ভাৰত এখন বিশাল ভূমি, য'ত বৈচিত্ৰময় সংস্কৃতি আৰু বিভিন্ন খাদ্য সম্ভাৰৰ বাবে পৰিচিত । ভাৰতৰ ৰাজনৈতিক মানচিত্ৰত থকা বিভিন্ন ৰাজ্যসমূহ ইয়াৰ নিজস্ব পৰম্পৰা, উৎসৱ আৰু ৰীতি-নীতিয়েই নহয়, ইয়াৰ বৈচিত্ৰময় সুস্বাদু খাদ্যৰ বাবেও জনাজাত ।
আনহাতে, আমিষ অথবা নন-ভেজ খাদ্য বৰ্তমান জনপ্ৰিয় যদিও সকলোৱে এই খাদ্য্যাভাস ভাল নাপায় বা অনুসৰণ নকৰে । আজিৰ পৃথিৱীত নিৰামিষভোজীৰ সংখ্যা দ্ৰুতগতিত বৃদ্ধি পাইছে । ভাৰতত বিভিন্ন সংস্কৃতি তথা ধৰ্মৰ লোকে বাস কৰে আৰু প্ৰতিটো সংস্কৃতি বা ধৰ্মৰ নিজস্ব বিশেষ ব্যঞ্জন আৰু বেলেগ বেলেগ খাদ্য আছে । যিসকলে কয় যে নিৰামিষ খাদ্যত বৈচিত্ৰ্য নাথাকে, তেওঁলোকে জনা উচিত যে ভাৰতৰ বহু ঠাই আছে যিবোৰ নিৰামিষ খাদ্যৰ বাবে বিখ্যাত ।
পৰম্পৰাগত থালিৰ পৰা আৰম্ভ কৰি অনান্য বিকল্পলৈকে এই ঠাইবোৰে নিৰামিষ খাদ্যৰ কলাক উদযাপন কৰে । যদি আপুনিও নিৰামিষ খাদ্যৰ প্ৰতি আকৰ্ষিত, তেন্তে ভাৰতৰ এই ঠাইবোৰত উপলব্ধ সুস্বাদু খাদ্যই আপোনাৰ ভ্ৰমণৰ আনন্দ দুগুণ কৰি তুলিব । গতিকে ভাৰতৰ সেই ৫ খন নিৰামিষ খাদ্যৰ বাবে জনপ্ৰিয় ঠাইৰ বিষয়ে জানক ।
বাৰাণসী, উত্তৰ প্ৰদেশ
বাৰাণসীত নিৰামিষ খাদ্য বিচাৰি পোৱাটো অতি সহজ । ইয়াৰ ঘাট আৰু ৰাজপথত প্ৰতিটো খোজতে সুস্বাদু নিৰামিষ খাদ্য পাব । বেনাৰসৰ বিশেষ খাদ্য হ’ল আলু পুৰি, কচুৰী চবজী, ক্ৰীমী লচ্ছী আৰু বিভিন্ন ধৰণৰ মিঠাই ।
উডুপি, কৰ্ণাটক
দক্ষিণ ভাৰতীয় খাদ্যৰ কথা আহিলে প্ৰথমে উডুপিৰ নাম লোৱা হয় । যদি আপুনি দক্ষিণত নিৰামিষ খাদ্য বিচাৰিছে, তেন্তে উডুপি (Udupi) আপোনাৰ বাবে এক নিখুঁত গন্তব্যস্থান । এই ঠাইখন সমগ্ৰ দক্ষিণতে নিৰামিষ খাদ্যৰ বাবে অতি বিখ্যাত । ইয়াত ইদলী, দোছা, চাম্বৰ, বড়া আৰু নাৰিকল চাটনিৰ সোৱাদ এনেকুৱা যে এবাৰ ল’লে পাহৰিব নোৱাৰিব ।
হৰিদ্বাৰ আৰু ঋষিকেশ
হৰিদ্বাৰ আৰু ঋষিকেশ ধৰ্মীয় স্থান আৰু ইয়াত কেৱল নিৰামিষ খাদ্যহে পোৱা যায় । ইয়াৰ দোকানত পুৰি-আলু, কচুৰী আৰু গৰম জেলেপী উপভোগ কৰিব পাৰিব । গংগা নদীৰ পাৰত অৱস্থিত এই স্থানৰ খাদ্যৰ অতি গুৰুত্ব আছে ।
আহমেদাবাদ, গুজৰাট
গুজৰাটী খাদ্য মৃদু মছলা আৰু মিঠাৰে ভৰপূৰ । এই ঠাইখন নিৰামিষভোজীৰ বাবে অতি বিশেষ কাৰণ গুজৰাটত জৈন ধৰ্মী লোকৰ সংখ্যা অতি বেছি । গুজৰাটী থালি য’ত খাণ্ডৱী, ফাফড়া, ঢোকলা, থেপলা আৰু দাল-খিচিৰী থাকে সেয়াই গুজৰাটৰ বিশেষ পৰিচয় । আহমেদাবাদৰ প্ৰতিটো গলি আৰু বজাৰত সুস্বাদু নিৰামিষ খাদ্য পাব ।
জয়পুৰ, ৰাজস্থান
জয়পুৰৰ ৰাজকীয় নিৰামিষ খাদ্য সমগ্ৰ বিশ্বতে বিখ্যাত । ইয়াত বাজৰাৰ ৰুটি, দাল বাতি চূৰ্মা আৰু গট্টে কি চবজীত ৰাজকীয় সোৱাদ পোৱা যায় । ইয়াৰ বাহিৰেও মিৰ্চি বাড়া, ঘেৱৰ আৰু মালপোৱা জয়পুৰৰ পৰম্পৰাগত খাদ্য । জয়পুৰত উপলব্ধ ৰাজস্থানী থালীৰ সোৱাদ অতি জনপ্ৰিয় ।
লগতে পঢ়ক
