বৰপেটা, ৪ জুলাইঃ শুকুৰবাৰে ঘৰলৈ অনা হ'ল বৰপেটাৰ নগাঁৱত বুধবাৰে সলিল সমাধি ঘটা চাৰিওটা শিশুৰ মৃতদেহ ৷ বৰপেটা মেডিকেল কলেজ হস্পিতালত মৰণোত্তৰ পৰীক্ষা সম্পন্ন কৰাৰ পিচতেই চাৰিওটা শিশু আৰু কিশোৰৰ মৃতদেহ নগাঁও ৰায়তপাৰাৰ ঘৰলৈ লৈ অহা হয় ৷ বুধবাৰে পথাৰৰ মাজত থকা পুখুৰী এটাত পৰি অংকুৰ দাস, অংকুৰজ্যোতি দাস, কৌশিক দাস আৰু হেমাংগ দাস নামৰ চাৰিওটা শিশু আৰু কিশোৰৰ সলিল সমাধি হৈছিল ৷ খিলঞ্জীয়া কৈৱৰ্ত সম্প্ৰদায়ৰ পৰিয়ালৰ শিশু আৰু কিশোৰ কেইটিক হেৰুৱাই পৰিয়াল আৰু আত্মীয় স্বজনৰ মাজত সৃষ্টি হৈছে হাহাকাৰ অৱস্থাৰ ৷
মৃতদেহকেইটা ঘৰ আহি পোৱাৰ পিচতেই পৰিয়ালৰ লোকসকল কান্দোনত ভাগি পৰে ৷ সৃষ্টি হয় এক হৃদয় বিদাৰক পৰিৱেশৰ ৷ কাকো কোনেও সান্ত্বনা দিব নোৱাৰা পৰিস্থিতি ৷ মাছ মাৰি জীৱিকা নিৰ্বাহ কৰা পৰিয়ালকেইটিৰ সন্তান চাৰিটা এনেদৰে অকালতে হেৰুৱাই গাঁওবাসীও হৈ পৰিছে শোকাভিভূত ৷ বুধবাৰৰ আবেলি প্ৰায় ৪-৩০ বজাত পথাৰলৈ গৈছিল সম্পৰ্কীয় ভায়েক-ককায়েক চাৰিওটা ৷ পিছে বানপানীত পথাৰ-পুখুৰী একাকাৰ হৈ পুখুৰীৰ চিনমোকাম নাইকীয়া হৈ পৰাৰ ফলত পুখুৰীৰ পানীত সোমাই পৰে চাৰিওটা শিশু আৰু কিশোৰ ৷ দুৰ্ভগীয়া পৰিয়ালকেইটিৰ ভিতৰত অংকুৰজ্যোতি দাস, কৌশিক দাস আৰু হেমাংগ দাস একমাত্ৰ পুত্ৰ সন্তান আছিল ৷ চাৰিটা শিশু কিশোৰক এনেদৰে অকালতে হেৰুৱাই পৰিয়াল, আত্মীয় স্বজনৰ লগতে গাঁওবাসীও শোকত ম্ৰিয়মান হৈ পৰিছে ৷
