নিউজ ডেস্ক, 14 অক্টোবৰ: চহৰখনত তেওঁ আছে এখন চাহৰ দোকান ৷ চাহ বেচিয়েই পত্নী আৰু দুটি সন্তানসহ পৰিয়ালটো পোহপাল দি আহিছে তেওঁ ৷ ব্যৱসায়টো সৰু হ’লেও সপোন বহুত ডাঙৰ তেওঁৰ ৷ ল’ৰা-ছোৱালী দুটাক ভালদৰে পঢ়াইছে, যাতে সিহঁতৰ জীৱনটো সুন্দৰ হয় ৷ ল’ৰা-ছোৱালী দুটাই বিচৰা সকলো খিনি দিবলৈ তেওঁ চেষ্টা কৰি আহিছে ৷ চাহ বিক্ৰী কৰিয়েই পৰিয়াল চলোৱা এই ব্যক্তিজনে শেহতীয়াকৈ এনে এটা কাম কৰিলে যিটোৱে সকলোকে আচৰিত কৰি তোলে ৷
মুৰাৰিয়ে মপেড কিনিলে
মুৰাৰি নামৰ এই চাহ বিক্ৰেতাগৰাকীয়ে দেওবাৰে এখন মপেড কিনে ৷ ঘৰলৈ নতুন সামগ্ৰী এটা কিনি আনিলে আমাৰো জানো মনটো থৌকি-বাথৌ নহয়, স্বাভাৱিকতেই মুৰাৰিৰো মনত অপাৰ আনন্দ ৷ মপেডখন অৱশ্যে মুৰাৰিয়ে নিজলৈ কিনা নাই, কিনিছে তেওঁৰ কন্যালৈহে ৷ 90 হাজাৰ টকা মূল্যৰ মপেডখন 20 হাজাৰ টকা ডাউন পে’মেন্ট দি কিনি আনিছে মুৰাৰিয়ে ৷ এতিয়া মাহে তিনি হাজাৰ টকাকৈ কিস্তি হিচাপে বাকীখিনি ধন দিব লাগিব ৷ চাহ বেচাৰ ধনেৰে সেইখিনি জোৰা মাৰিব বুলি তেওঁ মনতে ঠিৰাং কৰিছে ৷ মুৰাৰিযে মপেড কিনিলে সেই কথাত ওচৰ-চুুবুৰীয়া আচৰিত হোৱা নাই ৷ আজিৰ দিনত মপেড এখন কিনাটোনো কি কথা, নহয় জানো ! মপেড কিনাৰ পিচতেই মুৰাৰিয়ে এনে এটা কাণ্ড কৰিলে, যিটো দেখি সকলো হতবাক হৈ গ’ল ৷
ঢোলে-দগৰে ঘৰলৈ আনিলে মপেড, চুবুৰীয়াৰ থৰ লাগিল চকু
90 হাজাৰ টকাৰ মপেডখন 20 টকাৰ ডাউন পে’মেন্টত কিনি ৰাজকীয় ধৰণে ঘৰলৈ আনিলে মুৰাৰিয়ে ৷ যিটো দেখি ওচৰ-চুবুৰীয়া বাদেই দিয়ক, শ্ব’ৰূপম মেনেজাৰো আচৰিত হৈ পৰিল ৷ মপেডখন ঘৰলৈ নিবলৈ মুৰাৰিয়ে কিমান ধন ব্যয় কৰিলে জানেনে ? 60 হাজাৰ টকা খৰচ কৰি মুৰাৰি মপেডখন ঘৰলৈ নিবলৈ যোগাৰ কৰিলে ঢোল, নাচনী, ডিজে, বাগী, ক্ৰেন আদি সকলো ৷ মুৰাৰিক যেতিয়া এই বিষয়ে সোধা হ’ল, তেওঁ কয় যে কন্যাৰ মনত আনন্দ দিবলৈয়ে তেওঁ এইবোৰ কৰিছে ৷ ইফালে শ্ব’ ৰূমৰ মেনেজাৰ কপিল গুপ্তাই কয়, ‘‘ইয়াৰ পৰা বহুতেই বাহন ক্ৰয় কৰে, কিন্তু এনেকুৱা উছাহ আজিলৈকে দেখা নাই ৷’’ ক্ৰেনত মপেডখন বান্ধি, ঢোল-নাচনী, ডিজে সহিতে ঘৰলৈ আহে মুৰাৰি ৷
মোবাইল কিনোতেও কৰিছিল একেই উদযাপন
মুৰাৰিৰ এই উদযাপন কেৱল মপেড কিনাৰ পিচতেই কৰা নাই ৷ ইয়াৰ পূৰ্বেও তেওঁ এনে এক উদযাপন কৰি চৰ্চালৈ আহিছিল ৷ কেইমাহ মান আগতে মুৰাৰিয়ে নিজৰ কন্যাৰ বাবে কিনিছিল এটা স্মাৰ্টফোন ৷ 12,500 টকা ভৰি ম’বাইলটো কিনাৰ পিচত ইয়াক ঘৰলৈ আদৰি নিয়াৰ বাবদ মুৰাৰিয়ে খৰচ কৰে প্ৰায় 25 হাজাৰ টকা ৷ সেই একে ধৰণৰে উদযাপন- ঢোল, ডিজে, নাচনীৰে বাগীত উঠি ঘৰলৈ ম’বাইল আনিছিল মুৰাৰিয়ে ৷ এইধৰণৰ কাণ্ডৰ বাবে সামাজিক মাধ্যমত ব্যাপকভাৱে ভাইৰেল হৈছিল চাহ বিক্ৰেতাগৰাকী ৷
ডিজে বজাই মুৰাৰিৰ অথন্তৰ
দেওবাৰে ঢোলে-দগৰে, ডিজে বজাই মুৰাৰিয়ে মপেড লৈ ঘৰলৈ আহি থকা সময়তে লাগিল এক অথন্তৰ ৷ জিলা আৰক্ষী অধীক্ষকৰ কাৰ্যালয়ৰ সমুখেৰে উচ্চ স্বৰত সংগীত বজাই যোৱাৰ বাবে আৰক্ষীৰ ৰোষত পৰে মুৰাৰি ৷ আৰক্ষীয়ে জব্দ কৰে ডিজেৱালাৰ সা-সামগ্ৰী ৷ বিনা অনুমতিৰে এইদৰে ডিজে বজাই অহাৰ বাবে আৰক্ষীয়ে তদন্ত কৰিব বুলি কয় ৷
মুৰাৰিৰ বিষয়ে নক’লে আধৰুৱা হ’ব !
ইমান সময়ে আপুনি যিজন চাহ বিক্ৰেতা মুৰাৰিৰ বিষয়ে পঢ়িলে, তেওঁৰ ঘৰ মধ্যপ্ৰদেশৰ শিৱপুৰীত ৷ নীলগৰ চৌহদৰ পুৰণি শিৱপুৰীৰ বাসিন্দা মুৰাৰিৰ সম্পূৰ্ণ নাম হৈছে মুৰাৰি লাল কুশৱাহা ৷ শিৱপুৰী চহৰতে তেওঁ এখন চাহৰ দোকান চলাই আছে । নাগপুৰৰ ডলী চায়ৱালা যিদৰে সামাজিক মাধ্যমত বিখ্যাত, তেনেদৰে মুৰাৰিও নিজৰ কৰ্ম-কাণ্ডৰ বাবে ক্ৰমান্বয়ে জনপ্ৰিয় হ’বলৈ ধৰিছে ৷
লগতে পঢ়ক: গোহালিত শুই কৰ্কট ৰোগ নিৰাময়ৰ বিধান দিলে এগৰাকী মন্ত্ৰীয়ে
২২ বছৰ ধৰি ৰাৱণক পূজা কৰা এজন ব্যক্তি; ৰাৱণেই তেওঁৰ আৰাধ্য দেৱতা, ৰাৱণেই তেওঁৰ গুৰু
