰ বিৰুদ্ধে যোৰহাট সদৰ আৰক্ষী চকীত এজাহাৰ দাখিল কৰিছিল ৷ ইতিমধ্যে আৰক্ষীয়ে এজাহাৰ ভিত্তিত ১৩৫১/১৯/IPC:120B/203/403/430/153(section A)ত মহম্মদ ডানিছক গ্ৰেপ্তাৰ কৰিছিল আৰু ইতিমধ্যে ডানিছ যোৰহাট আৰক্ষীৰ জিম্মাত ।
আনহাতেদি বিমানবন্দৰৰ সঞ্চালক আৰু ঠিকাদাৰ মহম্মদ ইব্ৰাহীমো অতিশ্ৰীঘে গ্ৰেপ্তাৰ হোৱাৰ সম্ভাৱনা আছিল যদিও বিগত ২ জুনৰ পৰা আৰক্ষীয়ে ঘটনা সম্পৰ্কত নীৰৱ ভূমিকা গ্ৰহণ কৰাৰ পৰিপেক্ষিতত শুকুৰবাৰে বৃহত্তৰ অঞ্চলৰ ৰাইজে যোৰহাট ৰৰৈয়া বিমান বন্দৰৰ প্ৰৱেশ দ্বাৰৰ সন্মুখত এঘন্টীয়া প্ৰতিবাদী কাৰ্যসূচী গ্ৰহণ কৰে ।
