চিৰাং, 16 নৱেম্বৰ : সোমবাৰে চিৰাং জিলাত অনুষ্ঠিত হোৱা এক অনুষ্ঠানত বিগত দিনত কৰ'ণা সংক্ৰমণৰ ফলত পৰিয়ালৰ একমাত্ৰ উপাৰ্জনকাৰীজনৰ মৃত্যু হোৱা ব্যক্তিৰ পৰিয়ালক আৰ্থিক অনুদান প্ৰদান কৰা হয় ৷ এই অনুষ্ঠানত ৰাজ্য চৰকাৰে স্বামীহাৰা বিধৱাসকলক আৰ্থিক সকাহ দিয়াৰ লক্ষ্যৰে ৰূপায়ণ কৰা আঁচনি অনুসৰি আৰ্থিক অনুদান প্ৰদান কৰা হয় ৷
পূৰ্বেও জিলাখনৰ স্বামীহাৰা বিধৱা মহিলাৰ বাবে জিলা প্ৰশাসনে বিধৱা মহিলাসকলৰ মাজত আঢ়ৈ লাখ টকাৰ চেক প্ৰদান কৰিছিল ৷ সোমবাৰে অনুষ্ঠিত হোৱা এই অনুষ্ঠানত মুখ্যমন্ত্ৰীৰ ক'ভিড-19 বিধৱা সহায়ক আঁচনিৰ অধীনত চিৰাং জিলাৰ চাৰিগৰাকী ক’ভিডত আক্ৰান্ত হৈ স্বামীহাৰা হোৱা বিধৱা মহিলাৰ মাজত চৰকাৰী সাহাৰ্য অনুসৰি আঢ়ৈ লাখ টকাৰ চেক প্ৰদান কৰা হয় ৷
উক্ত অনুষ্ঠানত মুখ্য অতিথিৰূপে উপস্থিত থাকে চিদলীৰ বিধায়ক জয়ন্ত বসুমতাৰী (Jayanta Basumatary) ৷ চিৰাঙৰ কাজলগাঁওস্থিত জিলা উপায়ুক্তৰ কাৰ্যালয়ৰ সভাকক্ষত অনুষ্ঠিত হোৱা অনুষ্ঠানটোত ভাষণ প্ৰদান কৰি বসুমতাৰীয়ে কয় যে, ক'ৰণা মহামাৰীত মৃত্যু হোৱা লোকসকল ঘৰখনৰ মূৰব্বী আৰু একমাত্ৰ উপাৰ্জনকাৰী আছিল ৷ বৰ্তমানৰ অসম চৰকাৰৰ মুখ্যমন্ত্ৰী ড৹ হিমন্ত বিশ্ব শৰ্মা সদায় ৰাইজৰ লগত আছে বুলিও বিধায়ক গৰাকীয়ে তেওঁৰ ভাষণত উল্লেখ কৰে ৷
