ধুবুৰী, 1 জানুৱাৰীঃ আজিৰ এই বিশেষ দিনটোতে অসমত জন্মলাভ কৰিছিল এগৰাকী সিংহপুৰুষে ৷ কিন্তু সৰহসংখ্যক অসমীয়াই আজি পাহৰি গৈছে এইগৰাকী জননেতাক ৷ 2001 চনত চৰকাৰে তেওঁৰ জন্মতিথিক "জনতাৰ দিন" হিচাপে ঘোষণা কৰিছিল ৷ এইগৰাকী মহান অসমীয়া আছিল অসমৰ প্ৰাক্তন মুখ্যমন্ত্ৰী শৰৎ চন্দ্ৰ সিংহ ৷ 1972চনৰ পৰা 1978লৈ তেওঁ অসমৰ মুখ্যমন্ত্ৰী হিচাপে কাৰ্যনিৰ্বাহ কৰিছিল শৰৎ চন্দ্ৰ সিংহই ৷
1946 চনত চনত ভাৰতীয় জাতীয় কংগ্ৰেছ দলৰ পৰা তেওঁ সক্ৰিয় ৰাজনীতিত প্ৰৱেশ কৰিছিল ৷ 1946-52, 1962-67, 1972-78 আৰু 1985-90 চনত পূৱ বিলাসীপাৰা বিধানসভা সমষ্টিৰ পৰা মুঠ চাৰিবাৰকৈ তেওঁ অসম বিধানসভালৈ নিৰ্বাচিত হৈছিল ৷ অসমৰ জৰুৰীকালীন অৱস্থাৰ পিচতেই তেওঁ কংগ্ৰেছ (সমাজবাদী) দলত যোগদান কৰিছিল আৰু 1987 চনত দলটোৰ ৰাষ্ট্ৰীয় সভাপতি হিচাপে নিৰ্বাচিত হৈছিল ৷ যেতিয়া শাৰদ পাৱাৰে কংগ্ৰেছ দল এৰি সমাজবাদী কংগ্ৰেছ দল গঠন কৰাৰ সময়তে সিংহই তেওঁক সংগ দি মৃত্যুৰ সময়লৈকে অসমত দলটোক নেতৃত্ব দি যায় ৷
লগতে পঢ়ক-ভাৰতীয় অৰ্থনীতিৰ বিষয়ে কি ক'লে প্ৰাক্তন মন্ত্ৰী পি চিদাম্বৰমে
মুখ্যমন্ত্ৰী হৈ থকাৰ সময়ত শৰৎ চন্দ্ৰ সিংহই বহুটো প্ৰত্যাহ্বানৰ সন্মুখীন হৈছিল ৷ ইয়াৰ ভিতৰত অন্যতম আছিল অসমৰ ৰাজধানী শ্বিলঙৰ পৰা দিছপুৰলৈ স্থানান্তৰ কৰা, 1972 চনৰ ভাষা আন্দোলন নিয়ন্ত্ৰণ কৰা ৷ গুৱাহাটী চিকিৎসা মহাবিদ্যালয় আৰু বঙাইগাওঁ তেল শোধনাগাৰ স্থাপনটো সিংহই গুৰুত্বপূৰ্ণ ভূমিকা পালন কৰিছিল ৷ ক্ষমতাৰ বিকেন্দ্ৰীকৰণত বিশ্বাসী সিংহই ৰাজ্যখনৰ সকলো জাতি-জনজাতিৰ বিকাশৰ বাবে পঞ্চায়তী ৰাজ ব্যৱস্থাৰ প্ৰৱৰ্তন কৰিছিল ৷ ৰাজ্যৰ আৰ্থিক অৱস্থাৰ উন্নতিৰ বাবে ৰাজ্যত তেওঁ জন্ম দিছিল সমবায় খণ্ডৰ ৷ 1950 চনত ভাষাভিত্তিক ৰাজ্যবিভাজনৰ সময়ত গোৱালপাৰা জিলাক পশ্চিমবংগৰ লগত চামিল কৰাৰ কথাৰ প্ৰৱল বিৰোধিতা কৰিছিল সিংহই ৷
১৯১৪ চনৰ ১ জানুৱাৰী তাৰিখে ধুবুৰী জিলাৰ চাপৰত জন্মগ্ৰহণ কৰিছিল শৰৎ চন্দ্ৰ সিংহই ৷ তেওঁ গাঁৱৰ স্কুলতে প্ৰাথমিক শিক্ষা লাভ কৰাৰ লগতে ঘৰৰ পৰা 25 কিলোমিটাৰ চাইকেল চলাই গৈ বিলাসীপাৰাত হাইস্কুল শিক্ষা সাং কৰিছিল ৷ কটন কলেজৰ পৰা স্নাতক সিংহই বেনাৰস হিন্দু বিশ্ববিদ্যালয়ৰ পৰা আইনৰ ডিগ্ৰী গ্ৰহণ কৰিছিল ৷ পৰৱৰ্তী সময়ত গুৱাহাটীত ওকালতি কৰাৰ লগতে ধুবুৰী জিলাৰ বিভিন্ন স্কুলত শিক্ষকতাও কৰিছিল ৷ 2005 চনৰ 25 ডিচেম্বৰত গুৱাহাটীত শেষ নিশ্বাস ত্যাগ কৰিছিল এইগৰাকী মহান নেতাই ৷
আজি তেওঁৰ 107তম জন্মবাৰ্ষিকী উপলক্ষে ধুবুৰীৰ চাপৰত জননেতাগৰাকীক সশ্ৰদ্ধ সোঁৱৰণ কৰা হয় ৷ বহলপুৰৰ ৰত্নপীঠ মহাবিদ্যালয়ত বুধবাৰে আনুষ্ঠানিকভাৱে পালন কৰা হয় জননেতাগৰাকী জন্মবাৰ্ষিকী "জনতাৰ দিন" ৷ উল্লেখ্য যে, অসম চৰকাৰে প্ৰয়াত মুখ্যমন্ত্ৰীগৰাকীৰ স্মৃতিত এক কোটি টকা ব্যয় সাপেক্ষে নিৰ্মাণৰ কথা ঘোষণা কৰিছিল কপোত নীৰ উদ্যান আৰু পুখুৰী ৷ কিন্তু আশ্বৰ্যজনকভাৱে বিগত এটা বছৰে সম্পূৰ্ণ নহ’ল আঁচনিখনৰ কাম ৷ অসমৰ এইগৰাকী সুযোগ্য সন্তানৰ প্ৰতি চৰকাৰৰ অৱহেলাৰ দৃষ্টিয়ে হতাশ কৰিছে তেখেতৰ জন্মভূমি চাপৰৰ ৰাইজক ৷
