নিউজ ডেস্ক, ১৪ জুন : ক্ৰিকেট বিশ্বকাপৰ ৪ খনকৈ মেচ বৰষুণৰ বাবে পৰিত্যক্ত হোৱাৰ পাছতে ক্ষুণ্ণ হৈ পৰিছে ক্ৰিকেটপ্ৰেমীসকল । কিছুসংখ্যক লোকে ১২ সংখ্যক বিশ্বকাপক 'নিকৃষ্টতম বিশ্বকাপ' বুলিও ক'বলৈ কুণ্ঠাবোধ কৰা নাই । বৃহস্পতিবাৰে বৰষুণৰ বাবে ভাৰত বনাম নিউজিলেণ্ডৰ মেচ স্থগিত হোৱাৰ পাছতে টুইটাৰৰ জৰিয়তে অনুৰাগীসকলে প্ৰতিক্ৰিয়া ব্যক্ত কৰে ।
কিছু অনুৰাগী ইয়াক লৈ অসন্তুষ্ট হৈ পৰাৰ সময়তে আন কিছুয়ে আকৌ বিভিন্ন হাস্যকৰ আৰু ৰসাল টুইটেৰে হাঁহিৰ খোৰাক যোগাইছে ।
উল্লেখ্য যে, বৃহস্পতিবাৰে মেচ পৰিত্যক্ত ঘোষণা হোৱাৰ পাছতে পইন্ট তালিকাত নিউজিলেণ্ড দলে ৭ পইন্টেৰে শীৰ্ষ স্থান দখল কৰাৰ উপৰি ৬ পইন্টেৰে দ্বিতীয় স্থানত অষ্ট্ৰেলিয়া আৰু ৫ পইন্ট সংগ্ৰহেৰে তৃতীয় স্থানত আছে ভাৰতীয় দল । ইয়াৰোপৰি, তালিকাৰ অন্তিম স্থানত বৰ্তি ৰৈছে দক্ষিণ আফ্ৰিকা আৰু আফগানিস্তান ।
উল্লেখ্য যে, বিশ্বকাপ ২০১৯ ত ভাৰত আৰু নিউজিলেণ্ডে বৰ্তমানলৈকৈ এখনো খেলত পৰাজিত হোৱা নাই । ভাৰতে ১৬ জুনত পাকিস্তানৰ বিৰুদ্ধে অৱতীৰ্ণ হোৱাৰ উপৰি দক্ষিণ আফ্ৰিকাই আফগানিস্তানৰ বিৰুদ্ধে ১৫ জুনত অৱতীৰ্ণ হ'ব ।
