চিৰাং, 30 অক্টোবৰ : চিৰাং জিলাৰ পাণবাৰীৰ ভাংনামাৰীত বিপিএফৰ বিশাল নিৰ্বাচনী সভা । ক’ভিডৰ সকলো নীতি-নিয়ম উলংঘা কৰি প্ৰায় ১৫ সহস্ৰাধিক লোকৰ উপস্থিতিত হাগ্ৰামা মহিলাৰীৰ জনসভা । বিটিচিৰ ১৮ নং মানাস ছেৰফাং পৰিষদীয় সমষ্টিৰ বিপিএফ প্ৰাৰ্থী ধনঞ্জয় বসুমতাৰীৰ সমৰ্থনত অনুষ্ঠিত উক্ত নিৰ্বাচনী সভাত মুখ্য অতিথি হিচাপে উপস্থিত থাকে বিপিএফ প্ৰধান হাগ্ৰামা মহিলাৰী ।
মহিলাৰীয়ে আগন্তুক বিটিচি নিৰ্বাচনত সৰহ সংখ্যক আসন জয় লাভেৰে চৰকাৰ গঠন কৰিব বুলি মন্তব্য কৰে । তেওঁ আৰু কয় যে সকলো দলেই নিজৰ নিজৰ দলীয় ৰণকৌশল লৈ কাম কৰি গৈছে । এতিয়ালৈ বিজেপিৰে মিত্ৰতা আছে যদিও পৰিষদীয় নিৰ্বাচনৰ পিচত ইয়াৰ চূড়ান্ত ৰূপ দিব । বিপিএফৰ দলীয় কোনো সংঘাত নাই বুলিও কয় হাগ্ৰামাই । আনফালে সম্প্ৰতি বিপিএফৰ ভিতৰ চ’ৰাত সংঘাত হৈ আছে নেকি বুলি সাংবাদিকে কৰা প্ৰশ্নৰ উত্তৰত কোনো সংঘাত নাই বুলি স্পষ্ট কৰি দিয়ে ।
ইয়াৰোপৰি সভাপতি গৰাকীয়ে পুনৰ পৰিষদ দখল কৰা বাবে আন আন ৰাজনৈতিক দল সমূহৰ সমান্তৰালভাৱে বিপিএফেও প্ৰয়োজনীয় ৰণকৌশল ইতিমধ্যে প্ৰস্তুত কৰি তুলিছে বুলি মন্তব্য কৰে । পৰিষদ গঠন কৰিয়ে বিটিআৰ চুক্তি ক্ষতিকৰ বিষয় সমুহৰ সংশোধনিৰ ব্যৱস্থা কৰিব বিপিএফে । যিহেতু বিটিচিত অধিকাংশ লোকেই অজনজাতীয় আৰু বিটিআৰ চুক্তি একপক্ষীয় ভাৱে জনজাতীয় সকলৰ বাবে কৰা । ইয়াত অজনজাতীয় সকলৰ বাবে একো নাই বুলিও কয় হাগ্ৰামাই ।
বিটিচি পৰিষদীয় নিৰ্বাচনত ইউপিপিএল দল বিপিএফৰ বাবে একো ফেক্টৰ নহয় বুলি দাবী কৰি বিপিএফৰ চৰকাৰ গঠন কৰাটো নিশ্চিত বুলি কয় হাগ্ৰামা মহিলাৰীয়ে । ইফালে ক’ভিড প্ৰট’কল ভংগ কৰি ভাংনামাৰী হাইস্কুল খেলপথাৰত বিপিএফে আয়োজন কৰা এই বিশাল নিৰ্বাচনী সভাত পোন্ধৰ সহস্ৰাধিক লোকে অংশগ্ৰহণ কৰে । সভাত হাগ্ৰামা মহিলাৰীৰ উপৰিও বিপিএফৰ ষ্টাৰ কেম্পেইনাৰ বিপুল ৰাভা, মহিলা বিপিএফৰ উপসভানেত্ৰী নিৰুপমা বসুমতাৰী, সম্পাদিকা আখতাৰা বেগম,বিজনী সমষ্টিৰ বিধায়ক কমল সিং নাৰ্জাৰীয়েও অংশগ্ৰহণ কৰে ।
শনিবাৰে চিৰাং জিলাৰ ১৪ নং চিৰাং দুৱাৰ সমষ্টীৰ বিপিএফৰ প্ৰাৰ্থী তথা বিটিচিৰ প্ৰাক্তন উপ মুখ্য খাম্পা বৰগয়াৰীৰ হৈ ভূৰতিনালি থাইজাঝোৰাত নিৰ্বাচনী প্ৰচাৰ চলাব হাগ্ৰামা মহিলাৰীয়ে । মুঠতে অহা ডিচেম্বৰ মাহৰ প্ৰথম সপ্তাহত অনুষ্ঠিত হ’বলগীয়া বিটিচি নিৰ্বাচনৰ বাবে বিপিএফ দলে তৎপৰতাৰে নিৰ্বাচনী প্ৰচাৰ চলাই গৈছে ।
লগতে পঢ়ক : শিৱসাগৰ নগৰত ধৰ্ষণৰ বিৰুদ্ধে বাটৰ নাট প্ৰৰ্দশন
