ধুবুৰী, ২২ মে': বিগত দুটা দিনৰ পৰা ধাৰাসাৰ বৰষুণ হৈ থকাৰ সময়তে ধুবুৰী চহৰৰ মেজিষ্ট্ৰেট কলনিত হুৱা-দুৱা । কথমপি ৰক্ষা পৰিল কলনিৰ বহু লোক । দৰাচলতে যোৱা দুটা দিনৰ পৰা নেৰানেপেৰা বৰষুণ আৰু বতাহ বৈ থকাৰ ফলত একপ্ৰকাৰ ব্যহত হৈ আছিল বিদ্যুৎ যোগান ।
কিন্তু শুকুৰবাৰে বিদ্যুৎ যোগান দিয়াৰ সময়তে ধুবুৰী চহৰৰ তিনি নং ৱাৰ্ডৰ মেজিষ্ট্ৰেট কলনিত থকা উচ্চ ক্ষমতা সম্পন্ন বিদ্যুতৰ তাৰ ছিগি ৰাজপথত পৰে । লগে লগে জুই জ্বলি উঠাত স্থানীয় ৰাইজ আতংকিত হৈ পৰে যদিও লগে লগে বিদ্যুৎ যোগান বন্ধ কৰি দিয়াৰ ফলত কথমপি ৰক্ষা পৰে অঞ্চলটোৰ ৰাইজৰ ।
ইপিনে ঘটনাৰ পিছতেই ঘটনাস্থলীত উপস্থিত আৰক্ষী প্ৰশাসনৰ লোক আৰু অগ্নিনিৰ্বাপক বাহিনী । অৱশ্যে ঘটনাক কেন্দ্ৰ কৰি কোনো ক্ষয় ক্ষতি হোৱা নাই যদিও বিদ্যুৎ যোগান ব্যহত হৈ আছে বৃহত্তৰ মেজিষ্ট্ৰেট কলনিত ।
