গুৱাহাটী, 9 ছেপ্টেম্বৰ : সুধাকণ্ঠ ড৹ ভূপেন হাজৰিকাৰ 99 সংখ্যক ওপজা দিন । ওপজা দিন উপলক্ষে দেওবাৰে পুৱাৰে পৰা ৰাজ্যজুৰি অনুষ্ঠিত কৰা হয় ভিন্ন কাৰ্যসূচী । মহানগৰীৰ গুৱাহাটী ক্লাবত অসমৰ অগ্ৰণী সামাজিক-সাংস্কৃতিক অনুষ্ঠান নিউ আৰ্ট প্লেয়াৰ্ছ আৰু প্ৰাগজ্যোতি কমিউনিকেশ্যনচৰ যৌথ উদ্যোগত নিউ আৰ্ট প্লেয়াৰ্ছৰ নিৰ্মীয়মান প্ৰেক্ষাগৃহত অনুষ্ঠিত কৰা হয় সুধাকণ্ঠৰ ওপজা দিনৰ কাৰ্যসূচী ।
প্ৰাগজ্যোতি কমিউনিকেশ্যনচৰ অধ্যক্ষ দীপাংক হাজৰিকাই আঁতধৰা এই অনুষ্ঠানৰ আৰম্ভণিতে নিউ আৰ্ট প্লেয়াৰ্ছৰ সভাপতি অজয় কুমাৰ দত্তই সুধাকণ্ঠক স্মৰণ কৰাৰ লগতে উপস্থিত অতিথিসকলক আদৰণি জনায় ৷ উক্ত অনুষ্ঠানত যশস্বী আবৃত্তিকাৰ উপম শইকীয়াৰ পৰিচালনাত ‘‘শব্দম স্কুল অৱ ৰিচাইটেচন’’ৰ ছাত্ৰ-ছাত্ৰীসকলে সুধাকণ্ঠৰ কালজয়ী গীত পৰিৱেশনৰ লগতে নৃত্যৰো এক অনুষ্ঠান পৰিৱেশন কৰে ।
অনুষ্ঠানত মুখ্য বক্তা হিচাপে উপস্থিত থাকে অসমৰ বিশিষ্ট তবলাবাদক, শাস্ত্ৰীয় সংগীতৰ গৱেষক তথা ইউনেস্ক’ৰ অন্তৰ্গত সংস্থা আইক’মচৰ আন্তঃৰাষ্ট্ৰীয় বিশেষজ্ঞ দিলীপ চাংকাকতি । চাংকাকতিয়ে সুধাকণ্ঠ ড৹ ভূপেন হাজৰিকাৰ শাস্ত্ৰীয় সংগীতৰ শিক্ষা আৰু তেখেতৰ গীতত ইয়াৰ প্ৰয়োগ সন্দৰ্ভত এক তথ্যসমৃদ্ধ বক্তব্য প্ৰদান কৰাৰ লগতে অনুষ্ঠানত উপস্থিত অতিথিসকলৰ সৈতে এটি অন্তৰংগ আলাপত মিলিত হয় ৷
লগতে পঢ়ক : সুধাকণ্ঠলৈ সন্মান, প্ৰতিচ্ছবি অংকনেৰে গঢ়িলে ৰেকৰ্ড - Bhupen Hazarika
ইফালে এই অনুষ্ঠানতে নিউ আৰ্ট প্লেয়াৰ্ছৰ শিল্পীসকলে সুধাকণ্ঠৰ কালজয়ী গীতৰ আধাৰত বিভিন্ন অনুষ্ঠান পৰিৱেশন কৰে ৷ বিশিষ্ট সত্ৰীয়া নৃত্যশিল্পী ডাঃ মিৰনন্দা বৰঠাকুৰৰ সুধাকণ্ঠৰ গীতৰ সুৰত নৃত্য আৰু দেৱাশী শৰ্মা তামুলী, ভূষান তালুকদাৰ আৰু গৰিষ্ঠা শৰ্মাই পৰিৱেশন কৰা দলীয় নৃত্যই দৰ্শকৰ প্ৰসংশা লাভ কৰে ৷
পৰৱৰ্তী কাৰ্যসূচীত বিশিষ্ট সুৰকাৰ, সংগীত পৰিচালক অনুপম চৌধুৰীৰ পৰিচালনাত নিউ আৰ্ট প্লেয়াৰ্ছৰ মহিলা শিল্পীসকল ক্ৰমে সুনয়না গোস্বামী, চেমিমা খাতুন, ড৹ মল্লিকা শইকীয়া বৰুৱা, নিৰদা চক্ৰৱৰ্তী আৰু ইনা চক্ৰৱৰ্তীৰ কণ্ঠত বৃন্দগান আৰু কৃতাঞ্জলি গোস্বামীয়ে পৰিৱেশন কৰা ভূপেন্দ্ৰ সংগীতে দৰ্শকৰ ভূয়সী প্ৰসংশা লাভ কৰে ৷
অনুষ্ঠানৰ শেষত অনুপম চৌধুৰীৰ একৰডিয়ানত সুধাকণ্ঠৰ কালজয়ী গীতৰ সুৰ বজাই প্ৰেক্ষাগৃহত উপস্থিত সকলোকে মন্ত্ৰমুগ্ধ কৰি ৰাখে ৷ ইফালে এই অনুষ্ঠানত গুৱাহাটী ৰিডাৰ্ছ ফ'ৰামৰ সদস্যসকলেও সক্ৰিয় সহযোগ কৰে ৷