বৰপেটা, ৬ অক্টোবৰঃযান-বাহনৰ প্ৰদূষণ নিয়ন্ত্ৰিত প্ৰমাণপত্ৰ চমুকৈ পলিউশ্যন চাৰ্টিফিকেট সংগ্ৰহৰ ক্ষেত্ৰত যান বাহনৰ গৰাকীৰ সন্মুখত ঠিয় হৈছে আন এক বিপদ ৷ দেওবাৰৰ পৰা পৰা ম্যাদ উকলি যোৱা যান-বাহনৰ প্ৰদূষণ নিয়ন্ত্ৰিত প্ৰমাণপত্ৰৰ বাবে ভৰিব লাগিব পাঁচশ টকাৰ জৰিমনা ৷ পৰিবহন বিভাগে জাৰি কৰা নতুন এই নিৰ্দেশনাক লৈ বৰপেটাত দেওবাৰে সৃষ্টি হয় তীব্ৰ অসন্তুষ্টিৰ ৷ আনকি অসন্তুষ্ট বহু লোকে আজি জিলা উপায়ুক্তৰ চৰকাৰী বাসভৱনৰ সন্মুখত সমবেত হৈ পৰিবহন বিভাগে হঠাতে জাৰি কৰা নিৰ্দেশনাৰ বিৰুদ্ধে প্ৰতিবাদ জনায় ৷ যানবাহনৰ গৰাকীসকলৰ এটাই অভিযোগ- এই নতুন নিৰ্দেশনাৰ কথা কিয় জনোৱা হোৱা নাই ৰাইজক ৷ এই নতুন নিৰ্দেশনা সম্পৰ্কে আগতীয়াকৈ কোনো কথা অবগত নকৰাকৈ কিয় এনেদৰে হঠাতে জৰিমনা আদায়ৰ নিৰ্দেশ দিছে পৰিবহন বিষয়াই ৷ উপায়ুক্তৰ চৰকাৰী বাসভৱনৰ সন্মুখত ক্ষুব্ধ ৰাইজক সৈমান কৰিবলৈ তাৎক্ষনিকভাৱে উপস্থিত হয় বৰপেটাৰ সদৰ থানাৰ আৰক্ষী ৷ আনহাতে আৰক্ষীয়ে ক্ষুব্ধ লোক সকলক বুজাই বঢ়াই জিলা উপায়ুক্তৰ বাস ভৱনৰ পৰা আতৰাই পঠাবলৈ সক্ষম হয় ৷ আনহাতে এনে এক ঘটনাৰ পিছতো ঘটনাস্থলীত উপস্থিত ন'হল পৰিবহন বিভাগৰ কোনো এগৰাকী বিষয়া ৷ অৱশ্যে প্ৰদূষণ নিয়ন্ত্ৰণ কেন্দ্ৰটোত উপস্থিত হৈ বৰপেটাৰ ৰাজহ চক্ৰ বিষয়া পল্লৱী গগৈয়ে জিলা পৰিবহন বিষয়াৰ সৈতে ফোনত যোগাযোগ কৰে ৷ ইয়াৰ পিচতে ক্ষুব্ধ লোকসকলৰ আপত্তিত আজিৰ দিনটোৰ বাবে জৰিমনা আদায় অবিহনেই প্ৰমাণপত্ৰ প্ৰদান কৰিবলৈ কেন্দ্ৰটোৰ গৰাকীক নিৰ্দেশ দিয়ে ৷ অৱশ্যে বিষয়টো সমাধান নোহোৱা পৰ্যন্ত কাইলৈৰ পৰা প্ৰদূষণ নিয়ন্ত্ৰণৰ প্ৰমানপত্ৰ প্ৰদান কৰা কেন্দ্ৰসমুহ বন্ধ ৰখাৰ নিৰ্দেশ দিছে ৰাজহ চক্ৰ বিষয়াগৰাকীয়ে ৷
লগতে পঢ়কঃপেটুৱা গোসাঁই থানত জনগোষ্ঠীয় ভক্তৰ ভিৰ
