যোৰহাট, 19 ছেপ্টেম্বৰ : কোন দিশে গতি কৰিছে আজিৰ প্ৰজন্ম ! প্ৰথমে প্ৰেম, তাৰ পাচত প্ৰত্যাখ্যান আৰু শেষত প্ৰতিশোধ - এয়া যেন বৰ্তমান সময়ত এক সাধাৰণ ঘটনালৈ পৰিণত হৈছে ৷ দুদিন যদি এটা সম্পৰ্কত হাঁহি-মাতি থাকে, তাৰ কিছু দিনৰ পাচতে প্ৰেমিক যুগলৰ মাজত কোনো কাৰণ আহি পৰে বিচ্ছেদ ৷ সেই বিচ্ছেদে পৰৱৰ্তী সময়ত প্ৰতিশোধলৈ ৰূপান্তৰিত কৰে ৷ এয়াই নেকি আজিৰ প্ৰেম !
প্ৰেম, প্ৰত্যাখ্যান আৰু প্ৰতিশোধ - চিনেমাৰ দৰে লগা এক ঘটনা সংঘটিত হৈছে যোৰহাটত ৷ তথ্য অনুসৰি, যোৰহাটৰ চিনেমৰা আৰক্ষী থানাৰ অন্তৰ্গত ৰজাবাৰীৰ নিবাসী এগৰাকী কিশোৰীৰ লগত সংঘটিত হৈছে এক অঘটন ৷ অভিযোগ অনুসৰি, অভিযান্ত্ৰিক শাখাত অধ্যয়নৰত কিশোৰীকক ব্লেডেৰে ডিঙি ৰেপি হত্যাৰ চেষ্টা কৰে তেওঁৰ প্ৰাক্তন প্ৰেমিকে ।
- কেনেকৈ সংঘটিত হৈছিল এই ঘটনা :
যোৰহাট এখন আগশাৰীৰ শিক্ষা প্ৰতিষ্ঠানত কৃষি সম্পৰ্কীয় বিষয়ত অভিযান্ত্ৰিক শাখাত অধ্যয়ন কৰি থকা এগৰাকী 17 বছৰীয়া ছাত্ৰী ঘৰৰ কাষৰে ৰোহিত ৰাজপুত নামৰ এগৰাকী যুৱকৰ সৈতে প্ৰেমৰ সম্পৰ্কত আছিল ৷ কিন্তু বিগত কিছু মাহৰ পৰা তেওঁলোকৰ মাজত কিছু সংঘাতে হৈছিল ৷ যাৰ বাবে কিশোৰীগৰাকীয়ে যুৱকজনৰ সৈতে থকা প্ৰেমৰ সম্পৰ্কক বিচ্ছেদ কৰিছিল ৷ এই কথা কিশোৰীগৰাকীয়ে নিজেই সংবাদ মাধ্যমৰ আগত উল্লেখ কৰে ৷
তেওঁ অভিযোগ কৰা মতে, প্ৰেমৰ সম্পৰ্কক বিচ্ছেদ হোৱাৰ পাচতো বহুবাৰ যুৱকজনে কিশোৰীগৰাকীৰ সৈতে সম্পৰ্ক স্থাপন কৰিবলৈ চেষ্টা কৰিছিল ৷ কিন্তু কিশোৰীগৰাকীয়ে প্ৰাক্তন প্ৰেমিকৰ কোনো কথাই মানি ল’বলৈ মান্তি হোৱা নাছিল ৷ মঙলবাৰে নিশা কিশোৰীগৰাকীৰ ঘৰৰ পিছফালে লুকাই আছিল অভিযুক্ত যুৱকজন ৷ কিশোৰীগৰাকীয়ে ঘৰৰ পিছফালে থকা স্নানাগাৰলৈ অহাৰ অহাৰ সময়তে যুৱকজনে তেওঁক পিছফালৰ পৰা ধৰি ব্লেডেৰে ডিঙি ৰেপি হত্যাৰ চেষ্টা কৰে ৷
পৰৱৰ্তী সময়ত ঘটনাস্থলীত কিশোৰীগৰাকীৰ ঘৰৰ মানুহক প্ৰত্যক্ষ কৰাত উক্ত স্থানৰ পৰা পলায়ন কৰে যুৱকজনে । পিছত তেজেৰে লুতুৰি-পুতুৰি হৈ থকা কিশোৰীগৰাকীক যোৰহাট চিকিৎসা মহাবিদ্যালয় আৰু হাস্পতালত ভৰ্তি কৰোৱা হয় । চিকিৎসাৰ অন্তত বৃহস্পতিবাৰে কিশোৰীগৰাকীক ঘৰলৈ যাবলৈ অনুমতি দিয়ে চিকিৎসালয় কৰ্তৃপক্ষই ৷
ইফালে বৃহস্পতিবাৰে সমগ্ৰ ঘটনা সন্দৰ্ভত কিশোৰীগৰাকীৰ লগতে তেওঁৰ পিতৃ যোৰহাট চিনামৰা আৰক্ষী থানাত উপস্থিত হৈ অভিযুক্ত যুৱক ৰোহিত ৰাজপুতৰ বিৰুদ্ধে দাখিল কৰে এক এজাহাৰ ৷ এই এজাহাৰৰ ভিত্তিতে অভিযুক্ত ৰোহিতক আটক কৰে আৰক্ষীয়ে ৷
