বৰপেটা, 11 মে’: ড্ৰাগছৰ ভয়াৱহতাৰ বিষয়ে যুৱ সমাজৰ মাজত সজাগতা সৃষ্টিৰ লক্ষ্যৰে বৰপেটা জিলা প্ৰশাসনৰ উদ্যোগত আৰু বৰপেটা জিলা আৰক্ষীৰ সহযোগত আজি এখন সজাগতা সভা অনুষ্ঠিত হয় ৷ বৰপেটাৰ বিভিন্ন শিক্ষানুষ্ঠানৰ ছাত্ৰ-ছাত্ৰী আৰু শিক্ষক-শিক্ষয়িত্ৰীৰ উপস্থিতিত জিলা পুথিভঁড়াল প্ৰেক্ষাগৃহত অনুষ্ঠিত এই সভাত প্ৰতিজন বক্তাই উদ্বেগেৰে মন্তব্য কৰে যে, ড্ৰাগছৰ বিৰুদ্ধে এতিয়াই যদি সমাজ সচেতন নহয়, তেন্তে অনাগত দিনত এখন পংগু সমাজ গঢ় লৈ উঠিব ৷ ইয়াৰ বাবে সজাগতা ঘৰতে গঢ়ি তোলাৰ লগতে বিদ্যালয় পৰ্যায়ৰ পৰাই ছাত্ৰ-ছাত্ৰীৰ সকলৰ মাজত এই বিষয়ে সজাগ কৰিব লাগিব ৷ এইক্ষেত্ৰত প্ৰধান দায়িত্ব ল’ব লাগিব শিক্ষক-শিক্ষয়িত্ৰী সকলে বুলি মন্তব্য কৰে বক্তা সকলে (Awareness Meeting against drugs in Barpeta) ৷
অনুষ্ঠানত আদৰণি ভাষণ প্ৰদান কৰে বৰপেটাৰ আৰক্ষী অধীক্ষক অমিতাভ সিনহাই ৷ ভাষণ প্ৰসংগত তেওঁ কয় যে, দক্ষিণ-পূৱ এছিয়াৰ কেইবাখনো দেশৰ পৰা অসমলৈ ড্ৰাগছৰ সৰবৰাহ হয় ৷ সেই ড্ৰাগছ গুৱাহাটীৰ পৰা কম পৰিমাণত পেকেজিং হৈ পশ্চিম অসমৰ জিলাকেইখনৰ চোৰাং বজাৰত সৰবৰাহকাৰীৰ জৰিয়তে বিয়পি পৰে ৷ সিনহাই লগতে সদৰী কৰে যে, যোৱা আঢ়ৈ বছৰত বৰপেটা জিলাতে ড্ৰাগছৰ ব্যৱসায় আৰু সৰবৰাহৰ লগত জড়িত থকাৰ অভিযোগত 318 জন লোকক গ্ৰেপ্তাৰ কৰিছে আৰক্ষীয়ে ৷ এই সময়ছোৱাত কোটি টকাৰো অধিক মুল্যৰ ড্ৰাগছ জব্দ কৰা হৈছে বুলি কয় আৰক্ষী বিষয়াজনে (Drugs awareness meeting in Barpeta) ৷
অনুষ্ঠানত বিশিষ্ট অতিথিৰূপে উপস্থিত থকা বৰপেটাৰ ফখৰুদ্দিন আলী আহমেদ চিকিৎসা মহাবিদ্যালয় হাস্পতালৰ অধ্যক্ষ ডাঃ ৰমেন তালুকদাৰে কয় যে, ড্ৰাগছ হ'ল এক নীৰৱ ঘাতক ৷ সেয়েহে এই ঘাতকৰ বিৰুদ্ধে সকলোৱে যুঁজিব লাগিব ৷ আনহাতে, সমল ব্যক্তি ৰূপে এই অনুষ্ঠানত অংশগ্ৰহণ কৰে ড্ৰাগছ বিৰোধী অভিযানৰ বিশিষ্ট ব্যক্তি সন্দীপ হান্সেই ৷ ড্ৰাগছৰ ব্যাপক প্ৰচলনে সমাজ এখনক কিদৰে পংগু কৰে তাৰ বাখ্যা আগবঢ়াই হান্সেই কয় যে, ড্ৰাগছৰ আসক্তিয়ে বহু সম্ভৱনাপূৰ্ণ জীৱন চিৰদিনৰ বাবে শেষ কৰিছে ৷
আনহাতে, এই কাৰ্যসূচী উদ্বোধন কৰি বৰপেটাৰ উপায়ুক্ত আয়ুস গৰ্গে শিক্ষক-শিক্ষয়িত্ৰী সকলক ছাত্ৰ-ছাত্ৰীৰ মাজত ড্ৰাগছৰ বিৰুদ্ধে সজাগতা সৃষ্টিত মূল ভূমিকা ল’বলৈ আহ্বান জনায় ৷ দৃশ্য-শ্ৰব্য মাধ্যমেৰেও ড্ৰাগছৰ ভয়াবহতাৰ বিষয়ে অনুষ্ঠানত উপস্থিত থকা ছাত্ৰ-ছাত্ৰী আৰু শিক্ষক-শিক্ষয়িত্ৰী সকলক সজাগ কৰাৰ চেষ্টা কৰা হয় ৷ জিলাখনৰ সকলো শিক্ষানুষ্ঠানতে জিলা প্ৰশাসনৰ উদ্যোগত ড্ৰাগছ বিৰোধী সজাগতামূলক কাৰ্যসূচী ৰূপায়ণ কৰা হ’ব বুলি জানিবলৈ দিয়ে জিলা প্ৰশাসনৰ বিষয়ববীয়াই ৷
লগতে পঢ়ক: Drugs racket in Dibrugarh: ড্ৰাগছ বিক্ৰীৰ সন্দেহত জ্বলালে দোকান
