নেশ্যনেল ডেস্ক,১৭ এপ্ৰিল: ইতিমধ্যে দেশৰ বিভিন্ন স্থানত অতি ভয়ংকৰ ৰূপ লৈছে কৰ'ণা মহামাৰীয়ে । বহু ঠাইৰ হাস্পতালত বিচনা, অক্সিজেন আৰু প্ৰতিষেধকৰ নাটনি হোৱা দেখিবলৈ পোৱা গৈছে । সকলো অভিলেখ ভংগ কৰি দেশত দৈনিক হিচাপত আক্ৰান্ত হৈছে সৰ্বাধিক ২ লাখ ৩৪ হাজাৰ ৬৯২ গৰাকী লোক । শনিবাৰৰ দিনটোলৈ মুঠ আক্ৰান্তৰ সংখ্যা হ'লগৈ ১ কোটি ৪৫ লাখ ২৬ হাজাৰ ৬০৯ গৰাকী লোক ।
আনহাতে, চৰকাৰে দেশজুৰি কৰ'ণা প্ৰতিষেধক অভিযান অব্যাহত ৰাখিছে যদিও আক্ৰান্তৰ সংখ্যা ভয়ংকৰভাৱে বৃদ্ধি হোৱাত সমালোচনাৰ সন্মুখীন হৈছে চৰকাৰ । বিৰোধী পক্ষই বিভিন্ন ধৰণে সমালোচনা কৰা দেখা গৈছে বিজেপি নেতৃত্বধীন কেন্দ্ৰীয় চৰকাৰক । কংগ্ৰেছ নেতা ৰাহুল গান্ধীৰ এইবাৰ আক্ৰামণ মোডী চৰকাৰক । এই ভয়ংকৰ পৰিৱেশক মোডীয়ে সৃষ্টি কৰা দুৰ্যোগ আখ্যা ৰাহুল গান্ধীৰ ।
শ্মশান আৰু কবৰস্থানত মৃতদেহ ভৰি যোৱা দৃশ্য দেখি ৰাহুল গান্ধীয়ে টুইটযোগে তীব্ৰ ভাষাৰে গৰিহণা দিয়ে মোডী চৰকাৰক । শ্মশান আৰু কবৰস্থানৰ ক্ষেত্ৰত মোডী চৰকাৰে যি প্ৰতিশ্ৰুতি দিছিল সেয়া পূৰণ কৰা বুলিও উল্লেখ কৰে কংগ্ৰেছ নেতাগৰাকীয়ে ।
ৰাহুল গান্ধীয়ে টুইটত উল্লেখ কৰে যে মোডী চৰকাৰে কেৱল উৎসৱৰ অজুহাত দিয়ে কিন্তু পৰীক্ষা হোৱা নাই, হাস্পতালত বিচনা নাই, ভেণ্টিলেটৰ নাই, অক্সিজেন নাই আৰু প্ৰতিষেধক নাই । এইবোৰৰ কথাত গুৰুত্ব আছে নে প্ৰধানমন্ত্ৰীৰ বুলিও প্ৰশ্ন কৰে ৰাহুল গান্ধীয়ে ।
লগতে পঢ়ক: কৰ'ণাত আক্ৰান্ত কৰ্ণাটকৰ মুখ্যমন্ত্ৰী
