বৰপেটা,12 নৱেম্বৰ : 31নং ৰাষ্ট্ৰীয় ঘাইপথৰ পৰা ট্ৰাক অপহৰণ কৰা দুধৰ্ষ ডকাইতক গ্ৰেপ্তাৰ কৰে সৰভোগ আৰক্ষীয়ে ৷ আটকাধীন দুধৰ্ষ ডকাইতটোৰ নাম ৰফিৰ মোল্লা ৷ বৰপেটাত ত্ৰাস সৃষ্টি কৰা ডকাইতৰ দলটোৰ পৰা এজনক আটক কৰি এখন বলেৰ' জব্দ কৰিবলৈ সক্ষম হয় যদিও দলটোৰ চাৰিটা ডকাইত পলাবলৈ সক্ষম হয় ৷ নিশা ৰাষ্ট্ৰীয় ঘাইপথত পৰিবহণ বিভাগৰ পৰিদৰ্শক নতুবা চি আই ডিৰ মানুহ বুলি পৰিচয় দি বৰপেটাৰ ভিন্ন ঠাইত দীৰ্ঘদিন ধৰি ট্ৰাক অপহৰণ কৰি আহিছিল ডকাইতৰ দলটোৱে ৷ সোমবাৰে নিশা এক গোপন সূত্ৰৰ ভিত্তিত সৰভোগ আৰক্ষীয়ে অভিযান চলাই ডকাইতৰ দলটোক অনুসৰণ কৰি এজনক আটক কৰিবলৈ সক্ষম হয় ৷ আৰক্ষীয়ে আটক কৰা ডকাইত টোৰ পৰা AS-15K-9773 নম্বৰৰ বলেৰ' গাড়ী জব্দ কৰাৰ লগতে গাড়ীখনৰ ভিতৰত AS-01DE-0348 নম্বৰৰ এখন ভুৱা নম্বৰপ্লেটসহ বিভিন্ন বয়-বস্তু উদ্ধাৰ কৰে ৷ ডকাইতটোৰ ঘৰ মাণিকপুৰৰ নয়াগাঁও বুলি জানিব পৰা গৈছে ৷ পলায়ন কৰা আন চাৰিজন ডকাইত ক্ৰমে আয়নাল হক,(কলগাছিয়া) নুৰ ইছলাম(ভাণ্ডাৰা) নুৰ মহম্মদ (কোকিলা) আৰু চিৰাজুল ইছলাম (ভাণ্ডাৰা) ৷ আৰক্ষীয়ে পলায়ন কৰা ডকাইত কেইটাৰ সন্ধানত অভিযান অব্যাহত ৰাখিছে ৷
আৰু পঢ়ক : পাণ্ডুত উদ্ধাৰ অৰ্ধগলিত অচিনাক্ত মৃতদেহ
