নেশ্যনেল ডেস্ক, ১৩ এপ্ৰিল: বৈশাখী উৎসৱ উপলক্ষে পঞ্জাৱ, হাৰিয়ানাৰ গুৰুদ্বাৰলৈ আগমণ ঘটিছে ভক্তৰ । অমৃতসৰৰ স্বৰ্ণ মন্দিৰ হিচাপে খ্যাত হৰমন্দিৰ চাহিবতো ভিৰ কৰিছেহি ভক্তই । দশম শিখ গুৰু গোবিন্দ সিঙৰ 'খালছা পন্থ'ৰ প্ৰতিষ্ঠা দিৱস পালন কৰা হয় । এই উৎসৱে শস্য চপোৱাৰ বতৰ আৰম্ভ হোৱাৰো সংকেত দিয়ে ।
মুখ্যমন্ত্ৰী অমৰিন্দৰ সিঙে পঞ্জাৱী লোকসকললৈ 'খালছা পন্থ'ৰ প্ৰতিষ্ঠা দিৱস আৰু বৈশাখীৰ শুভেচ্ছা জ্ঞাপন কৰে । এক বাৰ্তাৰ জৰিয়তে তেওঁ জনসাধাৰণক পঞ্জাৱৰ শতিকাজোৰা পুৰণি সাংস্কৃতিক ঐতিহ্যৰ কথা সোঁৱৰাই দিয়ে আৰু এই পৰম্পৰাসমূহ অক্ষুণ্ণ ৰাখিবলৈ সকলোকে আহ্বান জনায় ।
১৬৯৯ চনৰ এই পৱিত্ৰ দিনটোতে গুৰু গোবিন্দ সিঙে বিভিন্ন জাতিৰ 'পঞ্জ পেয়াৰাছে' (প্ৰিয়জন)ৰে শ্ৰী আনন্দপুৰ চাহিবত 'অৰ্ডাৰ অফ খালছা' ৰচনা কৰিছিল । খালচা পন্থ স্থাপনে সাম্প্ৰদায়িক সম্প্ৰীতিৰ লগতে মানৱ জাতিৰ মাজত সহানুভূতিৰ ভাৱ প্ৰচাৰ কৰি সমাজত সমতা গঢ়ি তোলাত অৰিহণা যোগাইছিল ।
জনসাধাৰণক ভাতৃত্ববোধ জীয়াই ৰাখি ঐতিহাসিক উৎসৱটি উদযাপন কৰিবলৈ আহ্বান জনায় মুখ্যমন্ত্ৰীগৰাকীয়ে । ক'ভিড-১৯ প্ৰট'কল মানি চলিবলৈও ৰাইজক অনুৰোধ কৰে ।
লগতে পঢ়ক:উত্তৰ প্ৰদেশ পঞ্চায়ত নিৰ্বাচনঃ যোগেশ বাৰ্মা, পৱন গুপ্তাক আটক
