গোলাঘাট,28 মাৰ্চঃলোকসভা নিৰ্বাচনৰ দিন চমু চাপি অহাৰ লগে লগে বৃদ্ধি পাইছে নিৰ্বাচনী প্ৰচাৰৰ কাৰ্য্যসূচী ৷ বৃহস্পতিবাৰে ধনশিৰি মহকুমাৰ অসম নাগালেণ্ড সীমান্তৰ উৰিয়ামঘাট কৰৈঘাট গাঁও পঞ্চায়তৰ অন্তৰ্গত ফুলবাৰী গাঁৱৰ সমূহীয়া ভৱনত চলিল কলিয়াবৰ লোকসভা সমষ্টিৰ সাংসদ গৌৰৱ গগৈৰ নিৰ্বাচনী প্ৰচাৰ ৷ নিৰ্বাচনী সভাত তেওঁ মন্তব্য কৰে যে যদি পুনৰ কেন্দ্ৰত বিজেপি চৰকাৰ শাসনলৈ আহে তেতিয়া অসম বাংলাদেশীৰে ভৰি পৰিব ৷ আনকি হাস্পতাল, শিক্ষানুষ্ঠান আৰু চাকৰিৰ ক্ষেত্ৰবোৰো বাংলাদেশীয়ে ভৰি পৰিব বুলি মন্তব্য কৰে গৌৰৱ গগৈয়ে । লগতে তেওঁ বিজেপিক কটু সমোলোচনা বুলি কয় যে, বিজেপিয়ে যি পৰিৱৰ্তনৰ শ্লোগান আওৰাইকেন্দ্ৰ আৰু ৰাজ্যত চৰকাৰ গঠন কৰিলে বিপৰীতে একোৱেই পৰিৱৰ্তন কৰিব নোৱাৰিলে ৷ বিপৰীতে ৰন্ধন গেছৰ দাম কংগ্ৰেছৰ দিনত ৩০০ টকা আছিল বৰ্তমান বিজেপিৰ দিনত ১০০০ টকা হৈছেগৈ । গৰাখহনীয়া আৰু বানপানীৰ ক্ষেত্ৰতো বিজেপি চৰকাৰে কোনো গুৰুত্ব নিদিয়াৰো অভিযোগ উত্থাপন কৰেসাংসদ গৰাকীয়ে । সেয়েহে ৰাইজৰ প্ৰকৃতসেৱাৰ বাবে আগন্তুক লোকসভা নিৰ্বাচনত কংগ্ৰেছক ভোট দি জয়যুক্ত কৰিবলৈ ৰাইজক আহ্বান সাংসদ গৌৰৱ গগৈয়ে ৷
ইয়াৰ উপৰিও আগন্তুক লোকসভা নিৰ্বাচনত কলিয়াবৰ লোকসভা সমষ্টিৰ প্ৰতিদ্বন্দীৰসন্দৰ্ভত তেওঁ কয় যে অগপ, বিজেপি, একাংশ নিউজ চেনেল আৰু ডাঙৰ ডাঙৰ ব্যৱসায়ী তেওঁৰ প্ৰতিদ্বন্দী হিচাপে আছে ৷ লগতে তেওঁ মন্তব্য কৰে যে তথাপিও আগন্তুক লোকসভা নিৰ্বাচনত কলিয়াবৰ লোকসভা সমষ্টিৰ পৰা তেওঁৱেই সাংসদ হিচাপে জয়ী হ'ব,কাৰণ ৰাইজ তেওঁৰ লগতআছে ৷
উল্লেখ্য যে এই নিৰ্বাচনী প্ৰচাৰকলৈ উত্থাপন হৈছে এক গুৰুত্বপুৰ্ণ অভিযোগ ৷ গৌৰৱ গগৈয়ে নিৰ্বাচনী প্ৰচাৰ চলোৱাৰ ফলত ফুলবাৰী গাঁৱৰ সমূহীয়া ভৱনৰ কাষতে থকা ফুলবাৰী প্ৰাথমিক বিদ্যালয়ত চলি আছিল পাঠদান কাৰ্যসূচী । এইক্ষেত্ৰত বিদ্যালয়ৰ পাঠদানত ব্যাঘাত জন্মাত প্ৰচাৰ কাৰ্যক তীব্ৰ সমালোচনা কৰে প্ৰধান শিক্ষক গৰাকীয়ে । কিন্তু এই সন্দৰ্ভত গৌৰৱ গগৈয়ে কয় যে বিদ্যালয়খনৰ জিৰণিৰ সময়ৰ প্ৰতি লক্ষ্য ৰাখি সভাখন অনুষ্ঠিত কৰি সময় মতেই শেষ কৰা হৈছিল ৷
