"তুলসীৰ তলে তলে মৃগপহু চৰে, তাকে দেখি ৰামচন্দ্ৰই শৰ-ধনু ধৰে"- শৈশৱৰ ভাল লগা দিনৰ স্মৃতি ৰোমন্থন কৰাৰ সুযোগ দিয়ে এই শাৰী কেইটাই । আজি কাতি বিহু । অসমীয়াৰ তিনি বিহুৰ অন্যতম হ’ল এই কাতি বিহু যাক কঙালী বিহু বুলিও কোৱা হয় । আহিন আৰু কাতি মাহৰ সংক্ৰান্তিৰ দিনা পালন কৰা এই কাতি বিহুক লৈ আজি ব্যস্ত হৈ পৰিছে প্ৰতিজন চহা অসমীয়া । কাতি বিহুৰ দিনা পুৱাৰে পৰাই ব্যস্ততা আৰম্ভ হয় । চোতালৰ এচুকত ভেটি সাজি তাত তুলসী পুলি এটা ৰুই সন্ধিয়ালৈ তাৰ তলত চাকি, ধূপ-ধূনা জ্বলাই প্ৰাৰ্থনা কৰা হয় ৷ কাতি বিহুৰ সৈতে তুলসীৰ এক বিশেষ সম্পৰ্ক আছে ৷ অতীজৰে পৰা আমাৰ অসমীয়া সমাজে কাতি বিহুৰ দিনা তুলসী পুলি ৰুই তুলসী দেৱীক সেৱা জনাই আহিছে ৷
কাতি বিহুত ৰোৱা এই তুলসী আমাৰ স্বাস্থ্যৰ কিমান উপকাৰী ইয়াৰ বিষয়ে নতুনকৈ কোৱাৰ হয়তো কোনো প্ৰয়োজন নাই ৷ আমি সকলোৱে জানো যে তুলসী পাতত বহুতো ঔষধি গুণ সন্নিৱিষ্ট হৈ থাকে ।
তুলসী পাত সাধাৰণতে দুই প্ৰকাৰৰ পোৱা যায় । এবিধ বেঙুনীয়া, আনবিধ সেউজীয়া । বেঙুনীয়া তুলসীক কৃষ্ণ তুলসী বা ক’লা তুলসী বুলিও কয় । তুলসী পাতে আমাৰ শৰীৰৰ বহু ৰোগ নিৰাময় কৰাত সহায় কৰে । প্ৰতিদিনে তুলসী পাতৰ ৰস সেৱন কৰিলে কাহ বা শ্বাস-প্ৰশ্বাসজনিত ৰোগসমূহৰ পৰা সকাহ পাব পাৰি ।
নিয়মীয়াকৈ তুলসী পাতৰ ৰস সেৱন কৰিলে ছাইনাছ, মাইগ্ৰেইন, দুশ্চিন্তা আদিৰ পৰা নিৰাময় পাব পাৰি বুলি চিকিৎসা বিজ্ঞান তথা গৱেষণাতো প্ৰমাণিত হৈছে । তুলসী পাতত থকা এণ্টিবেক্টেৰিয়েল উপাদানে বহু ৰোগ সংক্ৰমণো ৰোধ কৰিব পাৰে ।
তুলসী পাতৰ অন্যান্য লাভালাভসমূহ আজি এই প্ৰতিবেদনৰ জৰিয়তে জানো আহক-
১) তুলসীৰ পাতে মধুমেহ ৰোগ নিয়ন্ত্ৰণ কৰি ৰখাত সহায় কৰে ৷
২) তুলসী পাতে স্নায়ৱিক দুৰ্বলতা দূৰ কৰে ৷
৩) তুলসী পাতে তেজ পৰিষ্কাৰ কৰাতো সহায় কৰে ৷
৪) উচ্চ ৰক্তচাপৰ বাবে তুলসী পাতৰ ৰস লগত হালধিৰ ৰস মিহলাই সেৱন কৰিব পাৰে ৷
৫) তুলসীৰ পাত খালে আৰু তুলসীৰ পাতেৰে দাঁত ঘঁহিলে মুখৰ দুৰ্গন্ধ নোহোৱা হয় ৷
৬) চাহত তুলসী পাত মিহলাই খালে পেট তথা যকৃতৰ সৈতে জড়িত বিভিন্ন ৰোগ নিৰাময় হয় ৷
৭) তুলসী পাতৰ ৰস খালে বমি, পানী লগাৰ পৰা উপশম পাব পাৰি ৷
৮) কাহ, কফ, জ্বৰ আদি হ’লে তুলসীৰ ৰস মৌৰ লগত মিহলাই সেৱন কৰিব লাগে ৷
৯) তুলসীৰ পাত পানীত তিয়াই থৈ সেই পানীৰে ধুলে গাৰ ছাল সুস্থ হৈ থাকে ৷
১০) তুলসীৰ পাত নিয়মীয়াকৈ খালে গাৰ ছাল নিমজ আৰু সতেজ হয় ৷
ইয়াৰ উপৰিও বিভিন্ন গুণাগুণেৰে সমৃদ্ধ তুলসীত লুকাই আছে নানান ঔষধি শক্তি । অতীজৰে পৰা বিভিন্ন ৰোগৰ পৰা উপশম পাবলৈ তুলসী পাত ব্যৱহাৰ কৰি অহাৰ কথা আমি আমাৰ জ্যেষ্ঠ লোকৰ মুখেৰে শুনি আহিছো । শিশুৰ পৰা বৃদ্ধ অৱস্থাৰ সকলো ব্যক্তিয়ে বিভিন্ন ৰোগৰ পৰা উপশম পাবৰ বাবে তুলসী ব্যৱহাৰ কৰা দেখা যায় ।
