বৰপেটা, 9 জানুৱাৰী : বৰপেটাত শুকুৰবাৰে উপস্থিত হ’ল অসম গৌৰৱ, অলিম্পিয়ান বক্সাৰ লাভলীনা বৰগোঁহাই ৷ বৰপেটা জিলা এমেচাৰ বক্সিং সন্থাৰ ক্লাব ৰাইনোৰ মুকলি মঞ্চত ৰাজ্যৰ পঞ্চায়ত আৰু গ্ৰামোন্নয়ন মন্ত্ৰী ৰণজিৎ কুমাৰ দাস, বৰপেটাৰ প্ৰাক্তন বিধায়ক গুণীন্দ্ৰ নাথ দাসৰ লগতে জিলা প্ৰশাসনৰ বিষয়া আৰু বিভিন্ন দল-সংগঠনৰ উপস্থিতিত লৌহ কন্যা লাভলীনা বৰগোঁহাইক ৰাজহুৱাভাৱে সম্বৰ্ধনা জ্ঞাপন কৰা হয় ৷
প্ৰথমবাৰৰ বাবে বৰপেটা সত্ৰ দৰ্শন (Lovlina Borgohain visits Barpeta Satra) কৰাৰ লগতে বৰপেটাবাসীৰ মৰম-আদৰ লাভ কৰি আপ্লুত হৈ পৰে বক্সাৰগৰাকী (Boxer Lovlina Borgohain at Barpeta on Friday) ৷ সত্ৰনগৰী বৰপেটাত উপস্থিত হৈ এই দিনটোক এটা বিশেষ দিন বুলি উল্লেখ কৰি অনাগত সময়ত লাভলীনাই সোণৰ পদক লৈ পুনৰ বৰপেটালৈ আহিবলৈ আশা প্ৰকাশ কৰে ৷
আনহাতে, অনুষ্ঠানত বক্তব্য প্ৰদান কৰি ক্ৰীড়াৰ সৈতে জড়িত নৱপ্ৰজন্মলৈ শুভেচ্ছা জ্ঞাপন কৰে বক্সাৰগৰাকীয়ে ৷
উল্লেখ্য যে, 9-12 জানুৱাৰীলৈকে চাৰি দিন ধৰি বৰপেটাত অনুষ্ঠিত হ'ব ৰাজ্যিক ভিত্তিত বক্সিং প্ৰতিযোগিতা ৷ উক্ত বক্সিং প্ৰতিযোগিতাৰ পূৰ্বে শুকুৰবাৰে এক বিশেষ অনুষ্ঠানত অলিম্পিয়ান বক্সাৰগৰাকীক ৰাজহুৱা সম্বৰ্ধনা জনায় আয়োজক সমিতিয়ে ৷
লাভলীনাই ২০১৭ চনত ভিয়েটনামৰ হো চি মিন চিটিত অনুষ্ঠিত এছিয়ান চেম্পিয়নশ্বিপ বক্সিং প্ৰতিযোগিতাত ব্ৰঞ্জৰ পদক আৰু ২০১৮ চনৰ নতুন দিল্লীত অনুষ্ঠিত হোৱা বিশ্ব চেম্পিয়নশ্বিপত ব্ৰঞ্জৰ পদক লাভ কৰিছিল । লগতে ২০২১ চনত টকিঅ’ ২০২০ অলিম্পিকত ব্ৰঞ্জৰ পদক লাভ কৰে অসম গৌৰৱ লাভলীনাই ৷
লগতে পঢ়ক : Preparation for Bhogali Bihu : টিংখাঙত ভোগালীৰ আকৰ্ষণৰ মূল কাৰণ টাইটানিক
