মৰাণ, 27 ছেপ্টেম্বৰ : দৰিদ্ৰ জনলৈ দিয়া সূলভ মূল্যৰ চাউল বিতৰণত কোনো এজেন্টে দুৰ্নীতি কৰিব নোৱাৰিব বুলি খোদ মুখ্যমন্ত্ৰী ড° হিমন্ত বিশ্ব শৰ্মাই ঘোষণা কৰাৰ পাছতো ডিব্ৰুগড় জিলাৰ নাহৰকটীয়াত সুলভ মূল্যত চাউলৰ এজেন্টে দুৰ্নীতি কৰাৰ অভিযোগ উত্থাপন কৰিছে ৰাইজে । নাহৰকটীয়াৰ টিপাম ফাকিয়াল গাঁও পঞ্চায়তৰ অন্তৰ্গত টিপলিং ফাকিয়াল সমবায় সমিতিৰ অধীনত থকা দিহিং কিনাৰ বাঙালী ব্লক গাঁৱৰ সুলভ মূল্যৰ দোকানৰ এজেন্ট কৰুণা দাসৰ বিৰুদ্ধে ৰাইজৰ ক্ষোভ ।
অভিযোগ অনুসৰি, এজেন্ট কৰুনা দাসে চাউল, তেল বিতৰণত অনিয়ম সংঘটিত কৰি আত্মসাৎ কৰি আহিছে আৰু গাঁৱৰ ৰাইজৰ লগত দুৰ্ব্যৱহাৰ কৰি সময়মতে বিতৰণ নকৰাৰ বাবে স্থানীয় ৰাইজে অসন্তুষ্টি প্ৰকাশ কৰিছে । যাৰ বাবে বিগত তিনি মাহ ধৰি স্থানীয় ৰাইজে এজেন্ট কৰুণা দাসৰ পৰা সামগ্ৰী অনা বন্ধ কৰি দিছে । ৰাইজৰ দাবী এজেন্ট কৰুণা দাসে ৰাইজৰ লগত কৰা দুৰ্নীতিৰ বিৰুদ্ধে চৰকাৰে ব্যৱস্থা গ্ৰহণ কৰক ৷
ইয়াৰোপৰি এজেন্ট কৰুণা দাসৰ লাইচেন্স কৰ্তন কৰি অন্য এজেন্টৰ জৰিয়তে সুলভ মূল্যৰ সামগ্ৰী সমূহ ৰাইজৰ মাজত যোগান ধৰাৰ ব্যৱস্থা গ্ৰহণ কৰাৰ বাবে স্থানীয় ৰাইজে অনুৰোধ কৰিছে । এতিয়া ৰাইজৰ ক্ষোভ আৰু অনুৰোধক যোগান বিভাগে কিমান গুৰুত্ব দিয়ে সেইয়া লক্ষ্যণীয় হ'ব ।
লগতে পঢ়ক : বিশ্ব পৰ্যটন দিৱসৰ দিনটোত নিমাও-মাও মাজুলী
