মৰাণ, 2 মে’: ‘‘ক'ভিডক লৈ এতিয়া চিন্তা কৰিব নালাগে, এতিয়া কাম-কাজত জপিয়াই পৰিব লাগে ৷’’ দেওবাৰে সোণাৰিত উপস্থিত হৈ নিৰ্মীয়মান চৰাইদেউ জিলা চিকিৎসালয়ৰ (Charaideo Medical College) কাম-কাজৰ অগ্ৰগতিৰ বুজ লৈ মুখ্যমন্ত্ৰী ড৹ হিমন্ত বিশ্ব শৰ্মাই এই কথা মন্তব্য কৰে (CM Himanta Biswa Sarma reacts on Covid-19 Situation) ৷
দুদিনীয়া কাৰ্যসূচীৰে শিৱসাগৰ আৰু চৰাইদেউ জিলা ভ্ৰমণৰ বাবে অহা মুখ্যমন্ত্ৰী গৰাকীয়ে ক'ভিডক লৈ প্ৰতিক্ৰিয়া প্ৰকাশ কৰি কয় যে, দুটা বছৰ ক'ভিড পৰিস্থিতিৰ বাবে সকলোৰেই যথেষ্ট ক্ষতি হৈছে । এতিয়া অৰ্থনৈতিক কামকাজত জড়িত হ'ব লাগে । লগতে ক'ভিডৰ কথা বিলাক প্ৰচাৰ কৰি থাকিলেও ৰাইজৰ মাজত শংকা সৃষ্টি হয় । সেয়ে এই বিষয়ৰ পৰা সকলোকে আঁতৰি থাকিবলৈ আহ্বান জনালে মুখ্যমন্ত্ৰী গৰাকীয়ে ।
ইফালে, দুটা বছৰ ক'ভিড পৰিস্থিতিৰ পাছত পুনৰ ক'ভিডে বিভিন্ন ৰাজ্যৰ লগতে অসমতো মূৰ দাঙি উঠিব ধৰাৰ সময়তে ৰাইজৰ মাজত এক শংকা আৰম্ভ হৈছিল । আনহাতে অসমৰ কোনো কোনো জিলাত বিগত কেইটামান দিনত দুই এজনৰ দেহত ক'ভিড পজিটিভো ধৰা পৰিছিল ।
ইয়াৰ পাছতে ৰাজ্যৰ স্বাস্থ্যমন্ত্ৰী গৰাকীয়ে ক'ভিডক লৈ নতুন SOP প্ৰদান কৰাৰ সম্ভাৱনা থকাৰ কথা উল্লেখ কৰিছিল । পিছে এই সম্ভাৱনা মষিমূৰ কৰি মুখ্যমন্ত্ৰীয়ে সকলোকে অৰ্থনৈতিক কাম-কাজত জড়িত হ’বলৈ আহ্বান জনালে ৷
লগতে পঢ়ক: নিৰ্মীয়মান চৰাইদেউ জিলা চিকিৎসালয়ৰ অগ্ৰগতিৰ বুজ ল'লে মুখ্যমন্ত্ৰীয়ে
