নিউজ ডেস্ক, ১৯ ছেপ্টেম্বৰ : পুৰণি সংসদ ভৱনক ইতিহাসৰ পৃষ্ঠাত বন্দী কৰি মঙলবাৰৰ পৰা নতুন সংসদ ভৱনত আৰম্ভ হৈছে সংসদৰ বিশেষ অধিবেশন । এই ঐতিহাসিক দিনটোত প্ৰধানমন্ত্ৰী নৰেন্দ্ৰ মোদীয়ে সংকীৰ্ণ মানসিকতাৰ ঊৰ্ধ্বলৈ গৈ বিশ্ব মঞ্চত কাম কৰাৰ দেশৰ আকাংক্ষাক অগ্ৰাধিকাৰ দিয়াৰ প্ৰয়োজনীয়তাৰ ওপৰত গুৰুত্ব আৰোপ কৰে ।
"প্ৰতিৰক্ষা, শক্তি, উৎপাদন খণ্ড, কৃষিৰ দৰে সকলো ক্ষেত্ৰতে স্বাৱলম্বী হোৱাৰ সময় আহি পৰিছে । মে'ক ইন ইণ্ডিয়া সামগ্ৰীবোৰ বিশ্বৰ সৰ্বশ্ৰেষ্ঠ হিচাপে প্ৰতিষ্ঠা কৰিবলৈ আমাৰ ওচৰত একাগ্ৰতা আৰু দৃঢ়তা থাকিব লাগিব । আহক আমি সকলোৱে এই কথা মনত ৰাখোঁ, যিয়ে আমাক বিশ্ব মঞ্চত ডাঙৰ কাম কৰাৰ মানসিকতাক সবল কৰে ।" প্ৰধানমন্ত্ৰী মোদীয়ে কয় ।
তেওঁ গণেশ চতুৰ্থীৰ পৱিত্ৰ দিনটোত নতুন সংসদ ভৱনত প্ৰৱেশ কৰাটোক এক মাইলৰ খুঁটি হিচাপে অভিহিত কৰে । "আজি আমি নতুন সংসদ ভৱনত এক নতুন ভৱিষ্যতৰ আৰম্ভণি কৰিবলৈ গৈ আছোঁ । আজি আমি উন্নত ভাৰতৰ সংকল্প পূৰণ কৰাৰ সংকল্পলৈ নতুন ভৱনলৈ গৈ আছোঁ ।" প্ৰধানমন্ত্ৰী নৰেন্দ্ৰ মোদীয়ে কয় ।
"অমৃত কালৰ ২৫ বছৰত ভাৰতে এক ডাঙৰ কেনভাছত কাম কৰিব লাগিব । আমাৰ সৰু সৰু বিষয়ত লাগি থকাৰ সময় শেষ হৈছে । প্ৰথমতে আমি আত্মনিৰ্ভৰ ভাৰত হোৱাৰ লক্ষ্য পূৰণ কৰিব লাগিব... এয়া সময়ৰ আহ্বান, এয়া সকলোৰে কৰ্তব্য । এই ক্ষেত্ৰত দলৰ কথা নাহে । চিৰফ দিল চাহিয়ে, দেশ কে লিয়ে চাহিয়ে ।" তেওঁ লগতে কয় ।
তেওঁ লগতে কয় যে তেওঁৰ চৰকাৰে সন্ত্ৰাসবাদৰ বিৰুদ্ধে যুঁজ আৰু দেশত বিধ্বংসী কাৰ্যকলাপৰ মোকাবিলা কৰাৰ লগতে বিপদৰ বিৰুদ্ধে মাত মাতিবলৈ এক গুৰুত্বপূৰ্ণ ভূমিকা লৈছে । প্ৰধানমন্ত্ৰী মোদীয়ে লগতে কয় যে সামাজিক সুৰক্ষা আৰু সমতা নিশ্চিত কৰাটো তেওঁৰ চৰকাৰৰ অন্যতম লক্ষ্য হৈ আছে ।
তেওঁ আৰু কয় যে অতীজৰ শিকলিৰ পৰা এতিয়া মুক্ত হোৱাৰ সময়, যিয়ে দেশবাসীক শিকলিৰে বান্ধি ৰাখিছিল ।
"ভাৰতৰ শাসন আৰ্হি বিশ্বজুৰি স্বীকৃত হৈ আহিছে । নতুন সংসদৰ পৰা যাব প্ৰতিটো বাৰ্তা । মানৱ সম্পদ বিশেষকৈ ভাৰতৰ সৰ্ববৃহৎ যুৱ জনসংখ্যা ব্যৱহাৰ কৰোঁ আহক । আমাৰ যুৱ প্ৰজন্মৰ ওপৰত মোৰ সম্পূৰ্ণ বিশ্বাস আছে । ভাৰতে জনশক্তিৰ চাহিদা পূৰণ কৰিব পাৰে । আমাৰ চৰকাৰৰ অন্যতম মুখ্য গুৰুত্ব হৈছে দক্ষতা বিকাশ ।" প্ৰধানমন্ত্ৰীয়ে কয় ।
লগতে পঢ়ক :India expels Canadian diplomats: ২৪ ঘণ্টাৰ ভিতৰতে কানাডাক তীব্ৰ প্ৰত্যুত্তৰ ভাৰতৰ
