নিউজ ডেস্ক, ১১ ছেপ্টেম্বৰ: অনলাইন ট্ৰেডিং কেলেংকাৰীৰ অন্যতম অভিযুক্ত তথা পলাতক চুমী বৰাৰ স্বামী তাৰ্কিক বৰাৰ ভাতৃ অম্লান বৰাক বুধবাৰে আৰক্ষীয়ে গ্ৰেপ্তাৰ কৰিছে ৷ অসম আৰক্ষীয়ে বিহাৰৰ পৰা গ্ৰেপ্তাৰ কৰে অম্লান বৰাক । জানিব পৰা মতে, ঝাৰখণ্ডৰ পৰা গুৱাহাটীলৈ আহি থকা অৱস্থাত বিশেষ টাস্ক ফ’ৰ্চে অম্লান বৰাক গ্ৰেপ্তাৰ কৰে ।
অনলাইন ট্ৰেডিং প্ৰৱঞ্চনাৰ গোচৰত ডিব্ৰুগড় আৰক্ষীয়ে বিশাল ফুকনক গ্ৰেপ্তাৰ কৰাৰ পাছৰে পৰা পলাতক অৱস্থাত আছে চুমী বৰা আৰু স্বামী তাৰ্কিক বৰা ৷ দুয়োকে বিচাৰি বৰ্তমান অসম আৰক্ষীয়ে অভিযান অব্যাহত ৰাখিছে ৷ একে সময়তে চি আই ডিয়ে এছ আই টি গঠন কৰি দুয়োকে বিচাৰি অভিযান অব্যাহত ৰাখিছে ৷ অসমৰ লগতে বহিঃৰাজ্যতো অভিযান চলাই আছে আৰক্ষী আৰু এছ টি এফ দলে ৷
তদন্তকাৰী দলে চুমী আৰু স্বামী তাৰ্কিক বৰাৰ কোনো সন্ধান বৰ্তমান পৰ্যন্ত উদ্ধাৰ কৰিবলৈ সক্ষম হোৱা নাই যদিও তেওঁলোকৰ সৈতে সম্পৰ্ক ৰক্ষা কৰি থকা কেইবাজনকো আটক কৰিবলৈ সক্ষম হৈছে ৷ বোকাখাত আৰক্ষীয়ে সোমবাৰে নিশা চুমী-তাৰ্কিকৰ লগত সম্পৰ্ক ৰখাৰ অভিযোগত বোকাখাতৰ মিলনপুৰৰ চন্দন নাথ আৰু লতাবাৰীৰ শোভনজ্যোতি কুৰ্মী নামৰ দুজন লোকক আটক কৰে ।
আৰক্ষীৰ সূত্ৰ অনুসৰি যোৱা সপ্তাহত শোভনজ্যোতিৰ ঘৰত আশ্ৰয় লৈছিল চুমী-তাৰ্কিকে । এই কাৰ্যত চন্দন নাথেও সহযোগ কৰাৰ তথ্য লাভ কৰিছিল আৰক্ষীয়ে । ইয়াৰ পাছত আজি বিশেষ টাস্ক ফ’ৰ্চে বিহাৰৰ পৰা গ্ৰেপ্তাৰ কৰে অম্লান বৰাক ৷ অম্লানক গ্ৰেপ্তাৰ কৰাৰ পূৰ্বে এছ টি এফে বৰাই ব্যৱহাৰ কৰা ফৰ্চুনাৰ গাড়ীখনো জব্দ কৰিছে বুলি জানিব পৰা হৈছে ।
