এক নতুন প্ৰতিবেদনত পোহৰলৈ আহিছে এক চাঞ্চল্যকৰ তথ্য ৷ ইণ্ডিয়ান কাউন্সিল অৱ মেডিকেল ৰিচাৰ্চ (আই চি এম আৰ)ৰ তথ্য অনুসৰি দেশৰ ২১খন ডাঙৰ চিকিৎসালয়ত ছুপাৰবাগৰ বিপদজনক উপস্থিতি দেখা গৈছে ৷ এই ছুপাৰবাগবোৰৰ বাবে চিকিৎসালয়ত ভৰ্তি হোৱা ৰোগীৰ জীৱন বিপদত পৰিব পাৰে ৷
বিশ্ব স্বাস্থ্য সংস্থাই (WHO) শ্ৰেণীভুক্ত কৰা ছুপাৰবাগ (Klebsiella pneumoniae আৰু Escherichia coli) মূলতঃ এইমছ দিল্লী, পিজিআই চণ্ডীগড়, এপ’ল’ হাস্পতাল চেন্নাই আৰু দিল্লীৰ গংগাৰাম হাস্পতাল আদি বহু চিকিৎসালয়ত পোৱা গৈছে ৷
আইচিএমআৰৰ প্ৰতিবেদনত কোৱা হৈছে যে, বহিঃৰোগী বিভাগ (অ’পিডি), ৱাৰ্ড আৰু আইচিইউৰ পৰা সংগ্ৰহ কৰা তেজ, প্ৰস্ৰাৱ আৰু অন্যান্য তৰল পদাৰ্থকে ধৰি ৰোগীৰ নমুনাত এই ছুপাৰবাগ পোৱা গৈছে ৷ এই প্ৰকাশে চিকিৎসালয়সমূহত এক ভয়াৱহতাৰ সৃষ্টি কৰিছে আৰু তেওঁলোকক ঔষধৰ উন্নত ব্যৱস্থাপনা আৰু বেক্টেৰিয়াৰ আৱৰ্জনা নিষ্কাশনৰ বাবে কঠোৰ প্ৰট’কল মানি চলিবলৈ পৰামৰ্শ দিয়া হৈছে যাতে ছুপাৰবাগ অধিক বিয়পিব নোৱাৰে ৷
ছুপাৰবাগে কেন্সাৰৰ দৰে ডাঙৰ ভাবুকি কঢ়িয়াই আনিব পাৰেনে ?
চলিত বৰ্ষৰ আৰম্ভণিতে ৰাষ্ট্ৰসংঘৰ পৰিৱেশ কাৰ্যসূচীয়ে প্ৰকাশ কৰা এক প্ৰতিবেদনত কোৱা হৈছে যে ২০৫০ চনৰ ভিতৰত ছুপাৰবাগ কেন্সাৰৰ দৰেই ডাঙৰ ভাবুকি হ’ব পাৰে ৷ প্ৰতিবেদনত কোৱা হৈছে যে ২০৩০ চনৰ শেষলৈকে এনে ছুপাৰবাগৰ প্ৰত্যক্ষ অৰ্থনৈতিক পৰিণতি বছৰি প্ৰায় ৩.৪ ট্ৰিলিয়ন ডলাৰ হ’ব ৷ ইয়াৰ উপৰিও ২.৪ কোটি লোকক চৰম দৰিদ্ৰতালৈ ঠেলি দিব পাৰি ৷ প্ৰতিবেদনত কোৱা হৈছে যে পশুপালন আৰু ঔষধ কোম্পানীসমূহৰ প্ৰদূষণৰ ফলত ছুপাৰবাগৰ উত্থান বৃদ্ধি পাইছে ৷
কি হয় ছুপাৰবাগ ?
ছুপাৰবাগ হৈছে বেক্টেৰিয়া, ভাইৰাছ, ভেঁকুৰ বা পৰজীৱীৰ প্ৰজাতি যিবোৰ আধুনিক ঔষধকে ধৰি বেছিভাগ এন্টিবায়টিকৰ প্ৰতিৰোধী ৷ প্ৰায়ে এন্টিবায়টিকৰ অপব্যৱহাৰৰ ফলত এই ৰোগ হয় ৷ বীজাণু সবল কৰি ৰখাত সহায় কৰিব পৰা বীজাণুনাশক, এন্টিচেপ্টিক আৰু এন্টিবায়টিক টুথপেষ্ট আৰু চেম্পুৰ পৰা আৰম্ভ কৰি গৰুৰ গাখীৰ আৰু লেতেৰা পানীলৈকে সকলোতে উপস্থিত থাকে ৷
ছুপাৰবাগৰ দুটা মূল ৰূপ
মূলতঃ দুটা উপায়েৰে ইহঁত এন্টিমাইক্ৰ’বিয়াল ৰেজিষ্টেণ্ট (AMR) হৈ পৰে ৷ এটা হ’ল পশুপালনত ঔষধৰ অত্যধিক ব্যৱহাৰ, যিয়ে যিকোনো এন্টিবায়টিকৰ প্ৰভাৱৰ পৰা হাত সাৰিবলৈ বেক্টেৰিয়াৰ প্ৰজাতিসমূহৰ মিউটেচনৰ সুযোগ প্ৰদান কৰে ৷ দ্বিতীয়তে, ঔষধ কোম্পানীয়ে জলপথ প্ৰদূষিত কৰে ৷ ঔষধ কোম্পানীসমূহে চিকিৎসাৰ আৱৰ্জনাসমূহ পৰ্যাপ্ত পৰিমাণে পৰিশোধন নকৰে যাৰ ফলত প্ৰতিৰোধী ছুপাৰবাগ সৃষ্টি হয় ৷ বিশেষজ্ঞসকলে ইয়াক ‘জেনেটিক কেপিটেলিজম’ বুলি কোৱাৰ দৰে এ এম আৰ এক স্বাভাৱিক পৰিঘটনা ৷ কিন্তু ঔষধ বিশেষকৈ এন্টিবায়টিকৰ অত্যধিক ব্যৱহাৰে এই প্ৰক্ৰিয়া ত্বৰান্বিত কৰিছে ৷
