স্প’ৰ্টছ ডেস্ক, 30 আগষ্ট: পেৰিছ পেৰালিম্পিক 2024 ৰ তৃতীয় দিনা সুন্দৰ প্ৰদৰ্শন অব্যাহত ৰাখিছে ভাৰতীয় খেলুৱৈসকলে । ভাৰতীয় শ্বুটাৰ মনীষ নৰৱালে আশ্চৰ্যজনক প্ৰদৰ্শন দাঙি ধৰি দেশলৈ কঢ়িয়াই আনিছে দিনটোৰ চতুৰ্থটো পদক ৷ নৰৱালে পুৰুষৰ 10 মিটাৰ এয়াৰ পিষ্টল(এছ এইচ1) ইভেণ্টত প্ৰতিদ্বন্দ্বিতা আগবঢ়াই জয় কৰে ৰূপৰ পদক ৷
উল্লেখ্য যে, 28 আগষ্টৰ পৰা আৰম্ভ হৈছে পেৰিছ পেৰালিম্পিক 2024 ৷
ৰূপৰ পদক অৰ্জন মনীষৰ
মনীষে শুকুৰবাৰে পেৰিছ পেৰালিম্পিক 2024 ত পুৰুষৰ 10 মিটাৰ এয়াৰ পিষ্টল (এছ এইচ1) ইভেণ্টত 234.9 পইণ্ট অৰ্জন কৰি জয় কৰে ৰূপৰ পদক ৷ এই শাখাত কোৰিয়াৰ জো জংডুৱে 237.4 পইণ্টৰে জয় কৰে স্বৰ্ণ ৷ লগতে চীনৰ ইয়ং চাওৱে 214.3 পইণ্টৰ সৈতে ব্ৰঞ্জৰ পদক দখল কৰে ।
𝐍𝐞𝐰𝐬 𝐅𝐥𝐚𝐬𝐡: 𝐌𝐚𝐧𝐢𝐬𝐡 𝐍𝐚𝐫𝐰𝐚𝐥 𝐰𝐢𝐧𝐬 𝐒𝐢𝐥𝐯𝐞𝐫 𝐦𝐞𝐝𝐚𝐥 𝐢𝐧 𝐒𝐡𝐨𝐨𝐭𝐢𝐧𝐠 𝐚𝐭 𝐏𝐚𝐫𝐚𝐥𝐲𝐦𝐩𝐢𝐜𝐬.
— India_AllSports (@India_AllSports) August 30, 2024
Its 4th medal for India so far. #Paralympics2024 #Paris2024 pic.twitter.com/0uikRIPRe3
শ্বুটিঙত ভাৰতৰ তৃতীয়টো পদক লাভ
ৰূপৰ পদকৰ সৈতে মনীষ পেৰালিম্পিক 2024 ত ভাৰতৰ হৈ পদক জয় কৰা তৃতীয়গৰাকী শ্বুটাৰত পৰিণত হৈছে ৷ ইয়াৰ পূৰ্বে দিনটোৰ মাজভাগত অৱনী লেখাৰা আৰু মোনা আগৰৱালে ভাৰতৰ হৈ শ্বুটিঙত ক্ৰমে স্বৰ্ণ আৰু ব্ৰঞ্জৰ পদক লাভ কৰিছিল । এতিয়া মনীষ হৈছে তৃতীয়গৰাকী শ্বুটাৰ, যিয়ে এই টুৰ্ণামেণ্টৰ তৃতীয় দিনা ভাৰতক পদক প্ৰদান কৰিছে ।
টকিঅ’ত মনীষে জয় কৰিছিল স্বৰ্ণ
টকিঅ’ পেৰালিম্পিক গেমছ 2020 ত স্বৰ্ণ জয় কৰিছিল মনীষে ৷ কিন্তু এইবাৰ খেলুৱৈগৰাকীয়ে স্বৰ্ণ জয়ৰ ধাৰা অব্যাহত ৰাখিব নোৱাৰিলে ৷ তাৰ সলনি ৰূপৰ পদকতে সন্তুষ্ট থাকিবলগীয়া হৈছে খেলুৱৈগৰাকী ৷ খেলুৱৈগৰাকীয়ে ভৱিষ্যতে এই ধাৰা অব্যাহত ৰাখিবলৈ সক্ষম হ’ব বুলি আশা প্ৰকাশ কৰা হৈছে ৷
