ইণ্টাৰনেশ্যনেল ডেস্ক, ২৮ জুন : আমেৰিকাৰ ৰাষ্ট্ৰপতি নিৰ্বাচন সমাগত । তাৰ প্ৰাকক্ষণত প্ৰথমটো যুক্তি-তৰ্ক কাৰ্যসূচীত মুখামুখি ৰাষ্ট্ৰপতি জ' বাইডেন আৰু প্ৰাক্তন ৰাষ্ট্ৰপতি ডনাল্ড ট্ৰাম্প । এই যুক্তি-তৰ্কৰ জৰিয়তে ৮১ বছৰীয়া ডেম'ক্ৰেটিক নেতা বাইডেনে ভোটাৰসকলক আশ্বস্ত কৰাৰ চেষ্টা কৰে যে কেনেদৰে তীব্ৰ প্ৰত্যাহ্বানৰ মাজেৰে দেশখনত তেওঁ আগুৱাই লৈ গৈছে আৰু নৱেম্বৰত ভোটাৰসকলে যোগ্য প্ৰাৰ্থী হিচাপে তেওঁকে নিৰ্বাচিত কৰিব বুলিও তেওঁ আশাবাদী ।
ইফালে ৭৮ বছৰীয়া ট্ৰাম্পে নিউয়ৰ্কত তেওঁৰ বিৰুদ্ধে থকা অপৰাধমূলক ঘটনাবোৰ মিছা বুলি প্ৰমাণ কৰাৰ চেষ্টা কৰে । লগতে লাখ লাখ লোকক বুজাই দিয়ে যে তেওঁ অ'ভাল কাৰ্যালয়লৈ ঘূৰি অহাৰ বাবে উপযুক্ত । ট্ৰাম্প আৰু বাইডেনে কঠোৰ পৰিস্থিতিৰ সন্মুখীন হোৱাও দেখা গৈছে । তাৰ ভিতৰত আছে দলীয় ৰাজনৈতিক হুলস্থুল, অসন্তুষ্ট জনসাধাৰণ ।
যুক্তি-তৰ্কৰ সময়ত চিএনএনয়ে কেইবাটাও নিয়ম বান্ধি দিছিল । সেই নিয়মবোৰ পালন কৰিবলৈ সন্মত হৈছিল দুয়োগৰাকী নেতা । সামাজিক মাধ্যমত শ্বেয়াৰ কৰা এটা ভিডিঅ'ত দেখুওৱা হৈছে যে কেনেকৈ ৮১ বছৰীয়া বাইডেন আৰু ৭৮ বছৰীয়া ট্ৰাম্পক তেওঁলোকৰ যুক্তি-তৰ্কৰ সময়ত সহায় কৰিবলৈ 'উচ্চ-প্ৰযুক্তিৰ' মাইক্ৰ'ফোন স্থাপন কৰা হৈছে ।
পূৰ্বৰ এনে যুক্তি-তৰ্কতকৈ ব্যতিক্ৰম আছিল কিয়নো কোনো লাইভ ষ্টুডিঅ'ৰ দৰ্শক নাছিল । ৭০ শতাংশতকৈও অধিক আমেৰিকান ভোটাৰে উচ্চ-অংশীদাৰী যুক্তি-তৰ্কৰ সৈতে সুৰ মিলাবলৈ পৰিকল্পনা কৰিছে ।
বিতৰ্কৰ সময়ত ইজনে সিজনৰ ওপৰত বিভিন্ন বিষয়ত ক্ষোভিত হোৱা দেখা গৈছে । অৰ্থনীতি বা বৈদেশিক নীতিক লৈও দুয়োগৰাকী নেতাই বিভিন্ন ধৰণৰ অভিযোগ উত্থাপন কৰিছিল । মুদ্ৰাস্ফীতি আৰু আফগানিস্তান বিষয়ত তেওঁলোকৰ মাজত বিতৰ্ক হোৱা দেখা যায় ।
লক্ষণীয়ভাৱে দুয়োগৰাকী ৰাষ্ট্ৰপতি পদৰ প্ৰাৰ্থী মঞ্চলৈ খোজকাঢ়ি আহিছিল আৰু পোনপটীয়াকৈ তেওঁলোকৰ নিজৰ নিজৰ স্থানলৈ গৈছিল । সেই সময়ত দুয়োগৰাকী নেতাই কৰমৰ্দনৰ পৰাও আঁতৰি আছিল । দুয়োগৰাকী নেতাই ২০২০ চনৰ ৰাষ্ট্ৰপতি নিৰ্বাচনৰ পূৰ্বে অন্তিমটো যুক্তি-তৰ্কত মুখামুখি হৈছিল ।
এই যুক্তি-তৰ্কত বিশেষ স্থান লাভ কৰিছিল ৬ জানুৱাৰীৰ ঘটনাই । কেপিটল বিদ্ৰোহৰ কথা বাইডেনে উল্লেখ কৰিছিল কিন্তু শাসনলৈ আহিলে ট্ৰাম্পে আমেৰিকা চৰকাৰক পুনৰ নিৰ্মাণৰ প্ৰতিশ্ৰুতি দিছে । অৱশ্যে বাইডেনে যুক্তি দিয়ে যে তেওঁৰ বিৰোধীয়ে ৰাষ্ট্ৰৰ গণতন্ত্ৰৰ বাবে অস্তিত্বৰ ভাবুকি সৃষ্টি কৰিব ।
এংকৰ জেক টেপাৰ আৰু ডানা বাশ্বৰ দ্বাৰা পৰিচালিত এই ঐতিহাসিক সাধাৰণ নিৰ্বাচনী যুক্তি-তৰ্ক হিচাপে চিহ্নিত অনুষ্ঠানটো বৃহস্পতিবাৰে চিএনএনত সম্প্ৰচাৰ হয় । ১৯৮৮ চনৰ পৰা প্ৰতিটো নিৰ্বাচন আয়োজন কৰা দ্বিদলীয় আয়োগক প্ৰত্যাখ্যান কৰাৰ পিচত এক সংবাদ মাধ্যমে আয়োজন কৰা এয়া আছিল প্ৰথমটো সাধাৰণ নিৰ্বাচনৰ ৰাষ্ট্ৰপতিৰ যুক্তি-তৰ্ক অনুষ্ঠান ।
২০২০ চনৰ দুয়োগৰাকী নেতাই অংশ লোৱা যুক্তি-তৰ্ক অনুষ্ঠান যথেষ্ট বিশৃংখল আছিল বুলি সকলোৱে স্বীকাৰ কৰিছে । যাৰ বাবে এনে পৰিস্থিতিৰ প্ৰতি লক্ষ্য ৰাখি দৰ্শক অবিহনে অনুষ্ঠান আয়োজনৰ বাবে দুয়োগৰাকী নেতা সন্মত হৈছিল । অনুষ্ঠানটোত যেতিয়া এগৰাকী নেতাই তেওঁৰ যুক্তি দি আছিল তেতিয়া আনগৰাকীৰ মাইক্ৰ'ফোনটো বন্ধ কৰি ৰখা হয় ।
চিএনএনয়ে এই অনুষ্ঠানত দুটা বাণিজ্যিক বিৰতি লোৱা দেখা গৈছিল । আনহাতে প্ৰাৰ্থীসকলে কেমেৰা বন্ধ থকাৰ সময়ত কৰ্মচাৰী বা আনৰ পৰামৰ্শ নল'বলৈও সন্মত হৈছিল ।
শেহতীয়া দিনবোৰত বাইডেন অধিক শক্তিশালী হ'ব বুলি তেওঁ দলে বিশ্বাস কৰিছিল । বাইডেনৰ দলটোৱে আশা কৰিছিল যে তেওঁ এই অনুষ্ঠানলৈ আহিব আৰু ট্ৰাম্পে তেওঁৰ স্থিতি স্পষ্ট কৰিবলৈ বাধ্য হ'ব । অনুষ্ঠানৰ পূৰ্বে বাইডেন পত্নী জিল বাইডেনে কৈছিল যে তেওঁৰ স্বামী এই অনুষ্ঠানৰ বাবে প্ৰস্তুত আৰু তেওঁ আত্মবিশ্বাসী । স্বামী বাইডেনক শ্ৰেষ্ঠ তাৰ্কিক বুলিও বৰ্ণনা কৰিছিল পত্নী জিলে । ইফালে এই যুক্তি-তৰ্কৰ পিচতে দুয়োগৰাকী নেতাই ৰাজ্যসমূহলৈ ভ্ৰমণ কৰিব আৰু নিৰ্বাচনৰ বাবে সাজু হ'ব ।
ট্ৰাম্প ভাৰ্জিনিয়ালৈ যাব যি হৈছে এসময়ৰ যুদ্ধক্ষেত্ৰ । শেহতীয়া বছৰবোৰত ডেমক্ৰেটসকলৰ দুৰ্গ হৈ পৰিছে এই অঞ্চল । ইফালে বাইডেন উত্তৰ কেৰোলিনালৈ যাত্ৰা কৰিবলৈ সাজু হৈছে, য'ত ২০২০ চনত ট্ৰাম্পে সংকীৰ্ণভাৱে বিজয় সাব্যস্ত কৰিছিল । বাইডেনে ইয়াত সৰ্ববৃহৎ ৰেলীৰ আয়োজন কৰিব বুলি আশা কৰা হৈছে ।
