নিউজ ডেস্ক, ২ ফেব্ৰুৱাৰী : হিমাচল প্ৰদেশত এইবাৰ দীৰ্ঘদিন ধৰি বতৰ শুষ্ক আছিল । কিন্তু দীঘলীয়া অপেক্ষাৰ অন্তত বৰ্তমান ৰাজ্যখনত বৰষুণ হৈছে আৰু বৰফ পৰিছে । ৰাজ্যখনৰ অতি উচ্চ অঞ্চলৰ পৰ্বতবোৰ বৰফ বগা চাদৰে সম্পূৰ্ণ ঢাকি পেলাইছে । ৰাজ্যখনৰ উচ্চ উপত্যকাবোৰ ৰূপালী বৰণেৰে জিলিকি উঠিছে । আনহাতে, প্ৰচণ্ড তুষাৰপাতৰ ফলত এফালে পৰ্যটন ব্যৱসায়ীসকলে স্বস্তিৰ নিশ্বাস পেলাইছে, আনফালে কৃষক আৰু উদ্যানপালকসকলৰো মুখত হাঁহি বিৰিঙি উঠিছে ।
তাৎপৰ্যপূৰ্ণভাৱে দীৰ্ঘদিন ধৰি বৰষুণ আৰু তুষাৰপাতৰ অভাৱৰ বাবে ৰাজ্যখনৰ পৰ্যটন ব্যৱসায় হ্ৰাস পাইছিল । তুষাৰপাতৰ সন্ধানত অহা পৰ্যটকসকল হতাশ হৈ উভতি আহিছে আৰু খুব কম পৰ্যটকহে পৰ্যটনস্থলীত উপস্থিত হৈছে । এনে পৰিস্থিতিত, তুষাৰপাতৰ ফলত পৰ্যটন ব্যৱসায়ীসকলৰ ভাগ্য পুনৰ এবাৰ উজলি উঠিছে । এতিয়া বহু সংখ্যক পৰ্যটক হিমাচলৰ পৰ্যটনস্থলীলৈ ঘূৰি আহিছে ।
তীব্ৰ ঠাণ্ডা সত্ত্বেও পৰ্যটকসকলে তুষাৰপাতৰ আনন্দ উপভোগৰ পৰা নিজকে বাধা দি ৰাখিব পৰা নাই । ইফালে বৰষুণ-তুষাৰপাত নোহোৱাৰ বাবে শস্যবোৰ শুকাই যাবলৈ আৰম্ভ কৰিছিল আৰু আপেলৰ গছবোৰো প্ৰভাৱিত হৈছিল । কিন্তু ধাৰাসাৰ বৰষুণ আৰু তুষাৰপাতৰ পিছত কৃষক-মালীসকলে আশা কৰিছে যে এতিয়া শস্যবোৰৰ উৎপাদন ভাল হ'ব আৰু আপেল গছবোৰেও পৰ্যাপ্ত শীতল সময় পাব ।
কিন্তু ইয়াৰ উপৰি ৰাজ্যখনত প্ৰচণ্ড তুষাৰপাতৰ পিছত মানুহৰ অসুবিধাও বৃদ্ধি পাইছে । বিগত দুদিন ধৰি তুষাৰপাতৰ পিছত বহু অঞ্চলত পথবোৰ বন্ধ হৈ পৰিছে । ৰাজ্যখনৰ ৭২০ টা পথত যান-বাহন চলাচল স্থবিৰ হৈ পৰিছে । চাম্বা জিলাত প্ৰায় ১৬৩ টা, চিমলাত ২৫০ টা, লাহৌল-স্পিতিত ১৩৯ টা, কুলু আৰু অন্যান্য জিলাত ৬৭ টা পথ বন্ধ হৈ পৰিছে ।
অৱশ্যে পথবোৰ খোলাৰ কাম যুদ্ধগতিত চলি আছে আৰু পথবোৰ মুকলি কৰিবলৈ প্ৰায় 250 টা যন্ত্ৰপাতি মোতায়েন কৰা হৈছে । শুকুৰবাৰে আবেলিলৈকে যান-বাহনৰ বাবে 300 টা পথ পুনৰ খোলা হৈছে । ইফালে এই তুষাৰপাতৰ ফলত ৰাজ্যজুৰি 2,200-ৰো অধিক ট্ৰেন্সফৰ্মাৰ ক্ষতিগ্ৰস্ত হৈছে । যাৰ বাবে বহুতো গাঁও দুদিন ধৰি অন্ধকাৰত আছে ।
লগতে পঢ়ক :AQI ৰ সূচাংক কিছু উন্নত; বৰষুণৰ বাবে দিল্লীত জাৰি হালধীয়া সতৰ্কবাণী
