জনীয়া, 24 জুন : ৰাজ্যত চৌদিশে দুৰ্নীতি ভ্ৰষ্টাচাৰৰ বিৰুদ্ধে চৰকাৰে সক্ৰিয়তা প্ৰদৰ্শন কৰা স্বত্বেও শীৰ্ষ মহলৰ পৰা আদি কৰি তৃণমূল পৰ্যায়লৈকে চলি আছে অবাধ দুৰ্নীতি ৷ এচাম চৰকাৰী কৰ্মচাৰীৰ দুৰ্নীতিৰ বাবে ব্যাহত হৈ পৰিছে সৰ্ব-সাধাৰণৰ জীৱনযাত্ৰা ৷ বৰপেটা জিলাৰ চকচকা ডাকঘৰত সংঘটিত হোৱা ধন কেলেংকাৰীৰ ঘটনা পোহৰলৈ আহিছে । চৰকাৰৰ সুকন্যা আঁচনি(sukanya scheme) আৰু ডাকঘৰ সঞ্চয়ৰ ধন আত্মসাৎ কৰাৰ অভিযোগ উঠিছে পোষ্ট মাষ্টাৰ হাছিম আলীৰ বিৰুদ্ধে ।
জানিব পৰা মতে, গ্ৰাহকে জমা কৰিবলৈ দিয়া টকা ঊৰ্ধতম কৰ্তৃপক্ষৰ হাতত জমা নকৰি পোষ্ট মাষ্টাৰ হাছিম আলীয়ে নিজে আত্মসাৎ কৰাৰ সন্দেহ ওপজে একাংশ গ্ৰাহকৰ ৷ এই সন্দেহৰ ভিত্তিতে বৃহস্পতিবাৰে ঘটনা সন্দৰ্ভত ডাকঘৰত অনুসন্ধান কৰিবলৈ উপস্থিত হয় ৰাইজ ৷ অৱশেষত ৰাইজৰ অনুসন্ধানত জোলোঙাৰ মেকুৰী ওলাই পৰে আৰু পোষ্ট মাষ্টাৰ গৰাকীয়ে এই দুৰ্নীতি চলাই থকাৰ বিষয়টোত নিশ্চিত হয় ৰাইজ ।
ইয়াৰ পিছত স্বাভাৱিকতে কষ্টোপাৰ্জিত ধন হেৰুওৱা গ্ৰাহকসকলে ডাকঘৰটোত এক হুলস্থুলীয়া পৰিৱেশৰ সৃষ্টি কৰে । গ্ৰাহকসকলে অভিযোগ কৰা মতে, পোষ্ট মাষ্টাৰ গৰাকীয়ে প্ৰায় ১০ লাখ টকাৰ কেলেংকাৰী সংঘটিত কৰিছে । ৰাইজৰ সন্মুখত নিজৰ স্বৰূপ ধৰা পৰাৰ পিছত বৰ্তমান পোষ্ট মাষ্টাৰ হাছিম আলী পলাতক অৱস্থাত আছে বুলি জানিব পৰা গৈছে ৷
লগতে পঢ়ক : উত্তৰ প্ৰদেশ পালেগৈ শ্ব'হাম শ্বপিৰ স্বত্বাধিকাৰী সন্দীপ জালান
