ইণ্টাৰনেচনেল ডেস্ক, 6 জুলাই : ব্ৰিটেইনৰ নতুন প্ৰধানমন্ত্ৰী কেইৰ ষ্টাৰমাৰে শুকুৰবাৰে এক নতুন মাইলৰ খুঁটিত উপনীত হয় । 2024 চনৰ লোকসভা নিৰ্বাচনৰ সময়ত ভাৰতৰ প্ৰধানমন্ত্ৰী নৰেন্দ্ৰ মোদী আৰু ভাৰতীয় জনতা পাৰ্টীয়ে প্ৰস্তুত কৰা শ্লোগান '400 পাৰ' অৰ্জন কৰে ব্ৰিটেইনৰ প্ৰধানমন্ত্ৰী তথা তেওঁৰ দল লেবাৰ পাৰ্টীয়ে ।
আনহাতে, লেবাৰ পাৰ্টীয়ে ব্ৰিটেইনৰ সাধাৰণ নিৰ্বাচনত বিপুল বিজয় লাভ কৰাৰ কেইঘণ্টামান পিচত কেইৰ ষ্টাৰমাৰে ব্ৰিটেইনক পুনৰ নিৰ্মাণৰ প্ৰতিশ্ৰুতি প্ৰদান কৰে । উল্লেখ্য, এইবাৰ ব্ৰিটেইনৰ ভোটাৰসকলে ঋষি ছুনাক নেতৃত্বাধীন কনজাৰ্ভেটিভসকলৰ ওপৰত এক কঠোৰ ৰায় দিয়ে । যাৰ ফলত দলটো আটাইতকৈ শোচনীয় নিৰ্বাচনী ফলাফলৰ সন্মুখীন হ'বলগা হয় ।
61 বছৰীয়া ষ্টাৰমাৰে ব্ৰিটিছ ৰাজতন্ত্ৰৰ সৈতে ছুনাকৰ সাক্ষাতৰ পিচত বাকিংহাম পেলেচত ৰজা তৃতীয় চাৰ্লছৰ সৈতে তেওঁৰ পৰম্পৰাগত দৰ্শনৰ পিচত 58 সংখ্যক প্ৰধানমন্ত্ৰী হিচাপে দায়িত্বভাৰ গ্ৰহণ কৰে ।
Heartiest congratulations and best wishes to @Keir_Starmer on the remarkable victory in the UK general elections. I look forward to our positive and constructive collaboration to further strengthen the India-UK Comprehensive Strategic Partnership in all areas, fostering mutual…
— Narendra Modi (@narendramodi) July 5, 2024
এইবাৰৰ নিৰ্বাচনত ব্ৰিটেইনৰ লেবাৰ পাৰ্টীয়ে 650 জনীয়া হাউছ অব কমন্সত 412 খন আসন লাভ কৰে । এয়া হৈছে 2019 চনত অন্তিমবাৰ অনুষ্ঠিত নিৰ্বাচনৰ তুলনাত 211 খন অধিক । আনহাতে, ছুনাকৰ কনজাৰ্ভেটিভ দলে মাত্ৰ 121 খন আসনহে লাভ কৰিবলৈ সক্ষম হয় । এই সংখ্যা হৈছে পূৰ্বৰ নিৰ্বাচনৰ তুলনাত 250 খন আসন কম । লেবাৰ দলৰ ভোটৰ অংশ হৈছে 33.7 শতাংশ আৰু কনজাৰ্ভেটিভৰ 23.7 শতাংশ ।
উল্লেখ্য যে, একেৰাহে তৃতীয়বাৰৰ বাবে মিত্ৰশক্তিৰ সহায়ত শাসনলৈ অহা বিজেপি আৰু প্ৰধানমন্ত্ৰী নৰেন্দ্ৰ মোদীয়ে এইবাৰ নিৰ্বাচনত 'ইস বাৰ 400 পাৰ' (এইবাৰ 400 খন আসনৰ ওপৰত) শ্ল’গানটো প্ৰস্তুত কৰিছিল । প্ৰধানমন্ত্ৰী মোদী আৰু কেন্দ্ৰীয় মন্ত্ৰী অমিত শ্বাহ, ৰাজনাথ সিং, ড৹ এছ জয়শংকৰ আৰু নিৰ্মলা সীতাৰমণৰ দৰে অন্যান্য জ্যেষ্ঠ বিজেপি নেতাসকলে প্ৰচাৰ চলাওঁতে এই শ্ল’গানটো ব্যাপকভাৱে ব্যৱহাৰ কৰিছিল । অৱশ্যে বিজেপিয়ে সংসদৰ 543 জনীয়া নিম্ন সদনত মাত্ৰ 249 খন আসনহে জিকিবলৈ সক্ষম হৈছিল ।
2014 চনৰ লোকসভা নিৰ্বাচনত বিজেপিয়ে 'অব কী বাৰ মোদী চৰকাৰ' (এইবাৰ মোদীৰ চৰকাৰ) শ্ল’গান প্ৰস্তুত কৰিছিল আৰু 2019 চনৰ লোকসভা নিৰ্বাচনত বিজেপিয়ে 'ফিৰ এক বাৰ মোদী চৰকাৰ' (আৰু এবাৰ মোদী চৰকাৰ) শ্ল’গান প্ৰস্তুত কৰিছিল ।
ইফালে প্ৰধানমন্ত্ৰী নৰেন্দ্ৰ মোদীয়ে ব্ৰিটেইনৰ প্ৰধানমন্ত্ৰী হিচাপে নিৰ্বাচিত ষ্টাৰমাৰক এক্সত এটা পোষ্ট দি অভিনন্দন জনায় । প্ৰধানমন্ত্ৰী মোদীয়ে শুভেচ্ছাবাৰ্তাটোত কয়, "ব্ৰিটেইনৰ সাধাৰণ নিৰ্বাচনত উল্লেখনীয় বিজয়ৰ বাবে কেইৰ ষ্টাৰমাৰক আন্তৰিক অভিনন্দন আৰু শুভেচ্ছা জনাইছো । সকলো ক্ষেত্ৰতে ভাৰত-ব্ৰিটেইনৰ ব্যাপক কৌশলগত অংশীদাৰিত্ব অধিক শক্তিশালী কৰাৰ বাবে, পাৰস্পৰিক বিকাশ আৰু সমৃদ্ধি বৃদ্ধিৰ বাবে মই আমাৰ ইতিবাচক আৰু গঠনমূলক সহযোগিতাৰ বাবে আশাবাদী ।"
