গুৱাহাটী, 7 জুন : লোকসভা নিৰ্বাচনৰ ফলাফলৰ ঘোষণাৰ পাছতে বিহাৰে দৃষ্টি আকৰ্ষণ কৰিছে অসমৰ । অৱশ্যে এই আকৰ্ষণৰ কাৰণ হৈছে দুজন ব্যক্তি । যি দুজন ব্যক্তিয়ে অসমৰ পৰা গৈ বিহাৰত নিৰ্বাচন খেলিছিল । এজন বিহাৰৰে যদিও অসমৰে আছে সু-সম্পৰ্ক আৰু আনজন অসমৰে । এজন ৰাজনীতিত নৱাগত আৰু আনজন ৰাজনীতিত পুৰণি ।
হয়, ঠিকেই অনুমান কৰিব পাৰিছে । আনন্দ মিশ্ৰ আৰু নৱ শৰণীয়াৰ কথাই কোৱা হৈছে । বিহাৰত নিৰ্বাচন খেলি কিমান ভোট পালে দুয়োজনে । এই প্ৰতিবেদনত তাৰেই কিছু আভাস দাঙি ধৰা হৈছে ।
আনন্দ মিশ্ৰ :
অসমৰ বাবে এটা অতি পৰিচিত নাম আনন্দ মিশ্ৰ । আৰক্ষী অধীক্ষক হিচাপে অসমত বিশেষ খ্যাতি লাভ কৰা আই পি এছ বিষয়া আনন্দ মিশ্ৰই ৰাজনীতিৰ পথাৰত খোজ দিয়াৰ বাবে ত্যাগ কৰিছিল চাকৰি । অসমৰ চুপাৰ কপ হিচাপে খ্যাত এইজন প্ৰাক্তন আই পি এছ বিষয়াই চাকৰি ত্যাগ কৰি জন্মভূমি বিহাৰলৈ গৈছিল আৰু বিজেপিৰ টিকট প্ৰত্যাশী আছিল ।
বিহাৰৰ বক্সাৰ সমষ্টিৰ পৰা বিজেপিৰ হৈ নিৰ্বাচন খেলাৰ ইচ্ছা আছিল আনন্দ মিশ্ৰৰ । কিন্তু সমষ্টিটোত বিজেপিয়ে প্ৰাৰ্থিত্ব দিলে মিথিলেশ তিৱাৰীক । বিজেপিৰ পৰা টিকট নাপালেও তেওঁ সমষ্টিটোৰ পৰা নিৰ্দলীয় প্ৰাৰ্থী হিচাপে অৱতীৰ্ণ হয় । আই পি এছ বিষয়া হিচাপে অসমত বিশেষ সুনাম অৰ্জন কৰিবলৈ সক্ষম হোৱা আনন্দ মিশ্ৰই ৰাজনীতিলৈ আহি খালে মুখথেকেচা ।
গৃহ ৰাজ্য বিহাৰত গৈ মুখথেকেচা খালে অসমৰ চুপাৰ কপে । বিহাৰৰ বক্সাৰ সমষ্টিত শোচনীয় পৰাজয়ৰ সন্মুখীন হয় আনন্দ মিশ্ৰই । ৪৭,৪০৯ টা ভোট পাই চতুৰ্থ স্থানতহে সন্তুষ্ট থাকিব লগা হʼল আনন্দ মিশ্ৰই । এতিয়া তেওঁৰ ভৱিষ্যত কি হ'ব সেয়া সময়েহে ক'ব । উল্লেখ্য যে, জানুৱাৰী মাহত বক্সাৰ সমষ্টিৰ পৰা বিজেপিৰ টিকট পোৱাৰ আশাৰে আনন্দ মিশ্ৰই চাকৰি ত্যাগ কৰিছিল ।
নৱ শৰণীয়া :
কোকৰাঝাৰ সমষ্টিৰ দুবাৰৰ সাংসদ নৱ শৰণীয়াই অসম এৰি বিহাৰত নিৰ্বাচন খেলি বেয়াকৈ মুখথেকেচা খালে । দুবাৰৰ সাংসদগৰাকীয়ে নিৰ্বাচনত লাজ লগাকৈ পৰাজয় স্বীকাৰ কৰিবলগা হয় । আনকি আমানতৰ ধনো বাজেয়াপ্ত হ'ল নৱ শৰণীয়াৰ ।
উল্লেখ্য যে নৱ শৰণীয়াই জনজাতিৰ বাবে সংৰক্ষিত ২ নং কোকৰাঝাৰ লোকসভা সমষ্টিৰ পৰা ২০১৪ আৰু ২০২৯ ত দুবাৰকৈ জয়লাভ কৰিবলৈ সক্ষম হৈছিল ৷ কিন্তু জাতিগত প্ৰমাণপত্রক লৈ থকা খেলিমেলিৰ বাবে এইবাৰ অন্তিম মূহুৰ্তত কোকৰাঝাৰত নিৰ্বাচনত অৱতীৰ্ণ হ'ব নোৱাৰিলে নৱ শৰণীয়াই ।
অসমত নিৰ্বাচন খেলিব নোৱাৰাৰ লগে লগে বিহাৰক বাচি ল'লে নৱ শৰণীয়াই । বাচি ল'লে বিহাৰৰ বাল্মীকি নগৰ লোকসভা সমষ্টিক । সমষ্টিটো জে ডি ইউৰ পৰম্পৰাগত আসন আৰু এন ডি এই এই আসনখন একেৰাহে দুটা দশক ধৰি দখল কৰি আহিছে ।
তথাপিও বহু আশা লৈ তেওঁ সমষ্টিটোৰ পৰা নিৰ্বাচনত অৱতীৰ্ণ হয় । কিন্তু আশা কৰা ধৰণে তেওঁ ফলাফল নাপালে । তেওঁ লাভ কৰিলে মাত্র ১১,৪২৩ টা ভোট ।
