চিটাৰা ডেস্ক, ১৯ নৱেম্বৰ : ১৯ নৱেম্বৰত অৰ্থাৎ আজি ভাৰত আৰু অষ্ট্ৰেলিয়াৰ মাজত অনুষ্ঠিত হ’ব বিশ্বকাপৰ অন্তিমখন খেল । আজি আহমেদাবাদৰ নৰেন্দ্ৰ মোদী ষ্টেডিয়ামত অনুষ্ঠিত হ’ব এই খেলখন । এনে পৰিস্থিতিত সমগ্ৰ দেশতে এই মেচখনক লৈ যথেষ্ট উন্মাদনা দেখা গৈছে ।
বিশ্বকাপক লৈ চলচ্চিত্ৰ তাৰকাৰ মাজতো দেখা পোৱা গৈছে উৎসুকতা
মেচখনৰ বাবে এক আচৰিত উন্মাদনা দেখা পোৱা গৈছে চলচ্চিত্ৰ জগততো । হয়, চেলিব্ৰিটিসকলে অবিৰতভাৱে টিম ইণ্ডিয়াক জনাইছে শুভেচ্ছা ।
সনু ছুদে ক’লে জয় নিশ্চিত
শেহতীয়াকৈ বলীউডৰ অভিনেতা সনু ছুদে সংবাদ সংস্থা ANI ক কয় যে, ‘‘মই আগতীয়াকৈ টিম ইণ্ডিয়াক অভিনন্দন জনাব বিচাৰিছো । যেতিয়া দলত ইমানবোৰ ডাঙৰ ডাঙৰ খেলুৱৈ থাকে তেতিয়া জয় নিশ্চিত । সমগ্ৰ দেশে টিম ইণ্ডিয়াৰ জয়ৰ বাবে প্ৰাৰ্থনা কৰিছে আৰু কোনোবাই যেতিয়া হৃদয়ৰ পৰা প্ৰাৰ্থনা কৰে তেতিয়া তেওঁৰ প্ৰাৰ্থনা নিশ্চিতভাৱে পূৰ্ণ হয় । সকলোৰে শুভেচ্ছা টিম ইণ্ডিয়াৰ লগত আছে’’ ।
উৰ্বশী ৰাউটেলাইও জনালে অভিনন্দন
উৰ্বশী ৰাউটেলাইও মেচখনক লৈ প্ৰকাশ কৰিলে নিজৰ মনৰ আনন্দ । অভিনেত্ৰীগৰাকীয়ে কয়, ‘‘মই অতিশয় উৎসাহিত আৰু মই জানো যে টিম ইণ্ডিয়াই নিশ্চিতভাৱে ট্ৰফী লৈ আহিব’’ । ইফালে মেচ চাবলৈ পুৱাই আহমেদাবাদত উপস্থিত হৈছে উৰ্বশী ৰাউটেলা ।
ৰবীনা টেণ্ডনেও টিম ইণ্ডিয়াক জনালে অভিনন্দন । অভিনেত্ৰীগৰাকীয়ে কয়, ‘‘অল দ্য বেষ্ট টিম ইণ্ডিয়া । লেহৰা দুটা ত্ৰিৰংগা । জয় হিন্দ জয় ভাৰত’’ ৷ ইফালে পুলকিত সম্ৰাটে ক’লে আজি ৰাষ্ট্ৰীয় বন্ধ আৰু নিশা সমগ্ৰ দেশে টিম ইণ্ডিয়াৰ বিজয় উদযাপন কৰিব । আমাৰ প্ৰাৰ্থনা টিম ইণ্ডিয়াৰ সৈতে ।
পংকজ ত্ৰিপাঠীয়ে ভিডিঅ’ শ্বেয়াৰ কৰি কয়, "টিম ইণ্ডিয়াৰ সকলো খেলুৱৈলৈ মোৰ ফালৰ পৰা শুভেচ্ছা জনালো । আপোনালোকে ভাল খেলে, জয়ী হয় আৰু আমাক আপোনালোকৰ বাবে গৌৰৱ কৰাৰ বহু সুযোগ দিয়ে’’ ।
অভিনেতা অনুপম খেৰেও ভিডিঅ’ বাৰ্তাযোগে মেন ইন ব্লুৰ বাবে শুভেচ্ছা জ্ঞাপন কৰি কয়, "আজি ভাৰত বনাম অষ্ট্ৰেলিয়াৰ ফাইনেল । ভাৰতৰ জয় সমগ্ৰ বিশ্বতে শুনা যাব । আমি ১০০ শতাংশ জয়ী হ'ম’’ ।
