ধেমাজি ,২৯আগষ্টঃ অসমৰ আটাইকেইটা চিত্ৰগৃহৰ লগতে হায়দৰাবাদ , দিল্লী, পুনেৰ ছবিগৃহতো মুক্তি দিয়া হ'ব কাঞ্চনজংঘাক ৷ অসমৰ মুঠ ৬৭ টা চিত্ৰগৃহত একেলগে মুক্তি দিব জুবিন গাৰ্গৰ পৰিচালিত বহু প্ৰত্যাশিত ছবি কাঞ্চনজংঘা ৷ সেই উদ্দেশ্যে বৃহস্পতিবাৰে ছবিখন প্ৰচাৰৰ বাবে ধেমাজিত উপস্থিত হয় জুবিন গাৰ্গ আৰু ছবিখনৰ কলা-কুশলীসকল ৷ প্ৰথমে শিল্পীগৰাকীয়ে ধেমাজি আছুৰ কাৰ্যালয়ত উপস্থিত হৈ শ্বহীদ উদ্যানত এটি গছ পুলি ৰোপন কৰে ৷ ইয়াৰ পিছতে ধেমাজি মহাবিদ্যালয়ৰ মুকলি মঞ্চত ধেমাজি মহাবিদ্যালয়ৰ আছুৰ গোট , ধেমাজি মহাবিদ্যালয়ৰ ছাত্ৰ একতা সভা , জুবিন ফেন ক্লাৱৰ উদ্যোগত আয়োজিত অন্তৰংগ আলাপ অনুষ্ঠানত অংশ লয় ৷ জুবিন গাৰ্গৰ উপস্থিতিত অসংখ্য গুণমুগ্ধ আৰু শ শ ছাত্ৰ ছাত্ৰীয়ে এক উৎসৱমুখৰ পৰিৱেশ সৃষ্টি কৰা পৰিলক্ষিত হয় ৷ সকলোৱে উষ্ম সম্বৰ্ধনা জনাই মৰমৰ শিল্পীজনক ৷
ইপিনে শিল্পীগৰাকীয়ে ধেমাজিত চিত্ৰগৃহ অভাৱৰ বাবে দুখ প্ৰকাশ কৰি লক্ষীমপুৰত গৈ ছবিখন উপভোগ কৰিবলৈ আহ্বান জনাই ধেমাজিবাসীক ৷ অসমৰ আটাইকেইটা ছবিগৃহৰ লগতে অসমৰ বাহিৰৰ হায়দৰাবাদ , কলকাতা , পুনে দিল্লী মুক্তিত পাবলগীয়া ছবিখন পৰৱৰ্তী সময়ত ভাৰতৰ বাহিৰতো কাঞ্চনজংঘা প্ৰদশৰ্নৰ পৰিকল্পনা কৰিছে শিল্পীগৰাকীয়ে ৷ উল্লেখ্য যে, ৫ ছেপ্তেম্বৰত আনুষ্ঠানিকভাৱে কাঞ্চনজংঘাৰ প্ৰচাৰ অভিযান সামৰণি পৰিব ৷
