লেহ : লাডাখৰ কাৰ্গিল জিলাৰ চুৰু ভেলীয়ে নেচনেল জিঅ'গ্ৰাফিকৰ 'ভ্ৰমণৰ বাবে বিশ্বৰ শ্ৰেষ্ঠ 25 স্থান' তালিকাত স্থান লাভ কৰিছে । যাৰ ফলত এই মনোৰম অঞ্চলটোৱে বিশ্বজনীন ভ্ৰমণ ৰাডাৰত স্থান লাভ কৰিছে । মনোৰম দৃশ্যাৱলী, সাংস্কৃতিক ঐতিহ্য আৰু বৌদ্ধ আৰু ইছলামিক প্ৰভাৱৰ মিশ্ৰণৰ বাবে জনাজাত চুৰু উপত্যকা হৈছে বিশাল সম্ভাৱনাপূৰ্ণ এক সুপ্ত ৰত্ন ।
এই স্বীকৃতি অঞ্চলটোৰ বাবে এক গুৰুত্বপূৰ্ণ উৎসাহ । ইয়াৰ দ্বাৰা স্থানীয় পৰ্যটন বিষয়া, সম্প্ৰদায়ৰ নেতা আৰু আৱাসীসকলৰ মাজত যথেষ্ট আলোড়নৰ সৃষ্টি কৰিছে । তেওঁলোকে দুঃসাহসিক ভ্ৰমণ, ইতিহাসৰ প্ৰতি উৎসাহী আৰু প্ৰকৃতিপ্ৰেমীসকলৰ বাবে চুৰু উপত্যকাক এক মুখ্য গন্তব্যস্থানলৈ ৰূপান্তৰ কৰাৰ এক সোণালী সুযোগ হিচাপে গণ্য কৰিছে ।
চুৰু ভেলীক কিহে অনন্য কৰি তুলিছে ?
কাৰ্গিল জিলাত অৱস্থিত চুৰু উপত্যকা হৈছে এক মনোৰম আশ্চৰ্য । এই দুৰ্গম কিন্তু সেউজীয়া উপত্যকাটো চুৰু নদীৰ কাষত বিস্তৃত আৰু বিতোপন শৃংগৰে গঠিত । আনহাতে, ইয়াৰ সমৃদ্ধ ইতিহাস আৰু সংস্কৃতিৰে ই নিমজ্জিত । ইয়াত চৈয়দ মীৰ হাছিম নামৰ এগৰাকী প্ৰভাৱশালী ধৰ্ম প্ৰচাৰকৰ সমাধি আছে । তেওঁ অঞ্চলটোত ইছলাম প্ৰচাৰ কৰিছিল । আনহাতে, কাৰ্টছেত থকা মৈত্ৰেয় বুদ্ধৰ প্ৰাচীন প্ৰতিমূৰ্তিৰ পৰা কাশ্মীৰী কাৰুশিল্পলৈকে ই এক বিৰল সংমিশ্ৰণ প্ৰদৰ্শন কৰে ।
স্থানীয় বাসিন্দাসকলে দীৰ্ঘদিন ধৰি বিশ্বাস কৰি আহিছে যে চুৰু ভেলী ইয়াৰ ট্ৰেকিং পথ, উৎসৱ আৰু পেৰাগ্লাইডিঙৰ দৰে দুঃসাহসিক কাৰ্যকলাপৰ বাবে থকা যি সম্ভাৱনা সেয়া কম পৰিমাণে মূল্যাঙ্কিত হৈ আহিছে । আনহাতে, ইয়াক প্ৰায়ে লেহ বা পাংগঙলৈ যোৱা পৰ্যটকসকলে উপেক্ষা কৰি আহিছে । ইফালে এই নতুন বিশ্বজনীন স্বীকৃতিৰ দ্বাৰা উপত্যকাটোৱে সমগ্ৰ বিশ্বৰ পৰা অহা পৰ্যচকসকলক স্বাগতম জনাবলৈ সাজু হৈছে ।
পৰ্যটন বৃদ্ধিৰ ওপৰত স্থানীয় উৎসাহ আৰু উদ্বেগ
এই স্বীকৃতিয়ে কাৰ্গিলত আশা আৰু উৎসাহৰ সৃষ্টি কৰিছে । ৰুটছ লাডাখৰ সহ-প্ৰতিষ্ঠাপক তথা মুখ্য কাৰ্যবাহী বিষয়া মুজাম্মিল হুছেইনে কয়, "এইটো এটা ডাঙৰ খবৰ । কিয়নো আমি বছৰ বছৰ ধৰি চুৰু আৰু কাৰ্গিলক পৰ্যটনস্থল হিচাপে প্ৰচাৰ কৰি আহিছোঁ । ৭০ আৰু ৮০ ৰ দশকত চুৰু এক সুপৰিচিত দুঃসাহসিক হটস্পট আছিল । কিন্তু ৯০ ৰ দশকত কাশ্মীৰৰ অস্থিৰতাই ইয়াত পৰ্যটনক ব্যাপকভাৱে প্ৰভাৱিত কৰিছিল । অৱশেষত বৰ্তমান অঞ্চলটো পৰ্যটন মানচিত্ৰলৈ ঘূৰি আহিছে ।"
হুছেইনে উপত্যকাটোৰ আবেদনৰ ওপৰত বিশেষকৈ দুঃসাহসিক পৰ্যটনৰ ওপৰত আলোকপাত কৰে । তেওঁ কয় যে বাৰ্ষিক চুৰু উৎসৱৰ জৰিয়তে ইয়াক পুনৰ উদ্ভাসিত হোৱা দেখা গৈছে । 2016 চনৰ পৰা ৰক ক্লাইম্বিং, হাইকিং আৰু স্থানীয় সংস্কৃতি এই উৎসৱত উদযাপন কৰি অহা হৈছে ।
অৱশ্যে সতৰ্কতা হিচাপে হুছেইনে কয়, "আন্তঃগাঁথনি আৰু নিয়ন্ত্ৰণৰ ক্ষেত্ৰত এতিয়াও বহুতো কৰিবলগীয়া আছে । দুৰ্ভাগ্যবশতঃ ব্যাপক খননে চুৰুৰ কিছু মুখ্য আৰোহণ আৰু ব'ল্ডাৰিং স্থান ক্ষতিগ্ৰস্ত কৰিছে । ই আমি আকৰ্ষিত কৰাৰ লক্ষ্য নিৰ্ধাৰণ কৰা পৰ্যটকসকলক বাধা দিব পাৰে । কেৱল ভঙা শিলবোৰ চাবলৈ ইয়ালৈ কোনো নাহিব ।" তেওঁ চুৰু উৎসৱৰ প্ৰতিষ্ঠাপক সদস্য টেনজিন জামিয়াঙৰ দৰে স্থানীয় লোকসকলৰ প্ৰশংসা কৰে আৰু ভৱিষ্যতে পৰ্যটন উন্নয়ন প্ৰকল্পত এই স্থানীয় আয়োজকসকলক নিয়োজিত কৰিবলৈ চৰকাৰক আহ্বান জনায় ।
কাৰ্গিলক উজ্জীৱিত কৰিছে
কাৰ্গিলৰ এজন হোটেল ব্যৱসায়ী নাছিৰ হুছেইন মুন্সিয়ে উপত্যকাটোৰ আবেদনক এক সাংস্কৃতিক আৰু প্ৰাকৃতিক গন্তব্য স্থান হিচাপে প্ৰশংসা কৰে । "চুৰু উপত্যকাৰ অপৰিসীম সম্ভাৱনা আছে । ইয়াৰ ভিতৰত আছে শ্বাসৰুদ্ধকাৰী দৃশ্য, কাৰ্টছে বুদ্ধৰ দৰে সমৃদ্ধ ঐতিহ্যবাহী স্থান আৰু বিভিন্ন সম্প্ৰদায়ৰ মাজত সমন্বয় । কিন্তু দুৰ্ভাগ্যবশত জাংস্কাৰলৈ যোৱাৰ পথত কাৰ্গিলক প্ৰায়ে কেৱল এটা নিশাৰ বাবেহে জিৰণিৰ স্থান হিচাপে গণ্য কৰা দেখা গৈছে । নেচনেল জিঅ'গ্ৰাফিকৰ এই স্বীকৃতিয়ে অৱশেষত কাৰ্গিলক বহুদিনীয়া গন্তব্য স্থান হিচাপে গঢ়ি তুলিব পাৰে ।" তেওঁ কয় ।
মুন্সীয়ে উল্লেখ কৰে যে ৰাফ্টিং, পেৰাগ্লাইডিং আৰু ট্ৰেকিঙৰ দৰে কাৰ্যকলাপকে ধৰি চুৰু উপত্যকাৰ পৰ্যটন সম্ভাৰৰ সম্প্ৰসাৰণে আন্তৰ্জাতিক পৰ্যটকক আকৰ্ষিত কৰিব পাৰে । তেওঁ লাডাখৰ ভিতৰত নিৰ্দিষ্ট অঞ্চলত পৰ্যটনৰ ওপৰত গুৰুত্ব দিবলৈ বহু বছৰৰ পৰা পৰামৰ্শ দি আহিছে । তেওঁ কয়, "পৰ্যটন খণ্ডই কেৱল হোটেল ব্যৱসায়ী আৰু পৰিবহণ সেৱা প্ৰদানকাৰীসকলকে নহয়, স্থানীয় লোকসকলকো লাভান্বিত কৰিব লাগে । ইয়াৰ ফলত অঞ্চলটোত নিযুক্তি বৃদ্ধি হ'ব লাগে ।" মুন্সীয়ে উপত্যকাটোৰ চলচ্চিত্ৰ পৰ্যটনৰ সম্ভাৱনাৰ বিষয়েও আঙুলিয়াই দিয়ে । ইতিমধ্যে কেইবাখনো চলচ্চিত্ৰ প্ৰযোজনা ইয়াত হৈছে ।
ঐতিহাসিক তাৎপৰ্য সংৰক্ষণ কৰা
বুৰঞ্জীবিদ ডঃ ষ্টানজিন মিংগ্যুৰে চুৰু উপত্যকাৰ সুগভীৰ সাংস্কৃতিক আৰু ঐতিহাসিক শিপাৰ ওপৰত আলোকপাত কৰে । তেওঁ বিশেষকৈ অষ্টম বা নৱম শতিকাৰ কাৰ্টছে বুদ্ধৰ মূৰ্তিৰ কথা উল্লেখ কৰে । "এই মূৰ্তিটোত কাশ্মীৰী কাৰুশিল্প আছে বুলি বিশ্বাস কৰা হয় । ইয়াৰ শিলালিপি আংশিকভাৱে অবোধ্য হৈ আছে ।" তেওঁ কয় যে প্ৰতিমূৰ্তিটোৰ নক্সাই এক সুকীয়া কাশ্মীৰী স্পৰ্শ বহন কৰি প্ৰতিষ্ঠিত বামিয়ান বুদ্ধৰ প্ৰভাৱ প্ৰতিফলিত কৰে । মিংগ্যুৰে লগতে কয় যে উপত্যকাটোৰ ঐতিহাসিক মূৰ্তিসমূহ সমগ্ৰ ভাৰতৰ আন মূৰ্তিৰ পৰা ব্যতিক্ৰম আৰু কাশ্মীৰ আৰু লাডাখৰ মাজত এক কম পৰিচিত সাংস্কৃতিক আদান-প্ৰদান প্ৰতিফলিত কৰে ।
বিগত এটা দশকত সংৰক্ষণৰ প্ৰচেষ্টাৰ বাবে এই মূৰ্তিবোৰৰ অৱস্থাৰ উন্নতি হৈছে, প্ৰৱেশ পথ নিৰ্মাণৰ দ্বাৰা ইয়াৰ সহায় হৈছে । "লাডাখৰ সাংস্কৃতিক ঐতিহ্য বৰ্তাই ৰখা আৰু ভৱিষ্যত প্ৰজন্মই যাতে এই ঐতিহাসিক স্থানসমূহৰ প্ৰশংসা কৰিব পাৰে সেয়া নিশ্চিত কৰাৰ বাবে এই সংৰক্ষণ ব্যৱস্থাসমূহ অতি গুৰুত্বপূৰ্ণ ।" মিংগ্যুৰে লগতে কয় ।
সম্প্ৰদায়ৰ আহ্বান আৰু ভৱিষ্যতৰ আকাংক্ষা
স্থানীয় সম্প্ৰদায়ৰ নেতা আৰু আৱাসীসকলেও উৎসাহেৰে চুৰু উপত্যকাৰ আশাক লৈ আগ্ৰহী হৈ আছে । কাৰ্পোখৰৰ জিমচখাং ৰিজ'ৰ্টৰ মালিক গোলাম মহম্মদে পৰ্যটনৰ অৰ্থনৈতিক লাভালাভৰ বিষয়ে আলোকপাত কৰি কয়, "কাৰ্পোখৰত আমাৰ ৰিজ'ৰ্টটো আমাৰ স্থানীয় কাউন্সিলাৰৰ সহায়ত স্থাপন কৰা হৈছিল আৰু ই নিযুক্তিৰ সুযোগ প্ৰদান কৰিছে । যাৰ ফলত আমাৰ এলেকাত নিবনুৱাৰ সংখ্যা হ্ৰাস কৰাত সহায় হৈছে ।" তেওঁ প্ৰশাসনক সামূহিক-ভিত্তিক পৰ্যটনক সমৰ্থন কৰিবলৈ আৰু স্থানীয় লোকসকলৰ বাবে নিয়োগৰ সুযোগ সৃষ্টি কৰিবলৈ উপত্যকাটোত অধিক পৰ্যটকৰ কুটিৰ স্থাপন কৰিবলৈ আহ্বান জনায় ।
এল এ এইচ ডি চি কাৰ্গিলৰ প্ৰাক্তন কাৰ্যবাহী কাউন্সিলাৰ চৈয়দ আব্বাছ ৰিজৱীয়ে তেওঁৰ অনুভূতি প্ৰকাশ কৰি স্থানীয় অৰ্থনীতিক সমৰ্থন কৰাৰ বাবে চুৰু উপত্যকাৰ সম্ভাৱনাৰ ওপৰত মত প্ৰতিফলিত কৰে । তেওঁ প্ৰস্তাৱ দিয়ে যে জুনৰ আৰম্ভণিতে অনুষ্ঠিত বনৰীয়া টিউলিপ উৎসৱ, কাপি মিণ্ডোগ আৰু জুলাইত ফুলি থকা ফুলমাহ মিণ্ডোক য়াস্পা আদি অনুষ্ঠানবোৰত অধিক দৰ্শনাৰ্থীক আকৰ্ষিত কৰিবলৈ বাৰ্ষিক পৰ্যটন কেলেণ্ডাৰত অন্তৰ্ভুক্ত কৰা হ'ব । "আমাৰ যুৱসকলক চাকৰিৰ প্ৰয়োজন আৰু আমি তেওঁলোকক পৰ্যটন আৰু ক্ৰীড়ালৈ আনিব বিচাৰো । শীতকালত চুৰু ভেলী আইচ স্কেটিং আৰু হকীৰ কেন্দ্ৰ হ'ব পাৰে । আনহাতে, গ্ৰীষ্মত ট্ৰেকাৰ আৰু বনভোজকাৰীৰ বাবে আনন্দ কঢ়িয়াই আনে ।" ৰিজৱীয়ে কয় ।
বিশ্বৰ সৰ্বশ্ৰেষ্ঠ গন্তব্যস্থানসমূহৰ ভিতৰত চুৰুৰ এই নতুন স্থিতিৰ দ্বাৰা চুৰু ভেলীয়ে পৰ্যটনৰ ওপৰত নতুনকৈ গুৰুত্ব দিয়াৰ বাবে লাভান্বিত হ'বলৈ সাজু হৈছে । অৱশ্যে এই স্বীকৃতিৰ সৈতে উপত্যকাটোৰ প্ৰাকৃতিক সৌন্দৰ্য, ঐতিহাসিক সম্পদ আৰু ইয়াৰ লোকসকলৰ জীৱিকাৰ মাজত ভাৰসাম্য ৰখাৰ বাবে বহনক্ষম উন্নয়ন নিশ্চিত কৰাৰো দায়িত্ব আছে ।
