জোনাই,13 নৱেম্বৰ : কাকপথাৰৰ সাংবাদিক পৰাগ ভূঞাৰ হত্যাৰ উচিত তদন্তৰ দাবীৰে ৰাজ্যজুৰি অব্যাহত আছে তীব্ৰ প্ৰতিবাদ ৷ লগতে সাংবাদিক গৰাকীৰ মৃত্যুত গভীৰ শোক প্ৰকাশ কৰিছে সমগ্ৰ অসমবাসীয়ে ৷ শুকুৰবাৰে জোনাইত শ্ৰদ্ধাঞ্জলি অনুষ্ঠানৰ আয়োজন কৰে অসম জাতীয়তাবাদী যুৱ ছাত্ৰ পৰিষদে ৷ সাংবাদিক গৰাকীৰ মৃত্যুত গভীৰ শোক প্ৰকাশ কৰাৰ লগতে অচিৰেই এক উচ্চ পৰ্যায়ৰ তদন্ত কৰি দোষীক শাস্তি প্ৰদান কৰিবলৈ চৰকাৰক দাবী জনায় সংগঠনটোৱে ৷
দলগাঁও : সাংবাদিক পৰাগ ভূঞাৰ মৃত্যুৰ উচিত তদন্তৰ দাবীৰে দৰং জিলা সাংবাদিক সন্থাই ৰূপায়ন কৰে এক প্ৰতিবাদী কাৰ্যসূচী ৷ দলগাঁও চাৰিআলিত সাংবাদিক সন্থাই মমবাতি জ্বলাই মৌন প্ৰতিবাদ সাব্যস্ত কৰাৰ লগতে উক্ত ঘটনাৰ চিবিআই তদন্ত আৰু সাংবাদিকসকলৰ সুৰক্ষা সুনিশ্চিত কৰাৰ দাবী জনায় ৷
বিশ্বনাথ : বিশ্বনাথ চাৰিআলিৰ সাহিত্য সভা ভৱনৰ প্ৰাংগণতো এক প্ৰতিবাদী কাৰ্যসূচী ৰূপায়ন কৰে বিশ্বনাথ জিলা সাংবাদিক সন্থাই ৷ বিশ্বনাথৰ বিভিন্ন মাধ্যমৰ সাংবাদিকসকলে ক’লা বেজ পৰিধান কৰি আৰু হাতত প্লে’ কাৰ্ড লৈ প্ৰতিবাদী সাব্যস্ত কৰা পৰিলক্ষিত হয় ৷ সাংবাদিক পৰাগ ভূঞাৰ মৃত্যুৰ উচিত তদন্তৰ দাবী জনোৱাৰ লগতে প্ৰয়াত সাংবাদিক গৰাকীৰ পৰিয়ালবৰ্গক চৰকাৰৰ তৰফৰ পৰা উচিত ক্ষতিপূৰণ দিয়াৰ বাবে দাবী জনায় সাংবাদিক সন্থাই ।
ধেমাজি : শুকুৰবাৰে সন্ধিয়া ধেমাজি জিলা সাংবাদিক সন্থাৰ উদ্যোগত আৰু ধেমাজি প্ৰেছ ক্লাবৰ সহযোগত ধেমাজি প্ৰেছ ক্লাৱত শ্ৰদ্ধাঞ্জলি অনুষ্ঠানৰ আয়োজন কৰা হয় ৷ সাংবাদিক পৰাগ ভূঞাৰ মৃত্যুত গভীৰ শোক প্ৰকাশ কৰি শোক সন্তপ্ত পৰিয়ালবৰ্গলৈ সমবেদনা জ্ঞাপন কৰে সাংবাদিক সন্থাই ৷ শ্ৰদ্ধাঞ্জলি অনুষ্ঠানত সাংবাদিক সন্থাই সাম্প্ৰতিক সময়ত চৰকাৰে সাংবাদিকসকলক নিৰাপত্তা দিয়াত ব্যৰ্থ হৈছে বুলি চৰকাৰক সমালোচনা কৰে ৷
লগতে পঢ়ক : হাগ্ৰামা মহিলাৰী জেললৈ যোৱাটো খাটাংঃ প্ৰমোদ বড়ো
